Luke 17

Mbiini bla leboloho

1Zezi na alwoni a nde ndi: «Maami ma atuma baari osa ambiini ma aka adze oyele ni, ŋa ndoho eka na mvuuru aya na mo. 2Tata akuri nde kele e nini o nkii, atuni nde ntsa okeri onini. Ŋa nde i ma buuna otuma mwana onkere se omo osa ambiini ni. 3Lesa ayiɓa! Mwana nguhu a we osa mbiini, we owoɓi na nde yemihi. Ŋa nde okaala eku we obolihi nde. 4Ŋa nde osoŋo we amihi ntsaami ma odziila a mwi omo, nde se oya na aviriha amihi ntsaami mpili e we ndi: “Me emi mono obi”, we se obolihi nde.»

Mpari oyalihi

5Antuma na Nkumu ndi: «Luusa bisi oyalihi.» 6Ŋa Nkumu okaali na bo ndi: «Be leki ma oka na oyalihi oli na okyehe mva lemburu le otaade, kaa be lebuuna oduha na oti a sikomoore ▼

▼Oti onini mva oyabi.

yu mbri: “Wunaha, dzyehe na akuna nyuru we anku ntsa okeri”, nde se onyiimi be.»

Alwoni a Zezi adzandzi atu

7«O mpaniŋi e be ali na odzandzi akuniha anguunu si kali akyelehe endoombo, oduha na odzandzi ntini e nde awa anguunu ndi: “Dzyaha asisari na kuma o tanda” na? 8Kali, nde oduha na nde ndi: “Laama me biila, kaala amfa, ma olehe me biila, me edza, me nywa. Omana we se we odza, we nywa, ma a we antini.” 9Nde ŋa ampa odzandzi leve ma osuumbu a nde asi maami a nde aduhi? 10Na be se: ntini e be le esa maami ma aduhi be osa aso, be leduhi mbri: “Bisi adzandzi atu. Bisi lesi ni dzandza ma duhi bisi osa.”»

Zezi asalaha anga ebila kuumi

11Ntini e Zezi ayenihi na Zerizaleme, nde oyiri o mpanihi e Samari bla Ngalili. 12Nde onyunuha ntsa mpuhu mo, anga ebila kuumi ayi na e nde. Bo asyeli o lala. 13Bo asaari dzuhi, na nde ndi: «E Zezi Nkumu, mono bisi nkerihi!» 14Zezi omono bo, na bo ndi: «Ledzyehe na alaha anyuru mpili asi ma avwoŋi.» Ŋa ntini e bo ma ayenihi, bo aki ami mana owuuma. 15Omo o ntsa bo, omono ndi nde omi wuuma, oyi na avuriha, na okuusa lekuma le Ndzyami nkara yulu. 16Nde ovi o ntsina nyiili e Zezi mpaa o ntsye, ompi nde leve. Ŋa balaha dzya eki osi Samari. 17Ŋa Zezi ndi: «Bo aso a kuumi aka wuuma ni? Ŋa maamo a wa, ali kuni? 18Mvuuru si omo aka aya na avuriha na ampa Ndzyami leve ni, ongula ndzya yu otu?» 19Ŋa Zezi na nde ndi: «Temehe, dzyehe, oyalihi o we omi vusuha we.»

Edzihi ma Onkani o Ndzyami

20Afarizi apisi Zezi ndi: «Onkani o Ndzyami ma odze oya o dzini ntini?» Nde okaali bo ndi: «Onkani o Ndzyami ma oka adze oya mva kiila ma mono ni. 21Ma aka adze oduha ndi: “Lemono bo o bu omi ya”, si kali: “Bo oli kuuni” ni. Obila onkani o Ndzyami oli o mpanihi e be.»

Tsuhu le Mwana mvuuru

22Emana Zezi na alwoni ndi: «Antini ma adze oya a be ledya omono Mwana mvuuru se tsuhu le mo, ŋa be leka adze omono nde ni. 23Ma adze oduha be ndi: “Nde ayu ku”, si kali: “Nde ayu ŋa” Be lekaa dzyehe ni, lekaa dema ntsiini ni. 24Obila tsuhu e Mwana mvuuru adze oya, edze oka mva epeŋi e ngari o yulu. Oyalala o nde obaana odzi ntswo oto ntswo e mo. 25Ove Mwana mvuuru osa mono ampasi kuna, ŋa ndzuɓu e loɓi se edze obisa nde. 26Maami ma ayiri o ntini e Nowe, ma adze oka se osuumbu dzu dzwa, mva tsuhu e Mwana mvuuru adze oya. 27Baari aki ma adza, ma anywa, ma yaha akaasi ma abaala, ma mpa baana a bo ma akaasi se ma abaala. Tii ngo o tsuhu e Nowe anyunihi ntsa mbuungu. Oduumbu a mvula onohi, ntuuna eyi, baari akui aso. 28Edze oka se mva ntini e Loote: baari aki ma adza, ma anywa, ma suuma, ma tehe biiɓi, ma kuna, ma twa andzo. 29Ŋa tsuhu e Loote atsuuhi o Sodoome, Ndzyami otumi mvula a mbaa bla owuru a mbaa, ŋa baari aso akui. 30Tsuhu e Mwana mvuuru adze owasaha, maami ma adze oyira ma osuumbu dzu dzwa. 31O tsuhu dzya, mvuuru adze oka o yula ndzo aka ma suruha ma oyaha biiɓi e nde ni. Na adze oka ntsa anguunu se, aka aya na avuriha ndzo ni.» 32Leyiɓiha okari a Lote! 33Mvuuru asaha okyele lebihi le nde, adze oyele lo. Avusaha lebihi le nde, adze okyele lo se. 34«Me eduha be, lempiiɓi lya baari vwele ma adze oka o yula ntari mo, ma ayaha omo, anyila omo. 35Akaasi vwele ma adze oka ma otswa biiɓi, ma atsyese omo, anyila omo. 36Abalaha vwele ma adze oka ntsa nguunu, ma adze obira omo, anyila omo.» 37Alwoni apisi nde ndi: «E Nkumu, maami maa ma adze oyira kuni?» Nde okaali bo ndi: «Biri edze oka obiimi, biri ambila ma adze okusuha abuha.»