Luke 16
Ntsintsami odzandzi ambalaha
1Zezi oduhi na alwoni a nde se ndi: «Balaha mo eli na osolo, eki na odzandzi. Abaniŋi odzandzi ndi nde adziɓiha biiɓi e nkumu. 2Nkumu otswoli nde, opisi nde ndi: “Maami a me eyuha o we ma buni? Duha osuumbu a we akyelehe biiɓi e me, ŋa we se aka ma kyele dzo ni.” 3Odzandzi owoɓi nde anku ndi: “Me oma sa ŋa buni, nkumu oya ndzala ndi me kyele biiɓi e nde kali? Letsima le ntsye? Me mpari kali. Me na okru o mpahi. 4Aa! Me eyaa kiila o me esa o ntini e nde atsyese me mbumbu, me saha baari ma adze oyamba me ma andzo a bo!” 5Nde otswoli baari ma bihi biiɓi e nkumu a nde omo na omo. Nde na a ntsomi ndi: “We ama biha na nkumu a me kwe?” 6Nde okaali ndi: “Ambiina a maari ekuumi kuumi.” Odzandzi ndi: “Mono osaangumu, ka o ntsi teende ekuumi etaani.” 7Emana nde oduhi na okema ndi: “Ŋa we abihi kwe?” Dzwa okaali ndi: “Ekuumi ma angara kuumi e mburu.” Odzandzi na nde ndi: “Mono osaangumu, teende ekuumi mfwomo.” 8Ŋa nkumu odzuusi odzandzi obi ma obila o nde ayeesi maami. Baari ama antini ma avuli abuha a bla bo ambalaha, nkusa na baari ma ali ntsa oyalala.»Ndzyami bla Adoro
9Zezi oluusi ndi: «Ŋa me eduha be, lesa leve na andihi a be bla osolo obi oma yula ntsye dzi. Tsuhu osolo ewa Ndzyami adze oyamba be ma ebiri e mbumbu. 10Mvuuru ma lehe lila o nde o maami ma akyehe, ma buuna se olehe lila o nde o maami ma anini. Mvuuru ali obi o maami ma akyehe, abuuna se oka obi o maami ma anini. 11Yuhu be le li tele ma osolo obi a yula ntsye, adze ompa be osolo a dzaa dzaa na? 12Yuhu be leka aka tele bla biiɓi e mvuuru ni, adze ompa be, e be anku na? 13Odzandzi i buuna odzandza ma ankumu vwele ni, nde adze obele omo nde odii omo, si kali nde oka bla omo, obeli omo. Be i buuna odzandza o Ndzyami omana be leki ayiha ma Adoro ▼▼Ntsa osangumu o Like ama teende Mamon, osolo o baari ma avwonoho, ndzyami otsa.
ni.» Angri bla Onkani o Ndzyami
14Afarizi anga ndzala adoro, ma yuha mbari e nde awoɓihi eso, bo ma seɓe Zezi. 15Zezi na bo ndi: «O miisi a baari be lelaha mbri be tele, ŋa Ndzyami oyaa etima e be. Obila kiila o baari ma mono o mpanihi e bo ndi kiila enini, o miisi a Ndzyami obi bo mini. 16Antini ma angri a Moyize bla awoɓi a mbari e Ndzyami asyeli o Zan Batise. Ŋa ma si baana o Zan Batise, Ntsya e Mve Onkani o Ndzyami ami tooso yo, mvuuru na mvuuru osi mpari ma onyunuha ntsa onkani o Ndzyami. 17Yulu bla ntsye ma adze oyira syami kali, ŋa angri a Ndzyami si mpri mo ma adze otsyese kali. 18Balaha etsuura okari a nde ma oyaha okema, nde asi ntsuuma. Eyaha okaasi olumi ama tsuura, ntsuuma nde se asyaha.»Ntsintsami e nga osolo bla Lazaare
19«Mvuuru omo aki nga osolo olaasaha amfa a mvunu, etsuhu eso nde osyaha atsinda. 20Onga omvuɓu ma atswolihi o Lazaare, akihi o tolo ma onywa a ndzo a nde, ŋa nyuru ampura. 21Nde aki ndzala nde odzi odzurihi mo biila me evwaha o tanda e nga osolo, ŋa ongula amva alyeŋe nde ampura. 22Nga omvuɓu okui, abaandzi abiri nde mpili Abraame. Nga osolo se okui, adzihi nde. 23O mpili akwi aki ma swesehe nga osolo. Nde osaara miisi, otaali Abraame, Lazaare oli o paani e nde. 24Nde owuli ankima ndi: “Abraame, taara a me, mono me nkerihi! Tuma Lazaare otuɓa ntswo olyemi a nde ma andza olehe me o yula lempele, obila me emono ampasi kuna ntsa mbaa.” 25Ŋa Abraame okaali ndi: “Mwana a me yiɓiha eve e we abahi ntsa lebihi le we, ŋa Lazaare abahi ndoho. Ŋa paraabu nde ma akooso, ŋa we amono ampasi. 26Ongoula ŋa, mpanihi e be bla bisi mbye e nini, baari ma saha o tsyehe kuuni ma oya kwa i buuna ni, ma saha otsyehe kwa ma oya kuuni se i buuna ni.” 27Nga osolo ndi: “Ŋa kolo kolo e we taara, tuma Lazaare ndzo e taara a me. 28Obila me na barihi ataani. Nde oma dzyese bo, bo se i ma ya o biri ampasi dzi ni.” 29Abraame okaali ndi: “Bo na Moyize bla awoɓi a mbari e Ndzyami ma odzyese bo, bo ayuha bo!” 30Nde ndi: “Kali Abraame taara, yuhu mvuuru awa mpili akui ma odze mpili e bo, bo akaala eku.” 31Abraame na nde ndi: “Bo abisa oyuha Moyize bla awoɓi a mbari e Ndzyami, si na mvuuru onyusaha mpili akui, ma odze mpili e bo, bo ma aka yalaha ni.»
Copyright information for
MdtSC