Luk 2 | MdtSC | STEP | Ntini e Sezaare Ogise akihi nkumu esi e Rome, nde oti osyami ma osa onteende o baari aso ama esi e nde.

Luke 2

Ekulihi e Zezi

1 Ntini e Sezaare ^{▼▼Atwoligi ankumu ma esi e Rome o Sezaare.} Ogise akihi nkumu esi e Rome, nde oti osyami ma osa onteende o baari aso ama esi e nde. 2 Onteende a ntsomi dzwa asi o ntini e Kirinise akihi lepatima le osi o Siri. 3 Mvuuru na mvuuru oyeni onguundu o nkwono e nde na asa onteende. 4 Zuzefe se owi Nazarete onguundu o ntsa Ngalili, ma ovuruha Bitiliyeme onguundu o ntsa Zide. Co oguundu o nkani Davide, ombisa o nde. 5 Nde ayeni na asa onteende dzwa bla Mariya adela oka ompala a nde, nde akihi na yimi. 6 Ntini e bo ma kihi o Biteliyeme, tsuhu okula eto. 7 Nde okuli mwana nde a ntsomi, mwana a balaha. Owuhi nde elembe, otsuusi nde o biri mo edzyaha anyama. Obila ebiri ekihi kali ntsa otini andzya.

Obaandzi atooso ntsya e mve na akyeli ma endoombo

8 Ntsa enkese bya ekihi na akyeli ma endoombo, bo ma moho na mpiibi ma okyele dziimi le bo ntsa ndziɓa. 9 Obaandzi a Nkumu owasihi na e bo. Oyalala lekuma le Ndzyami ledzenihi bo. Bo amoni vwoho bo mini. 10 Obaandzi na bo ndi: «Leka mono vwoho ni, me eduha be ntsya e mve empa baari aso oswere bo mini. 11 Loɓi ntsa onguundu o Davide ami kula be Ovusihi nde Krisi ^{▼▼Krisi oma kaha mpili a Azife Masiya, mvuuru a Ndzyami aswoli ma ovusuha baari a nde. Ma le greeke Kristose.}, nde se Nkumu. 12 Mono ndiimi e be ledze oyaa nde: be ledze omono mwana ma ama wuha elembe ama tsuusa obiri mo, edzyaha anyama.»

13 Paraabu ŋa abaandzi a yulu kuna ayi na abasaha obaandzi a ntsomi, ma yima aluumu a Ndzyami ndi:
14 «Lekuma le Ndzyami ma ebiri e nkara yulu,
na oduusu oka o yulu a ntsye o baari a nde ama dya.»

Akyeli ma endoombo ma adze na Biteleyeme

15 Abaandzi ama nyila bo, avurihi na yulu. Akyeli ma endoombo na abuha ndi: «Letswe Bitiliyeme na amono maami ma yiri, a Nkumu ama laha saabe.» 16 Bo ayeni woowo, abasihi Mariya bla Zuzefe, na mwana o tolo, o biri edzyaha anyama. 17 Bo ama omono nde, bo aduhi maami ma obaandzi aduhi o mwana dzwa. 18 Aso ma yuhi akyeli ma endoombo akimi ewoɓihi e bo. 19 Mariya akyele maami maa aso ntsa otima, nde atsimiŋa mo. 20 Emana akyeli ma endoombo ayeni na oyima, na okuusa lekuma le Ndzyami, o maami a bo ma yuhi na a bo ma moni. Mo aso ayiri ma osuumbu obaandzi aduhi bo.

Ma luha Zezi nkuumi

21 Etsuhu ntsaami eyiri, o mfwomo ma asa mwana sasi, ampi nde nkuumi e Zezi ma osuumbu obaandzi aduhi na Mariya, nde oki kini obira yimi ni. 22 Emana ŋa, tsuhu e tsinda okuumbu eto lemihi na angri a Ndzyami ampi Moyize. Mariya bla Zuzefe abiri mwana Zerizaleme na alaha nde na Nkumu. 23 Obila, ama teende ntsa osaangumu angri a Nkumu ndi: «Mwana abalaha a ntsomi dzwa oka buhu ma yeesi o Nkumu.» 24 Ŋa bo ayi se na ampa avwoŋi a tsinda okuumbu lemihi na angri a Nkumu: epeɓihi dzyele si kali baana ma akuumbi vwele.

