Luk 12 | MdtSC | STEP | O ntini dzya, lemvuuru le kuna ledzenihi Zezi. Bo ma dzaraha nyiili ma abuha. Zezi obaani owoɓo na alwoni ndi: «Be lesi ayiɓa ma leviire le Afarizi, lo oma kaha ompyele o bo.

Luke 12

Baari ma yalaha Zezi

1 O ntini dzya, lemvuuru le kuna ledzenihi Zezi. Bo ma dzaraha nyiili ma abuha. Zezi obaani owoɓo na alwoni ndi: «Be lesi ayiɓa ma leviire ^{▼▼Leviire kiila ma lehe o fariini ma okuusa lo, ntini ma sa mpeembe.} le Afarizi, lo oma kaha ompyele o bo. 2 Maami a ma adzisihi aso ma adze otsuuha, a ma adzisihi aso se ma adze oyaa. 3 Kya obila eli maami aso a be le edze oduha ntsa lempiiɓi, ma adze oyuha na mui. A be le edze oduha ma awawa otsui le buha ntsa otini o ndzo, ma adze otsuuha o mwa mpuhu.»

Mvuuru ma abuuna onyiima

4 Me eduha be ma andihi a me, lekaa monoho vwoho o baari ma bumaha akabi ni. Ongula ŋa bo i buuna osa dzaa nkema ni. 5 Me eduha be, mvuuru a be lebuuna onyiima Ndzyami. Nde na mpari ma otuma be ntsa biri ampasi, ngula leku. Ee me eduha be, nde mvuuru a be lebuuna onyiima!

6 «Ma buuna otehe baana ma anyui ataani ma adoro vwele? Okoroho Ndzyami i limiha si omo ni. 7 Na mfu eli ma etsui e be, ama tala yo. Lekaa monoho vwoho ni, be levuli baana ma anyui a kuna mvunu!»

8 «Me eduha be: mpini mvuuru adze oyalaha me o miisi a baari, Mwana Mvuuru se adze oyalaha nde o miisi ma abaandzi a Ndzyami. 9 Ŋa mvuuru abisa me o miisi a baari, Mwana mvuuru se adze obisa nde o miisi ma abaandzi a Ndzyami. 10 Mvuuru owoɓo mbari e mbi o Mwana mvuuru, ma adze oboloho nde. Ŋa atuha Oduduma Santi ma aka adze oboloho nde ni. 11 Ntini ma adze obira be ntsa andzo ma avwonoho ma opama be, o miisi ma ankumu na ankani, be lekaa monoho vwoho mo mbari e be le edze owoɓo na a be le edze oduha ni. 12 Obila Oduduma Santi adze oyisiha be o ŋiŋa dzaa e be le edze oduha.»

Zezi aduha ntsintsami e balaha eli na ndzala osolo

13 Mvuuru omo o ntsa lemvuuru na Zezi ndi: «E Nkumu, duha na okulu a me okaɓa wanda e saande.» 14 Zezi okaali nde ndi: «Ama tsuusa me ŋa ma opama maami na le kaɓa la osolo a be na?» 15 Emana nde oduhi na bo ndi: «Be lesi ayiɓa! Leka syaha ndzala biiɓi kuna ni. Lebihi le mvuuru ka mvuuha ni, si nde avula osolo.»

16 Nde oti bo ntsintsami ndi: «Balaha mo e nga osolo evuusi biila kuna ma anguunu a nde. 17 Nde atsimiha ntsa otima ndi: “Me osa buni? Me biri otsuusa biila kali?” 18 Ŋa nde ndi: “Me yaa osuumbu a me esa. Me tsala etala, me tuha ma evuli onini. Ŋa me lehe mburu ^{▼▼Mburu oma kaha ble ma syaha fariini bla lempeembe.} e me eso, na biiɓi e me ekema. 19 Ŋa me eduha na Oduduma a me mbri we na mvuuha kuna, ma esiɓi kuna. Wuuma, dza, nywa, swere.” 20 Ŋa Ndzyami na nde ndi: “We odzili! Ma lempiiɓi le loɓi li me eyaha owuru a we. Ŋa eso e we ama yeese ma etala, asiila na dzo na?”» 21 Zezi oluusi ndi: «Mono maami ma aya o mvuuru asaha osolo a nde anku, nde osolo o miisi a Ndzyami kali.»

Lelehe tari o Ndzyami

22 Emana Zezi oduhi na alwoni a nde ndi: «Dzya biri e me eduha be mbri, be leka monoho ongwo ma lebihi le be, na kiila o be ledza, bla amfa ma olaasa ni. 23 Obila lebihi levuli biila, ŋa nyuru evuli amfa. 24 Lekeese enkwaŋa, dzo i kuna ni, dzo i kyele mburu ni, okoroho Ndzyami abunuŋa dzo. Be levuli anyui mvunu. 25 O mpanihi e be abuuna oluusa etsuhu ntsa lebihi le nde obila ma ongwo na? 26 Yuhu be i buuna osa maami ma akyehe ni, ŋa be lemonoho ongwo o maami maamo buni? 27 Lemono mva ekulaha wula efuuma ma anguunu, yo i dzandza ni, i twa amfa ni. Okoroho me eduha be ntini e nkani Salomon aki na osolo a nde aso, nde aka laasa amfa ma awali ma vuli wula si mo ni. 28 Ndzyami alaasa efuuma ma anguunu loɓi ma adze otsuha osuuha, ŋa nkusa na be? Be oyalihi ntseeri! 29 Ŋa be i ma saha kiila o be le edze odza na onywa ni, be i ma mono ongwo ni. 30 Bya eso osahi dzo antini aso, baari a yula ntsye ma ali i yaa Ndzyami ni. Ŋa taara a be oyaa ndi be na kaama. 31 Lesa saha Onkumu o Ndzyami o yula be, ŋa ma emo oma luusa be lembisa.»

