Luk 15 | MdtSC | STEP | Atoniŋi ma lepo bla anga ambiini, atsiini mpili e Zezi na yuha nde.

Luke 15

Zezi ayamba anga ambiini

1 Atoniŋi ma lepo bla anga ambiini, atsiini mpili e Zezi na yuha nde. 2 Afarizi bla ayisihi a mbari e Ndzyami aya ma woɓo o mpanihi e bo ndi: «Lemono mvuuru yu ayamba anga ambiini. Nde adza bla bo!» 3 Ŋa Zezi oti bo ntsintsami ndi: 4 «O mpanihi e be mvuuru omo otu oka na ekuumi kuumi ma endoombo. Omana ondoombo omo otu onywoŋi. Nde aka sa nyila endoombo ma ekuumi wa na endoombo wa ntsa ntsehe, ma odze na saha ondoombo enywoŋi tii ngo e nde aswolo tso ni? 5 Nde oswolo tso, nde osweri, osaari, olehi o yula aduu, 6 oyeni ndzo e nde. Nde otswoli andihi bla baari a paani ndi: “Ledza saabe letsaɓa ma oma, me emi swolo ondoombo oki oma nywoŋo!” 7 Ŋa me eduha be oswere edze oka o yulu mo nga ambiini omo otu, akaala lebihi le nde, evula ekuumi wa na baari wa, ma ali tele, bo kaama ma okaala lebihi le bo kali.»

Doro a nkoso a mvunu anywoŋi ami swolo

8 «Si kali dzwa okaasi ali na adoro a nkoso ^{▼▼Mpili a Greeke na asi Rome eki doro ma atwologo o drasme bla denye: wura e dzandza odziila omo.} a mvunu, kuumi. Ŋa doro omo onywoŋo nde i sa naasa lapi, okwomi ndzo, osahi yemihi, tii ngo e nde aswolo ni na? 9 Ntini e nde aswolo, nde otswoli andihi bla akaasi a paani, nde oduhi bo ndi: “Leswere bla me, obila me emi swolo doro a nkoso aki ama nywoho!” 10 Ŋa me eduha be, oswere oli na abaandzi a Ndzyami ma onga ambiini omo otu akaala lebihi le nde.»

Ntsintsami e mwana anywoŋi

11 Nde ovurihi oduhi ndi: «Balaha mo eki na baana ma abalaha vwele. 12 Mwarihi na taara ndi: “E taara mpa o me obari o wanda.” Taara se okaɓi osolo o mpanihi e baana a vwele. 13 Etsuhu eyira, mwarihi otonihi e nde eso, otehi ma obaha adoro. Oyeni osi ola, ma osa lebihi lo otsa otsa. 14 Ntini e nde amani okaɓa adoro aso, ndzala e nini evi ma osi kya, emana nde oya o ntsa kaama. 15 Nde oyeni na adzandza mpili e mvuuru omo ama osi kya. Otumi nde ntsa anguunu a nde na akyele enguu. 16 Nde aki na ndzala odza mburu e karube, ^{▼▼Karube mva mburu oyanda.} biila ma edzihi enguu, ŋa mvuuru aka mpa nde ni.

17 Nde oya atsimiha ndi: “Mpili e taara a me adzandzi aso na biila ema vula bo, ŋa kuuni me ekwa o ndzala! 18 Me edze mpili e taara a me. Me eduha nde mbri: E taara me emasa mbiini o miisi a we bla a yulu. 19 I ma buuna otswolo me o mwana we ni. Yaha me mva odzandzi a we.” 20 Nde oyeni mpili e taara.

Nde oki okini la, taara otaali nde, omoni nde nkerihi, odumi ntsini na ayamba nde, ompi nde amfemfe. 21 Mwana na nde ndi: “E taara, me ema sa mbiini o miisi a we bla yulu. I ma buuna otswolo me o mwana we ni.” 22 Ŋa taara na adzandzi a nde ndi: “Lesa asisari, leya na nde oringa ove, lelaasa nde yo. Lelehe nde nkwere ma olyemi, na akoroho o ntaami. 23 Leya na mwana ngoombo ali na maari be lebuma, ledza, leswere, 24 obila mwana a me yu oki oma kwa, omi nyusuha, nde se aki omi nywoŋo, nde omi swoho.” Bo aya ma sa tsinda.

25 Ŋa mwana okuuru aki ntsa anguunu. Ntini e nde ayi na vuruha, nde otsiina tuha na ndzo, oyuhi angwomi bla akini. 26 Nde otswoli odzandzi omo, opisi nde ndi tso kwa oma. 27 Odzandzi okaali na nde ndi: “Mwarihi a we omi ya na avuruha. Taara a we ama buma mwana ngoombo ali na maari, obila nde omi ya na avuriha yemihi.” 28 Ŋa okulu obye nkala, nde aki ndzala onyunuha o ndzo kali. Taara a nde otsuuhi na avwono nde ma onyunuha o ndzo. 29 Ŋa nde okaali na taara nde ndi: “Me emi dzandza bla we esiɓi kuna, me ekini onyura angri a we ni. We kini ompa me si mwana ondoombo omo, mo obu mbri me sa tsinda bla andihi a me ni. 30 Ŋa ntini e mwana a we a balaha yu ayi, nde adzi osolo a we bla akaasi, we omi buma nde mwana ngoombo ali na maari!” 31 Taara na nde ndi: “Mwana a me, we oli bla me antini aso, biiɓi e me eso, e we. 32 Ŋa ove eki, saabe lesi tsinda, lesweri obila mwarihi a we yu oki oma kwa, nde oli mwo, nde oki omi nywoho, lemi swolo!”»