Simion owoɓi a Ndzyami

25 Ŋa balaha mo ekihi o Zerizaleme nkuumi e nde Simion. Mvuuru a tele, anyiima Ndzyami, adela na lila Ovusihi a baari a Isayele. Oduduma Santi aki o nde. 26 Oduduma Santi na nde ndi: «We aka sa kwa ni, we asa mono Krisi a Nkumu aswoli.» 27 Oduduma Santi obiri Simion ntsa ndzo e Ndzyami. Dzya biri e nkwono Zezi ebiri nde ma osuumbu otiiri angri a Ndzyami. 28 Simion oyahi mwana ntsa dzyala, ompi Ndzyami leve ndi:
29 «O ŋa Nkumu, nyila odzandzi a we okwa ntsa oduusu lemihi na andahi a we.
30 Miisi a me ami mono Ovusihi a we atumi,
31 we ama ayeese o baari asiiso.
32 Nde oyalala adze olaha we na baari a yulu a ntsye. Nde adze oka lekuma le baari a we a Isayele.»

Simion awobo ma lengulu le Ndzyami

33 Taara bla nguhu a mwana akimi o maami a Simion awoɓihi o nde. 34 Simion ompi bo andosoho. Nde na Mariya ndi: «O mwana we yu, kuna o ntsa Isayele ma ava, si kali ma nyusiha. Nde adze oka ndiimi e Ndzyami, okoroho baari ma adze obele nde. 35 Ŋa ma adze oyaa etsimiŋi e baari kuna. Ŋa we Mariya, mpasi edze otiila we otima mva dzwo.»

Aane owoɓi a Ndzyami

36 Ŋa se ekihi na okaasi a nkuumi Aane mwana Panyele ama lekaha la Aseere. Nde owoɓi a mbari e Ndzyami, aki aya okuɓu. Ntsa ongondo o nde, nde osi esiɓi ntsaami bla olumi a nde. 37 Emana oya okuuli. Nde ekuumi ma esiɓi mfwomo na esiɓi ena. Akihi ntsa ndzo e Ndzyami ma odzandza antini aso, aka na ongerehe, nde se avwono. 38 Ntini dzya nde se oyi, ompi Ndzyami leve, owoɓi o mwana na baari aso ma dilihi Ovusihi a Zerizaleme.

39 Bo ama mana osa lemihi na angri a Nkumu apisihi, Mariya bla Zuzefe avurihi onguundu o bo Nazarete o ntsa Ngalili. 40 Mwana okuli na mpari eso, na ntsimi yo mini, mpolo e Ndzyami eki bla nde.

Zezi oto esiɓi kuumi na dzyele oyeni ndzo e Ndzyami

41 Esiɓi eso, nkwono e Zezi edze na Zerizaleme o tsinda a Azife ma tswoloho o Paake. 42 Zezi oma to esiɓi kuumi na dzyele, oyeni bla bo mva otiiri a bo. 43 Bo ama mana tsinda avurihi. Ŋa mwana bo, Zezi osiili o Zerizaleme taara bla nguhu aka yaa ni. 44 Bo aki ndi mwana oli bla abuha a bo a ndzila mo. Asi odziila okumuu, aya ma saha nde ntsa nkwono na andihi a bo. 45 Bo aka basaha nde ni. Avurihi na Zerizaleme ma osaha nde. 46 Tsuhu otari abasihi mwana ntsa ndzo e Ndzyami. O ntsi, o mpaniŋi ayisihi ma Azife, ayuha, nde se alehe bo eduhu. 47 Aso ma ayuhi mwana akimi ntsimi ekalihi e nde. 48 Bo ama mono nde, akimi. Nguhu na nde ndi: «E mwana me we dzya dzaa ama sa bisi ma? Saa taara we lekihi ntsa ongwo na lesaha le we.» 49 Nde okaali bo ndi: «Be lesaha me ma oma? Be i ya mbri ove me esi dzandza e Taara me ni?» 50 O ŋa bo aka yuha mbari dzya ni.

51 Emana Zezi ovurihi bla bo Nazarete. Nde anyiima bo. Nguhu akyele maami maa aso ntsa otima a nde. 52 Zezi akulihi na ntsimi eso. Nde aki na mpolo o miisi a Ndzyami na a baari. Na baari se ma ayuusa nde.