Luk 11 | MdtSC | STEP | Tsuhu mo, Zezi akihi avwono o biri mo ntu. Ntini e nde amani ovwono, olwoni a nde omo opisi nde ndi: «Nkumu, yisiha bisi osuumbu ma avwono, mva e Zan ayisihi alwoni a nde.»

Luke 11

Zezi ayisiha alwoni osuumbu ovwono

1 Tsuhu mo, Zezi akihi avwono o biri mo ntu. Ntini e nde amani ovwono, olwoni a nde omo opisi nde ndi: «Nkumu, yisiha bisi osuumbu ma avwono, mva e Zan ayisihi alwoni a nde.» 2 Nde na bo ndi: «Ntini e be levwono. Be leduhi mbri:
Taara,
ove baari aso ayaa ndi
we Ndzyami opeende,
na Onkumu o we oya.
3 Mpa bisi biila e bisi leli na kaama,
etsuhu eso.
4 Boloho ambiini a bisi
mva o bisi leboloho a baari ma biisa bisi,
ka nyiliha bisi ntsa etsimihi ma ebi ni.»

Ntsintsami e ndihi ali o ntsa kaama

5 Zezi ovurihi oduhi bo ndi: «Mvuuru omo o mpanihi e be, abuuna obasaha ndihi, oyeni mpili e nde na mpiiɓi ma oduha nde ndi: “Ndihi a me, biha me mpeembe tari. 6 Obila ndihi a me omo omi wa opiinga oli o ndzo, ŋa me kiila empa nde kali.” 7 Ŋa na ntsa ndzo, buha okaali ndi: “Nyila me two! Me emi mana obiinda ndzo. Saa baana leli antolo. Me i buuna otemehe ma ompa we mpeembe ni.” 8 Ŋa me eduha be mbri ndihi a nde atemehe, adze ompa nde eso e nde adya. Ka ma obila o nde ali ndihi e nde ni, ŋa mo nkomoho e nde. 9 Ŋa me eduha be, be opisa ampi be, be osaha lebahi. Be okuruha ndzo, anaani. 10 Obila, mpini mvuuru apisa obahi, asaha omoni, ŋa akuruha ndzo ma adze onaana. 11 Dzwa taara o mpanihi e be na, ali ntini e mwana apisa ntsu nde ompi nde ntaari o biri e ntsu? 12 Si kali nde opisa bi na taara, taara ompi nde ngya? 13 Be baari ma abi, be leyaa ompa baana a be biiɓi ma eve, nkusa na Taara a be ali o yulu adze ompa Oduduma Santi na baari ma pisa na nde!»

Mpari e Zezi

14 Zezi aki atsuura odidima obi oki na balaha eki nkena. Odidima otsuuhi, nde oya awoɓo. Lemvuuru leya ntsa lekimi. 15 Baari ake ndi: «Nde atsuura ŋa o mpari e Belezibile nkumu edidima ma ebi. Ampaha nde onkumu ma otsuura dzo!» 16 Maamo asahi olehe nde oyere, bo apisi nde ndiimi omaa ewa na yulu. 17 Zezi aki oyaa etsimiŋi e bo, oduhi na bo ndi: «Ntini e baari ma dzwana eta o mpanihi e bo, ntsa osi, tso obii, andzo avi o yula abuha.» 18 Be leduha mbri me etsuura edidima ma ebi o mpari e Belezibile. Ŋa yuhu Satan adzwana eta nde anku, osi o nde edze okaana buni? 19 Ŋa yuhu me etsuuraha edidima ma ebi o mpari e Belezibile, ŋa baana a be se ma atsuuraha dzo o mpari e na? Dzya biri alwoni a be anku ma adze opama be! 20 Yuhu Ndzyami mvuuru ama mpa me mpari ma otsuura edidima ma ebi, o ŋa Onkumu o Nde omi ya mpili e be.

21 «Ntini e balaha eli na mpari na andzasi ma okyele ndzo e nde, i buuna oyaha osolo a nde ni. 22 Ŋa mvuuru avuli nde mpari oya, opiini nde andzasi a nde aki ama lehe tari o mo. Okaɓihi biiɓi e nde apiini na nde eso. 23 Mvuuru ali ka bla me ni, na mbele e me. Ŋa mvuuru ali i yamaha me ma okusaha baari ni, atsala bo.»

Odidima obi omi ya na avuriha

24 «Ntini odidima obi otsuuha o mvuuru, tso oyeni ntsa kayi, osahi biri owuuma. Ŋa tso obisa obasaha biri tso oduhi ndi: “Tata me vuriha ntsa ndzo e me etsuuhi o yo.” 25 Ŋa nde ovurihi, nde okiriha obasihi yo ama kwomo, ama yeese. 26 Nde oyeni na ayaha edidima ekema ntsaami, me evuli nde obi, dzo enyunihi, eya o ntsi. Ekihi e mvuuru dzwa ma enyarihi evuli e kala obi.»

Zezi awoɓo o baari ma ali ntsa oswere

27 Ntini e Zezi awoɓihi vwa, okaasi omo ntsa lemvuuru oduhi nde na ankala ndi: «Oswere oka na okaasi abiri yimi e we, ompi we byele le nde!» 28 Ŋa Zezi okaali ndi: «Oswere oka ni na baari ma yuha mbari e Ndzyami na ma nyiimaha yo!»