32 «Be leka monoho vwoho ni, dziimi le ekyehe. Obila taara a be amono ove ma ompa be eve ma Onkani o nde. 33 Letehe biiɓi ma eli na be, lempa anga omvumɓu adoro. Lesaha osolo a mbumbu, osolo oli i wa o yulu ni. Mpili eli odziɓi i tsiina ni, antsyeri i dza ni. 34 Ŋa biri eli osolo a be, biri edze oka etima e be.»

Adzandzi ma amoho

35 Leka ma amfa a dzandza, be lekyele abaami ma mbaa a be aka ma onama. 36 Be leki mva adzandzi ma adela nkumu awa tsinda e baala. Ntini e nde adze oya, na o nde adze okuruha, onaani nde ndzo. 37 Oswere oka na adzandzi ma ali nkumu oya, obasihi bo ma amoho! Sisyele me eduha be, nde adze oselehe amfa, olehe bo o tanda, omana ompa bo biila. 38 Nde oya na avuruha o mwa otima lempiibi, si kali ma etsihi e tsuhu, nde obasihi bo mwo, oswere oka na bo!

39 «Be leyaa mbri: o nga ndzo aki ma oyaa ntini edzyaha odziɓi, kaa nde aka nyila nde onyunihi o ndzo e nde ni. 40 Be se le deli, ma oma Mwana Mvuuru adze oya o ntini e be le eli i yaa ni.»

Odzandzi ali tele na oyeri

41 Pyere na nde ndi: «E Nkumu, we ata ntsintsami dzi ŋa o bisi atu, si o baari aso?» 42 Nkumu okaali na nde ndi: «Dzwa odzandzi ali tele na oyeri a nkumu ama tsuusa ma okyele ndzo na lempa la abuha biila antini aso na? 43 Oswere oka na odzandzi ali nkumu oya na avuruha, nde obasihi nde asa dzandza! 44 Me eduha be sisyele: Nde adze ompa odzandzi onkumu o yula osolo a nde aso. 45 Ŋa odzandzi otswomo na otsimiŋa ntsa otima a nde ndi: “Nkumu a me aka aya paraabu ni”, ŋa nde oya abeere adzandzi maamo, ma abalaha na ma akaasi. Nde odzi, onyui, okoli. 46 Ŋa nkumu odzandzi dzwa adze oya o tsuhu na tari e nde ali i yaa ni. Nkumu adze otsuura nde na leliisa le nde, mva baari ma ali ka tele ni. 47 Ŋa odzandzi adzyaɓi ediŋii e nkumu a nde, omana nde i ma sa mva e nkumu adii ni, mbaa nkumu adze obeere nde ekatsi e kuna. 48 Ŋa odzandzi ali i yaa ediŋii e nkumu ni, asa maami ma abi, ma adze obeere nde ekatsi ntseeri. Ma adze opisa kuna na mvuuru ma ama mpa kuna. Ma ama ampa kuna, ma adze oselehe opisa nde kuna.»

Zezi ndi baari ma adze obaha abuha o nde

49 «Me eyi na mbaa o yula ntsye. Me ndzala yo enama! 50 Ove me yahi ateeme ^{▼▼Ateeme kuuni oma kaha ampasi a Zezi aya omono.}, ongwo osa me yuhu me kini yaha mo ni. 51 Be letsima mbri me eyi ŋa na ampa oduusu o yula ntsye? Kali, me eduha be me eyi na ombayi. 52 Ŋa ma obaana o loɓi baari ataani o ndzo ma baha abuha. Atari ma dzwana na vwele, vwele ma dzwana na atari. 53 Taara abele mwana a balaha, mwana a balaha abele taara, nguhu abele mwana okaasi, mwana okaasi abele nguhu, nguhu olumi abele okari a mwana, okari a mwana abele nguhu olumi.»

Ove leyaa andiimi a Ndzyami

54 Nde aselehe oduha na lemvuuru ndi: «Ntini e be lemono yulu emipiina mpili e tari evwaha, be mbri: “Mvula loɓi anoho”, nde se onohi. 55 Ntini e be lemono pyeɓi ewa na mbere eya na ntaana, be leduhi mbri: “Loɓi na ndzuusi”, yo se eyi. 56 Be anga ompyele! Be leyaa maami ma yira o yulu bla ntsye, ŋa ma yira ma antini ma, be i yaa ni?»

57 «Be i paama be anku osuumbu osa maami a tele ni? 58 Ntini e mvuuru abanaŋa we, omana be leyeni ososo, ove be leyeesi o ndzila, ma oduma be oto kwa, opami oma mpa we na oworo, olehe we ongeneŋe. 59 Me eduha we, we i buuna otsuuha ma ongeneŋe yuhu we kini wura obiimi ^{▼▼O ŋa le wura le obiimi tii doro okyehe.} oso ni.»