Luk 20 | MdtSC | STEP | Tsuhu mo, Zezi aki ayisiha baari ntsa ndzo e Ndzyami, nde se atooso bo Ntsya e Mve. Ankumu ma asi ma avwoŋi, bla ayisihi a mbari e Ndzyami na ankumu ma okuha ayi.

Luke 20

Onkani o Zezi

1 Tsuhu mo, Zezi aki ayisiha baari ntsa ndzo e Ndzyami, nde se atooso bo Ntsya e Mve. Ankumu ma asi ma avwoŋi, bla ayisihi a mbari e Ndzyami na ankumu ma okuha ayi. 2 Bo apisi nde ndi: «Duha bisi, atumi we osa maami ma na? Ampi we onkani ma osa mo na?» 3 Zezi okaali bo ndi: «Me se ema lehe be oduhu. Lema duha me, 4 ateeme a Zan awuuhi na yulu si na baari?» 5 Ŋa bo aya ma tsimiha o mpanihi e bo ndi: «Saabe oduha mbri: “Na yulu”, nde okaala saabe ndi: “Be leka yalaha nde ni ma oma?” 6 Ŋa saabe oduha mbri: “Na baari”, baari aso ma adze otena saabe akele ma obuma saabe, obila bo aki ama yalaha ndi Zan owoɓi a mbari e Ndzyami.» 7 Ŋa bo akaali ndi: «Bisi i yaa mpili ewi mo ni.» 8 Ŋa Zezi okaali bo ndi: «Me se eka duha be mvuuru ampi me onkani ma osa mo ni.»

Ntsintsami adzandzi a nguunu eti e viinye

9 Ŋa Zezi oya ata ntsintsami dzi na baari ndi: «Balaha mo ekuni nguunu eti e viinye ^{▼▼Vigne oma kaaha nguunu eti ma Vigne eti ma empaa a reze, ma siiha mali aba omo}, ompi na adzandzi a viinye, nde oyeni opiinga ma lebihi. 10 Ntini ma toloho mburu eto, nde otumi odzandzi omo mpili adzandzi a viinye, ndi bo ampa o nde obari o mburu e viinye. Bo abeeri nde, avuuri nde dzyala onyaŋa. 11 Onga nguunu ovurihi otumi odzandzi okema. Bo abeeri dzwa se, bo atuhi nde, bo avuuri nde dzyala onyaŋa. 12 Nde ovurihi otumi odzandzi otari. Bo atiniŋi nde ampura se, bo atsuuri nde. 13 Ŋa onga nguunu e viinye ndi: “Me osa buni? Me ema tuma mwana a me a dya, leke bo ma anyiima nde.” 14 Ŋa adzandzi a nguunu eti e viinye amono nde, bo aya ma woɓo o mpanihi e bo ndi: “Mono onga wanda. Letswe lebuma nde, saabe le siila na wanda!” 15 Bo atusihi nde ntsa nguunu viinye, abumi nde.» Zezi opisi bo ndi: «Nga nguunu adze osa bo ŋa buni? 16 Nde adze oya, nde obuma adzandzi a nguunu eti e viinye, oyaha nguunu ompa na adzandzi akima.» Baari ayuha vwa, aduhi ndi: «Kali, ka vwa ni!» 17 Ŋa Zezi okeesi bo, na bo ndi: «Mbari e Ndzyami ma ama ateende ndi: “Kele atui ma abisi, emi kiriha kele e kaama. Mbari dzya eduha ndi nki”? 18 Mpini mvuuru ava o yula kele dzya, okesihi. Kele dzya se ova o yula we, we kesihi.»

