Luk 18 | MdtSC | STEP | Zezi oti bo ntsintsami ma oduha bo ndi ove bo avwoni antini aso, bo i kolo ni.

Luke 18

Ntsintsami opami maami obi bla okaasi okuuli

1 Zezi oti bo ntsintsami ma oduha bo ndi ove bo avwoni antini aso, bo i kolo ni. 2 Nde na bo ndi: «Ntsa onguundu omo eki na mvuuru apamaŋa maami. Nde aki i nyiima Ndzyami ni, nde se na mbengili o baari. 3 Ntsa onguundu kya se eki na okaasi okuuli, adzihi mpili e nde ndi: “Pama dzaa e mpanihi e saa na buha le me le ombangu.” 4 Antini ayiri kuna, mvuuru apamaŋa maami aki ndzala kali. Emana nde ndi: “Ŋa si me i nyiima Ndzyami ni, me se na mbengeli o baari, 5 okaasi okuuli yu aweele me, me ema pama dzaa e nde, ma oduma nde i ma bula me otsui antini aso ni.”» 6 Nkumu oluusi ndi: «Ŋa leyuha leduhi opami maami obi yu! 7 Ŋa Ndzyami aka adze osa opami a tele mo baari a nde ama swolo, ma wulaha ankema na e nde, na na mui, na na mpiiɓi ni? Nde adze osa andira ma oyamaha bo? 8 Me eduha be, nde adze opama bo asisari. Ŋa ntini e Mwana mvuuru adze oya na avuruha, nde adze obasaha oyalihi o yula ntsye?»

Ntsintsami Ofarizi bla onga lepo

9 Zezi ovurihi oti bo ntsintsami dzi, mo baari ake ma monihi ndi bo ali tele, bo abengele abuha: 10 «Abalaha vwele akumi ntaana ndzo e Ndzyami, na avwono. Omo aki Ofarizi, omo otoniŋi lepo. 11 Ofarizi ma otele avwono ntsa otima ndi: “E Ndzyami me empa we leve ma osuumbu a me eli ka mva abuha maamo ni. Bo adziɓi, bo abi, bo masyaha ntsuuma, mva otoniŋi lepo yu. 12 Me eka ndzala etsuhu dzyele ntsa etsuhu ntsaami. Me empa we buhu le okuumi le biiɓi e me ebaha eso.” 13 Otoniŋi lepo aki o lala, ŋa nde aki i buuna osaara se miisi na yulu ni. Ŋa nde aki akuruha ondundu aduha ndi: “Aa Ndzyami, mono me nkerihi osi ambiini mva me.” 14 Me eduha be, balaha dzya ema vuruha ndzo e nde ŋa, Ndzyami omi kaala nde oya tele, ŋa ka Ofarizi ni. Ma oma mvuuru akuusa nyuru ma vuura nde ntsi, avuraha ntsi ma kuusa nde.»

Zezi ayamba enkere ma ekyehe

15 Baari ayi na baana ma enkere na e Zezi ndi nde otiila na bo. Alwoni amono vwa, abye na bo. 16 Ŋa Zezi otumi bo otsiina na baana, oduhi ndi: «Lenyila enkere ma ekyehe eya na e me! Lekaa kanaha bo ni, ma oma Onkani o Ndzyami oka na baari ma ali mva bo. 17 Me eduha be sisyele, mvuuru abisa oyalaha Onkani o Ndzyami mva onkere okyehe, aka adze onyunuha o bo ni.»

