Luk 14 | MdtSC | STEP | Tsuhu ma awuumaha mo, Zezi oyeni na adza biila mpili e nkumu Afarizi omo. Baari ma aki ŋa ma keese nde.

Luke 14

Zezi asalaha obyeri o tsuhu ma awuumaha

1 Tsuhu ma awuumaha mo, Zezi oyeni na adza biila mpili e nkumu Afarizi omo. Baari ma aki ŋa ma keese nde. 2 Ŋa balaha mo eki na ngaa ebiimaha nyuru. Nde aki o vusu o Zezi. 3 Zezi oyahi mbari, na ayisihi ma angri bla Afarizi ndi: «Ma buuna osalaha obyeri o tsuhu ma awuumaha, si kali?» 4 Bo aya pi. Ŋa Zezi oyahi obyeri, osalihi, onyili nde oyeni. 5 Emana nde na bo ndi: «O mpanihi e be ali na mwana si kali ngoombo a nde ova ntsa terihi, abisa otusaha nde asisari o tsuhu ma awuumaha ni na?» 6 Bo aka buuna oyalaha ni.

Zezi atiɓa baari ma oswoloho ebiri ma lembisa

7 Zezi ama mono ndi baari ma dzyaha ma atsinda oswoloho ebiri ma levusu. Ŋa nde oti bo ntsintsami ndi: 8 «Ntini e mvuuru atwolo we o tsinda e baala, we kaa kaha levusu ni. Ma oma, leke onga tsinda ama twolo mvuuru okema avuli we okiimi, 9 ŋa ntini onga tsinda atswoli be aso a vwele, oya na aduha na we ndi: “Yisa nde biri”, we ama temehe ma odze biri e mbisa ŋa na okru oso. 10 Ŋa ntini ma twolo we o tsinda, dzyehe na aka obiri lembisa, onga tsinda oma ya oduhi na we ndi: “E ndihi a me, dzyaha na aka levusu.” O ŋa we omoni okiimi o mwa baari ma ali bla we o tanda. 11 Obila, ntini e mvuuru akuusa nyuru nde anku, avuuri nde ntsi, ŋa mvuuru avuriha ntsi, akuusi nde.»

Zezi atiɓa ma ompa anga omvuɓu

12 Nde se oduhi na mvuuru atwoli nde ndi: «Ntini e we atwolo baari ma odza, ka atwoloho andihi na baana ma anguhu, na nkwono e we, na anga osolo ma ali o paani e we ni. Caaki bo se atwoli we na adza, bo avuuri we ma lemihi le we ampi bo. 13 Ŋa ntini e we asa tsinda, twolo anga omvuɓu na ebuka, na eleme na baari ma ali i mono ni. 14 Ŋa we adze omono ove obila bo kiila ma buuna ovuura we onyaŋa. Ndzyami adze ovuura we o tsuhu akwi a tele ma adze onyusiha.»

Ntsintsami e tsinda e nini

15 Mvuuru omo aki o tanda oyuha vwa na Zezi ndi: «Ove oka na mvuuru adze odza biila ntsa Onkani o Ndzyami!» 16 Zezi oti bo ntsintsami dzi ndi: «Balaha mo ekusihi tsinda e nini, otswoli baari kuna. 17 Ntini odza eto, otumi odzandzi a nde na aduha baari a nde atwoli ndi: “Ŋa ledzyaha ntini emi to.” 18 Ŋa bo aso, omo na omo, apisi kolo kolo. A ntsomi ndi: “Me kini ma osuuma nguunu, ove me yeni na amono yo. Boloho me.” 19 Omo ndi: “Me kini ma osuuma angoombo kuumi, me edze na keese bo. Kolo kolo e we boloho me.” 20 Okema ndi: “Me kini esi baala, kya obila o me eli i buuna oya ni.” 21 Odzandzi oya na avuruha na e nkumu, oduhi nde maami maa aso a baari baa ma kaali. Ŋa nga ndzo obye nkala, na odzandzi ndi: “Dzyehe asisari ma ambungu na ewoombo bla enguundu, we oya na anga omvuɓu, ebuka, baari ma ali i mono ni, bla eleme.” 22 Emana ŋa odzandzi oyi na aduha ndi: “E Nkumu, aso a we aduhi me emi sa, ŋa ebiri ekini.” 23 Nkumu na odzandzi ndi: “Dzyehe ma andzila ma anguunu, mpa bo okura bo aya, ove ndzo e me eluuli. 24 Ŋa me eduha be o ntsa baari a me eki ema tswolo, si omo aka adze odza biila e me ni.”»

Lemihi la olwono Zezi

25 Lemvuuru le kuna leki lelaana bla Zezi, nde okalihi mpili e bo ndi: 26 «Mvuuru aya na e me ove nde odii me. Ŋa dya le nde o me, ove levuli le ema taara a nde, nguhu a nde, okari a nde, baana a nde. Akulu bla barihi a nde, ankeri a nde, na lebihi le nde anku. Nde yuhu i sa vwa ni, nde i buuna oka olwoni a me ni. 27 Mvuuru abisa obira lembandzi ^{▼▼Kuri oma kaha le yalaha la ampasi na leku, o nkuumi e Zezi.} e nde, oturi me, i buuna oka olwoni a me ni. 28 O mpanihi e be dzwa mvuuru asaha otwa ndzo, nde i sa ka o ntsi, otali adoro ma omono yuhu nde abuuna omana yo ni na? 29 Ma oduma nde yuhu omi baana otwa, nde okwoni, baari aso ma aya omono yo aseɓi nde. 30 Bo ma adze oduha ndi: “Lemono mvuuru ama baana otwa ndzo, nde aka buuna omana ni!”

31 Dzwa nkani adze na adzwana eta bla nkani okema, i saa ka o ntsi ma omono yuhu nde abuuna bla okuumi aworo omo, odzwana na ali na ekuumi ma aworo dzyele ni na? 32 Nde omono ndi nde i buuna ni, nde otumi antuma o ntini e buha akini la, ma osaha oduusu. 33 Ma osuumbu dzwa, mvuuru o mpanihi e be abisa osuɓa biiɓi e nde eso kalihi, i buuna oka olwoni a me ni.»

Mpye ongwa

34 «Ongwa kiila ove, ŋa ongwa oyele mpye we ovuura yo buni? 35 Nde oya ove mo ntsye na ewuru kali, atuni nde o ndzi. Ali na atsui ma oyuha, oyuhi!»