Lepo le Sezare

19 Ayisihi a mbari e Ndzyami bla ankumu ma asi ma avwoŋi asahi okwara nde o ŋiŋa. Ŋa bo amoni vwoho o baari ma aki ŋa. Bo aki ama yaa ndi Zezi ata ntsintsami dzi ŋa o bo. 20 Bo aya ma keese Zezi. Bo atumi baari ma kiisaha ndi bo ali tele o miisi a Ndzyami, mpili e nde. Ma oyusuha dzaa e mbi etsuuha ma onywa a nde, ma ompa nde na lepatima ali na onkani bla onkumu. 21 Bo alehi nde oduhu yu ndi: «E Nkumu, bisi leyaa mbri we awoɓo yemihi, we se ayisiha yemihi. We aka pamaha reeŋe ni. We ayisiha ndzila e Ndzyami bla asisyele. 22 Ŋa duha bisi yuhu bisi lebuuna owura lepo le Sezaare si kali?» 23 Ŋa Zezi oki oma yaa ndi dzwa oyere. Nde okaali na bo ndi: 24 «Lelaha me doro a nkoso omo. Olya bla ampri ma awuana na?» Bo akaali ndi: «E Sezaare.» 25 Zezi okaali bo ndi: «Levuura Sezaare e nde, be levuura Ndzyami se e nde.» 26 Bo aka buuna yuha dzaa e mbi o ntsa ewobihi e nde o miisi a baari ni. Bo akimi ekalihi e nde. Bo aya pi.

Oduhu ama enyusihi ma akui

27 Asadisi ^{▼▼Asadisi ayisigi a mbari e Ndzyami. Ŋa bo ma aka yalaha ndi akui ma adze onyusiha ni.} ake atsiini mpili e Zezi, bo ma aka yalaha enyusihi ma akui ni. Bo alehi nde oduhu yu ndi: 28 «E Nkumu, Moyize ateendi ngri dzi o bisi ndi: “Balaha oka na okari bla mwarihi, nde okwa baana kali, mwarihi a nde abuuna oyaha okuuli, ma okula okulu a nde ama kwa baana.” 29 Ŋa eki na abalaha ntsaami o mwo a bo. Antsomi oyahi okaasi, okui baana kali. 30 Odzwele oyahi okuuli, nde se okui, baana kali. 31 Na otari se oyahi okuuli, okui. Ŋa bo aso a ntsaami akui, bo aka nyila baana ni. 32 Emana okaasi se okui. 33 Ŋa tsuhu akui ma adze onyusiha nde adze oka okari a na? Nde ti aki okari a bo aso a ntsaami!» 34 Zezi okaali bo ndi: «Ma antini ma, abalaha ma yaha akaasi ma abaala, ma mpa se akaasi ma abaala. 35 Ŋa baari ma adze opama tele ma antini ma adze oya, bla enyusihi e ntsa leku ma aka ma yaha akari bla alumi ni. 36 Bo ma aka ma buuna okwa ni. Obila bo aya mva abaandzi. Bo baana a Ndzyami, Ndzyami ama nyuusa bo ma leku. 37 Moyize ama duha nde anku ndi akui ma adze onyusuha. O ntini e nde aduhi dzaa oti ayahi mbaa, nde otswoli Nkumu o “Ndzyami Abraame, Ndzyami a Izaake bla Ndzyami a Zakobe.” 38 Zezi oluusi ndi: Ndzyami ka Ndzyami akui ni, ŋa Ndzyami a baari ma ali mwo, obila bo aso ali mwo o nde.» 39 Ayisihi a mbari e Ndzyami ake ayahi mbari ndi: «E Nkumu, we awoɓi ŋa yemihi.» 40 Bo aka ma buuna olehe nde eduhi ekema ni.

Krisi bla Davide

41 Zezi na bo ndi: «Ma duuha ndi Krisi mwana Davide ma oma? 42 Davide nde anku aduha ntsa osangumu o Soome ndi: “Ndzyami a Nkumu ama duha na Nkumu a me ndi: Ka o ntsi o kwoho o me olumi. 43 Tii ngo e me elehe abuha a we ma ombangu o ntsina nyiili e we.” 44 Ŋa Davide atswolo nde o “Nkumu”, ŋa Krisi oma ka mwana a nde buni?»

Zezi atiɓa ayisihi a mbari e Ndzyami

45 Baari aso aki ma ayuha Zezi, nde na alwoni a nde ndi: 46 «Be lesi ayiɓa ma ayisihi a mbari e Ndzyami! Bo ndzala odzyeŋe na eringa ma ela ela, bo ndzala awosoho bo o mwa ambuhu. Bo oswoloho ebiri ma levusu ntsa andzo ma avwonoho. Bla na ebiri ma levusu ma tsinda ma anini. 47 Bo ma piinaha akuuli biiɓi e bo ma ali na dzo eso. Bo osyaha evwoni ma ela ela ndi amono bo. Opami a bo adze ovula abuha.»