Luk 19 | MdtSC | STEP | Zezi onyunuha ntsa Zeriko, oya atina onguundu.

Luke 19

Zezi bla Zase

1 Zezi onyunuha ntsa Zeriko, oya atina onguundu. 2 Eki na balaha mo o ŋa ma tswolihi o Zase, nkumu atoniŋi ma adoro, nde aki nga osolo. 3 Nde aki asaha omono Zezi, ŋa nde aki i buuna ni. Ma oma, lemvuuru leki lema vula kuna, ŋa nde se aki otele okuɓi. 4 Nde oyeni o ntsiini levusu, okumi o yula oti a sikomoore, ma omono Zezi aya na ayira o ŋa.

5 Ntini e Zezi ato obiri dzya, osaari miisi na yulu, na nde ndi: «Zase, suriha woowo! Loɓi ove me eki o ndzo e we.» 6 Zase osurihi asisari, oyambi nde na oswere oso. 7 Baari aso amono vwa aya ma ŋiina ndi: «Nde omi dze na aka mpili e nga ambiini!»

8 Ŋa Zase ma otele o miisi a Nkumu, na nde ndi: «E Nkumu, me empa anga omvuɓu obari osolo a me. Ŋa yuhu me ema yaha adoro a mvuuru a kuna, me evuura nde abuhu a na.» 9 Zezi okaali nde ndi: «Loɓi ami vusuha baari a ma ndzo dzi. Obila yu se mwana Abraame. 10 Obila Mwana mvuuru ayi na asaha, na le vusuha le baari ma aki ama nywoŋo.»

Ntsintsami akele amvunu

11 Baari aki ma yuha mbari e Zezi, nde oluusi ntsintsami mo, obila nde aki tuha na Zerizaleme. Baari atsimihi ndi Onkani o Ndzyami ma oya o ntsi na ntsi ŋa. 12 Ŋa nde ndi: «Balaha mo eki mvuuru onini, na nkwono e nde se eki baari ma anini. Nde oyeni osi o la, ma oyaha mbara onkani. Emana nde oyi na avuriha. 13 Nde otswoli adzandzi a nde a kuumi. Nde ompi bo akele amvunu. Emana nde na bo ndi: “Lesa ombuungu bla mo, be lebaha adoro akima, tii ngo e me eya na avuriha.” 14 Ŋa baari ama osi o nde aki ama bele nde. Bo atumi baari ngula nde na aduha ndi: “Bisi ndzala mbri balaha dzya eka nkani a bisi kali.” 15 Ŋa si o bo ma beli nde, ampi nde onkani, nde oyi na avuriha. Nde otswoli adzandzi a nde ampi adoro o paani e nde. Ma oyaa ombuungu a mvuuru na mvuuru asi. 16 Odzandzi antsomi oyi, oduhi ndi: “E nkumu, kele le we le mvunu le we ampi me, lemi tusaha me akele a mvunu akima kuumi.” 17 Nkani okaali nde ndi: “Yemihi, we odzandzi ove. Obila we aki tele o maami ma akyehe, me empa we onkani o yula enguundu kuumi.” 18 Odzandzi o dzwele oyi, oduhi ndi: “E nkumu, kele le we le mvunu, lemi mpa me akele akima amvunu ataani.” 19 Nkani okaali na nde ndi: “Me empa we onkani o yula enguundu etaani.” 20 Odzandzi okema oyi oduhi ndi: “E nkumu mono kele le we le mvunu, me eki ema kyele yo ntsa obari o mfa. 21 Obila me eki na vwoho o we. We balaha e nkala. We ayaha biiɓi e we aka tsuusa ni. We otoloho biiɓi e we aka kuna ni.” 22 Nde okaali na nde ndi: “We odzandzi obi. Me epama we o mbari e we anku. We oki oya mbri me balaha e nkala, me eyaha biiɓi e me eka tsuusa ni, me etoloho e me eka kuna ni. 23 Ŋa we abisi olehe adoro a me o ndzo ma kyelehe adoro oma? Kaa ntini e me eyi na avuriha, me basihi adoro a kuna.” 24 Emana nde na baari ma aki ŋa ndi: “Lepiina nde kele le mvunu lya, be lempa ali na akele amvunu kuumi.” 25 Bo akaali nde ndi: “E nkumu, nde oya na akele amvunu kuumi!” 26 “Me eduha be: Mvuuru ali na kiila, ma adze ovuriha oluusa nde. Ŋa ali onyaŋa ma tsyese okyehe ma oli na nde. 27 Ŋa ma abuha a me ma ombangu, ma aduhi ndi me i ka nkani a bo ni, le eya na bo kuuni, be leceɓehe bo ankii o mwa me.”» 28 Zezi omana owoɓo vwa, oyiri levusu, okumi Zerizaleme.

