Luk 13 | MdtSC | STEP | O ntini dzya baari ayi na aduha nde dzaa asi Ngalili, eli Pilaate ovusihi tohi le bo bla avwoŋi atumi obuma asi Galili, ntini e bo ma mpihi Ndzyami avwoŋi.

Luke 13

Lekaala le eku

1 O ntini dzya baari ayi na aduha nde dzaa asi Ngalili, eli Pilaate ovusihi tohi le bo bla avwoŋi ^{▼▼Like obari otari, nde nkumu a Zide.} atumi obuma asi Galili, ntini e bo ma mpihi Ndzyami avwoŋi. 2 Zezi okaali na bo ndi: «Be letsimiŋa mbri asi Ngalili ma bumi ma osuumbu dzwa, aki avuli asi Ngalili maamo ambiini osa? 3 Kali, me eduha be, ŋa be obisa okaala eku, be le edze okwa be aso mva bo. 4 Ŋa baari a kuumi na mfwomo ma akui o ntsulu e Silowe ^{▼▼Silowe, biri eli mbere onguundu o Zerizaleme. Eki na ntsulu okeri ama kuusa obaga enini.}, o ntini obaa owunihi, be letsimiha mbri bo aki avuli asi Zerizaleme maamo ambiini osa? 5 Kali, me eduha be, be obisa okaala eku, be ledze okwa be aso mva bo.»

Ntsintsami oti ali i mpa mburu ni

6 Ŋa Zezi oti bo ntsintsami ndi: «Balaha mo aki na oti a nkuumi figye ^{▼▼Figye oti ma kuniga mpili a Azife. Mburu ewwana omboloho.} ntsa nguunu e viinye ^{▼▼Viinye oti ampaha mburu e nkuumi reze, ma syaga mali a ba.}. Nde oyeni na atolo mburu o figye, nde aka baha ni. 7 Ŋa nde na odzandzi a viinye ndi: “Mono esiɓi eya etari e me eya na otolo mburu, me i baha ni. Ceɓe oti a figye yu! Na kiila o nde asyaha o yula ntsye ŋa onyaŋa!” 8 Ŋa odzandzi a viinye okaali na nde ndi: “Nkumu sa nyila nde osiɓi ki, me tsima ntsina nde me lehe ewuru. 9 Leke osiɓi o vusu nde ampa mburu. Nde obisa ompa we ceɓi nde.”»

Zezi osalihi okaasi oleme, o tsuhu ma awuumaha

10 Zezi aki ayisiha ntsa ndzo ma avwonoho o tsuhu ma awuumaha. 11 Okaasi omo aki na odidima obi, oma mpa nde onkoro esiɓi kuumi na mfwomo. Nde i buuna osiiha oki tele ni. 12 Zezi omono okaasi dzwa, otswoli nde, na nde ndi: «We omi wuuma ma oleme o we.» 13 Nde olehi dzyala o yula nde. O ntsi na ntsi ŋa, nde osihi oya tele. Oya akuusa lekuma le Ndzyami. 14 Ŋa nkumu a ndzo ma avwonoho obye nkala, ma obila o Zezi asalihi mvuuru o tsuhu ma awuumaha. Nde na lemvuuru ndi: «Etsuhu e dzandza esyami, bya etsuhu ma salaha baari. Le eya, asalaha be ma etsuhu bya, ka o tsuhu ma awuumaŋa ni!» 15 Nkumu okaali na nde ndi: «Be na ompyele! Be leka nanaha ngoombo si kali aane o tsuhu ma awuumaha ^{▼▼Ntsa osangumu o Like ama teende aane. Nyama a baari ma kumaha o yula nde ma odzye, na le tehe la andza.} lempi bo andza ni? 16 Ŋa okaasi yu mwana Abraame. Dzabri aki ama kura nde endi esiɓi kuumi na mfwomo, aki i buuna onaana nde endi o tsuhu ma awuumaha ni?» 17 Ntini e nde awoɓihi abuha ma ombangu amoni okru, ŋa lemvuuru leso leki leswere, o maami ma ave a nde asihi.