Zezi akaala na baari ma pisa nde omaa

29 Lemvuuru le kuna leyi ledzeniŋi Zezi, nde na bo ndi: «Baari a loɓi abi, bo masaha ndiimi, ŋa omaa o baari ma adze omono oso ni o Zonase. ^{▼▼Zonase aki owobi a Ndzyami atumi mpili asi Ninive.} 30 Ŋa ma osuumbu a Zonase aki ndiimi omaa ŋa asi Ninive, Mwana Mvuuru se adze oka ndiimi o baari a loɓi. 31 Tsuhu opami Nkani okaasi osi o mbere ^{▼▼Okaasi dzwa aki Nkani osi o Saba, oki la na Izayele na mbere.} adze otemee obanaŋa baari a loɓi, obila nde ama wa esi e la, ma oyuha ntsimi e mbari e Salomo. Ŋa ali kuuni ovuli Salomon! 32 Tsuhu opami baari a Ninive ma adze otemehe ma obanaha ndzuɓu e loɓi, obila bo ama yalaha mbari e Zonase atoosi, bo se ama kaala eku. Ŋa ali kuuni ovuli Zonase!»

Miisi mva baami e mbaa

33 «Mvuuru i buuna onaasa baami e mbaa, odzisihi yo ngula ntari ni. Nde obaŋa yo o biri e baari ma ali onyunuŋa amoni oyalala. 34 Diisi le we baami e mbaa e nyuru. Ntini e diisi le we le eli yemihi, nyuru e we eso se eli ntsa oyalala. Ŋa yuhu lo le bi, nyuru e we se eli ntsa lempiiɓi. 35 Ŋa sa ayiɓa! Oyalala eli o we i ma ka lempiiɓi ni. 36 Ŋa yuhu nyuru e we eso eli ntsa oyalala, si lengulu lemo leli ntsa lempiiɓi onyaŋa, yo eka eso ntsa oyalala, mva ntini e baami le mbaa empaha we oyalala o yo.»

Zezi abanaŋa Afarizi bla ayisihi a mbari e Ndzyami

37 Ntini e Zezi awoɓihi, Ofarizi omo otwoli Zezi na adza o ndzo e nde. Zezi onyunihi, oya o tanda. 38 Ofarizi okimi ma osuumbu a Zezi aka saa tsuka dzyala ^{▼▼Ntini e bo ma dza biila, ove bo asa tsuka dzyala na ntaami bla epele ma oka opeende.} ntini e bo ma baani odza ni. 39 Ŋa Nkumu oduhi na Ofarizi ndi: Be letsuka ngula akoɓo bla epele, ŋa ntsa etima e be, be ndzala kuɓa, bla maami obi. 40 Be baari a ntsimi kali! Ndzyami osi ngula ndzi, nde se aka sa ntsa kari ni? 41 Lempa anga omvumɓu biiɓi e be leli na dzo ntsa akoɓo bla epele, ŋa maami aso aka tse tse o be.

42 «Ŋa ndoho eka na be Afarizi, obila be lempaha Ndzyami buhu le okuumi le efuuma mva dzira ^{▼▼Dzira mpili e bo ma Azife otwolo o maante.} na efuuma ekema ma eli o swaha na ma anguunu a be. Ŋa be lebisi oka tele bla abuha, be i dya Ndzyami ni. Kaa be lesi vwa, ongula ŋa be i ma limaha maamo ni. 43 Ŋa ndoho eka na be Afarizi! Be ndzala okaha o ntsi ma ebiri ma levusu ntsa andzo ma avwonoho. Be ndzala awosoho be ma ambuhu. 44 Ŋa ndoho eka na be, be le eli mva amuuma ma ali i mono ni. Baari ma yira o yula mo i yaa ni!»

45 Oyisihi a mbari e Ndzyami omo na Zezi ndi: «E Nkumu, ntini e we awoɓo vwa, we atuha bisi se!» 46 Zezi okaali ndi: «Ndoho eka na be se ayisihi a mbari e Ndzyami! Obila be leduha baari obira elemi e kuna, ŋa be anku i tiila si ma olyemi ni. 47 Ndoho eka na be! Ma obila o be letuuŋa amuuma ma awoɓi a mbari e Ndzyami, ni ma bumi bo ankaha a be! 48 Ma osuumbu dzwa be le siisa enwa o maami ma ankaha a be ma asi. Ma oma bo ma buma awoɓi a mbari e Ndzyami, ŋa be letwa amuuma! 49 Dzya biri e Ndzyami o ntsa ntsimi e nde oduhi ndi: Me edze otuma bo awoɓi a mbari e Ndzyami bla antuma. Bo ma adze obuma ake, aswesehe maamo. 50 Ŋa ma adze opisa ndzuɓu e loɓi dzi, tohi awoɓi a mbari e Ndziami etsoli ma asi baana osuumba osi. 51 Ma obaana o tohi Abele, tii tohi e Zakari ma abumi ma lebuhu le ndzo e Ndzyami, o mpaniŋi e nkiina bla nkwomo. Me eduha be Ndzyami adze oliisa ndzuɓu e loɓi o maami maa aso!

52 Ndoho eka na be ayisihi a mbari e Ndzyami! Ma obila o be lema biinda ndzila ma odze mpili e Ndzyami. Be anku leka nyuniha ni. Be se lema kanaha baari ma dii onyunuha.»

53 Ntini e Zezi atsuuhi o ndzo dzya, ayisihi a mbari e Ndzyami bla Afarizi abiri nkala yo mini, alehi nde eduhu kuna. 54 Bo ma lehe nde eyere, ma osaha ndi dzaa e mbi etsuuha ma onywa a nde.