Zezi anyuniha ntsa Zerizaleme

29 Nde otsiina tuha na Betefaze bla Betani, mpili okuri eti ma Eliive ^{▼▼Okuri ma twoloho ma okuri eti ma oliive, mpili osi a Azife. Oti oliive, ma dzyaha mburu, ma syaga se maari o mburu e nde.}, nde otumi alwoni a nde vwele. 30 Nde na bo ndi: «Ledzyehe ntsa mpuhu eli tele na be. Ntini e be lenyuniha, be ledze omono mwana ane ^{▼▼Ane oma kaha nyama abiriha baari, bla biiɓi. Nde adzandza kuna.} ama kura, eli mvuuru okini sa aka o ntsi o yula nde ni. Lenaana be leya na nde kuuni. 31 Ŋa mvuuru opisa be ndi: “Be lenaana nde ma oma?” Be lekaali mbri: “Nkumu na kaama o nde.”»

32 Alwoni a vwele a nde atumi ayeni, bo amoni maami ma osuumbu a Zezi aduhi bo. 33 Ntini e bo ma naanihi mwana ane, anga nde apisi bo ndi: «Be lenaana mwana ane yu ma oma?» 34 Bo akaali ndi: «Nkumu na kaama o nde.» 35 Bo ayi na mwana ane mpili e Zezi. Bo ayali amfa a bo o yula mwana ane. Alehi Zezi o yula nde. 36 Ntini e Zezi atsinihi, baari ma yala amfa a bo o ndzila.

37 Nde oki oya atsiina na Zerizaleme, asuraha okuri eti ma Eliive. Lenkindi la alwoni, ntsa oswere, leya leyima aluumu a Ndzyami nkara yulu. Ma emaa e bo ma amoni eso. 38 Bo aduhi ndi: «Andosoho aka na nkani aya o nkuumi e Nkumu! Oduusu oka o yulu, lekuma le Ndzyami leka ma ebiri e nkara yulu!»

39 Afarizi ake ma aki ompanihi lemvuuru na Zezi ndi: «E Nkumu, duha alwoni a we aka pi!» 40 Zezi okaali na bo ndi: «Me eduha be, bo aka pi, akele ma, ma adze owula ankema!»

Zezi alila mo Zerizaleme

41 Ntini e Zezi atsiini tuha na Zerizaleme, omono onguundu, oya alila obila o tso. 42 Nde ndi: «We se aki ma oyaa o tsuhu e loɓi osuumbu ma obaha oduusu! Ŋa ama dzisiha tso o miisi a we! 43 Obila etsuhu ma edze oya o we, ma eli abuha a we ma ombangu ma adze otwa ebaha, bo adzenehe we, bo apya we ma angulu aso. 44 Bo ma adze onyya we bla baana a we. Bo ma aka adze onyila si kele mo o yula buha ni. Ma oma we aka yiimba ntini e Ndzyami ayi na ayamaha we ni!»

Zezi atsuura atehi a biiɓi ntsa ndzo e Ndzyami

45 Zezi onyunuha ntsa ndzo e Ndzyami, oya atsuura baari ma teehi biiɓi. 46 Nde na bo ndi: «Ama teende ndi: “Ndzo e Ndzyami edze oka ndzo ma avwonoho.” Ŋa be lemi sa yo eyiha biri adziɓi!» 47 Etsuhu eso Zezi aki ayisiha ntsa ndzo e Ndzyami. Ŋa ankumu ma asi ma avwoŋi, ayisihi a mbari e Ndzyami, bla ankumu ma okuha, asahi obuma nde. 48 Ŋa bo aki i yaa osuumbu ma osa ni. Obila baari aso aki ma ayuha nde ndzele ndzele.