Nga osolo

18 Nkumu Azife omo olehi Zezi oduhu ndi: «E Nkumu ove, me ma obaha lebihi le mbumbu me osa buni?» 19 Zezi okaali na nde ndi: «We atswolo me o Nkumu ove ma oma? Mvuuru se omo ove onyaŋa, ongula Ndzyami. 20 We oya angri a Ndzyami: “We i sa ntsuuma ni, we i buma mvuuru ni, we i dziɓa kuɓa ni, we i banaha mvuuru ni, nyiima taara bla nguhu a we.”» 21 Balaha dzya ekaali nde ndi: «Me ema nyiima maa aso esi wa me obusi.» 22 Zezi omana oyuha nde okaali ndi: «Emi siila we dzaa mo ntu: tehe biiɓi e we eso, omana we kaɓaha anga omvuɓu adoro. Ŋa we adze obasaha osolo o yulu. Omana we oya, we olwono me.» 23 Ntini e nde ayuhi vwa, nde omoni obi, ma obila o nde aki na osolo a kuna.

24 Zezi omono ndi balaha dzya emi mono obi, nde okaali ndi: «Baari ma ali na osolo, na syami ma onyunuha ntsa Onkani o Ndzyami! 25 Ma oma nyama mva samo ^{▼▼Ma lefaala ama teende samo: anyama ma biriha baari.} abuuna onyunuha mo bulu le sori, okoroho nga osolo ma onyunuha ntsa Onkani o Ndzyami evuli syami.» 26 Baari ma yuuhi nde ndi: «Ŋa abuuna ovuuha na?» 27 Zezi okaali ndi: «Maami a baari ma ali i buuna osa ni, Ndzyami abuuna.» 28 Ŋa Pyere ndi: «Bisi lemi suɓa biiɓi me eki na bisi kalihi, lemi lwono we.» 29 Zezi okaali na bo ndi: «Me eduha be sisyele, mvuuru anyila ndzo e nde, na okari a nde, na akulu bla barihi a nde, na taara bla nguhu na baana a nde. Obila ma Onkani o Ndzyami, 30 nde adze obaha kuna ma antini ma. Ŋa antini ma adze oya, nde adze obaha lebihi le mbumbu.»

Zezi avuriha owoɓo ma leku le nde bla enyusihi e nde

31 Zezi oyahi alwoni a kuumi na vwele bla nde, na bo ndi: «Lemono, saabe leya lekuma na Zerizaleme, ŋa maami ma awoɓi a mbari e Ndzyami ma ateendi aso o Mwana mvuuru, ma adze omono mo. 32 Obila ma adze ompa nde na baari ma ali ka Azife ni ^{▼▼Azife baari ma ampi Zezi na asi Rome.}, bo aseɓe nde, bo atuha nde, bo atsuura nde antayi. 33 Bo ma adze obula nde ekatsi, bo ma adze obuma nde. Ŋa tsuhu o tari nde adze onyusiha.» 34 Ŋa alwoni aka yuha dzaa si mo ni. Mbari dzya eki lempiini, bo aka yaa maami a Zezi aduhii bo ni.

Zezi asalaha balaha eki i mono ni

35 Ŋa Zezi aki atsiina na onguundu o Zeriko, balaha mo eki i mono ni aki o ntsi ma osyese a ndzila, alaha biiɓi. 36 Nde oyuha lemvuuru leyira nde opisi bo ndi: «Co kwa oma?» 37 Bo akaali na nde ndi: «Zezi a Nazarete ayira.» 38 Ŋa nde owuli nkema ndi: «Zezi a Mwana Davide, mono me nkerihi!» 39 Baari ma laanihi levusu le nde abye na nde ndi: «Ka pi!» Ŋa nde oselehi owula ankema nkara yulu ndi: «Mwana Davide, mono me nkerihi!» 40 Zezi osuri, oduhi na bo ndi: «Leya na me nde!» Mvuuru ali i mono ni otsiini o paani e nde, Zezi opisi nde ndi: 41 «We asaha mbri me sa we oma?» Nde okaali ndi: «E Nkumu sa mbri me vuruha emono.» 42 Zezi okaali nde ndi: «Mono! Oyalihi o we omi vusuha we.» 43 O ntsi na ntsi ŋa nde oya amono, olwoni Zezi, na lekuusa la lekuma le Ndzyami. Baari aso amono vwa, aya ma kasaha Ndzyami.