Ntsintsami leviire

18 Zezi ndi: «Onkani o Ndzyami owwana oma? Me oyelehe bo bla oma? 19 Onkani o Ndzyami mva lemburu le otaade ^{▼▼Ma lefaala mutaade, nkuumi e mo seneve. Lemburu le nde ntseeri, okuna nde, nde okirihi oti onini. Ma dzyaha nde se o ntsa biila.}, le mvuuru akunaha ntsa nguunu e nde. Lekuli, lekirihi oti. Anyui atswi andzo o yulu entaha e nde.»

20 Nde ovurihi oduhi ndi: «Me oyelehe Onkani o Ndzyami bla oma? 21 Bo mva leviire le okaasi ayaha, ovusihi bla fariini a kuna ^{▼▼Ekuumi dzyele na akilo ataani a fariini.}, dzo eso ekumi.»

Osuumbu ma onyunuha ntsa Onkani o Ndzyami

22 Zezi ayirihi ma enguundu na ampuhu na oyisaha. Nde ayenihi mpili onguundu o Zerizaleme. 23 Mvuuru opisi nde ndi: «Ee Nkumu, baari ma adze ovuuha ma adze oka ntseeri?» Zezi okaali bo ndi: 24 «Lesa mpari ma onyunuha, ma onywa a ndzo okyehe. Me eduha be, kuna ma adze osaha onyunuha, ŋa ma aka adze obuuna ni.

25 Ŋa ntini e nkumu a ndzo adze otemehe, obiinda odiɓihi, be osiila o ndzi, be lebaana okuruha ndzo ma oduha ndi: “Nkumu, naana bisi,” ŋa nde adze okaala na be ndi: “Be asi kuni?” 26 Ŋa be le edze oduha nde mbri: “Bisi lema adza, lema anywa bla we. We ama yisiha ntsa ewoombo ema enguundu e bisi.” 27 Ŋa nde ovuriha okaala be ndi: “Be asi kuni? Letsyehe o paani e me, be aso lesyaha maami ma abi!” 28 Be ledze oka ma olili ledza mii, o ntini e be ledze omono Abraame bla Izaake na Zakobe, na awoɓi a mbari e Ndzyami aso ntsa Onkani o Ndzyami. Ŋa be, atuna o ndzi! 29 Ŋa baari ma adze owa na mpili e tari etemehe, na mpili e yo evwaha, na ntaana bla mbere. Bo ma adze oyaha biri o tanda, ntsa Onkani o Ndzyami. 30 Ŋa mo vwa, ma ali lembisa ma adze oka levusu, ma ali levusu ma adze oka lembisa.»

Zezi aselehe odze na mpili e Zerizaleme

31 O ŋiŋa Afarizi ake atsiini mpili e Zezi ndi: «Tsyehe o ŋa, dze la, Erode Atipaase asaha obuma we.» 32 Zezi oduhi na bo ndi: «Ledze na aduha na obahi dzwa mbri: “Me etsuura edidima ma ebi, me esalaha baari, na loɓi na osuuha, ŋa mbisa osuuha ^{▼▼Ntsa osangumu o Like, mbisa osuuga oma kaha tsuhu o tari: ntsomi tsuhu e nde akwa o Zerizaleme. Si kali tsuhu o tari e nde aya onyusaha.} me mana dzandza e me.” 33 Ŋa ove me yeni na vusu, na loɓi na osuuha, na tsuhu nkema. Ma oma owoɓi a mbari e Ndzyami i kwa la na Zerizaleme ni.»

34 «Zerizaleme, Zerizaleme, we abumaŋa awoɓi a mbari e Ndzyami. We abuma ma akele a Ndzyami atumi we. Antini kuna me ema dya okusaha baana a we, mva okari a ntsusu akusaha baana ma ntsusu ntsina apaaɓi a nde, ŋa be leka adya ni! 35 Ŋa ma adze osuɓa ndzo e be kalihi. Ŋa me eduha be, be leka adze omono me ni, tii ngo ntini e be ledze oduha mbri: “Andosoho aka na mvuuru aya o nkuumi e Nkumu!”»