Luke 21

Okuuli omvuɓu

1Zezi okeesi o paani e nde, omoni anga osolo ma leehi ndamini e Ndzyami ntsa anguli a mo ndzo e Ndzyami. 2Nde se omoni okaasi okuuli omvuɓu, alehi adoro a nkoso vwele ma akyehe. 3Ŋa nde ndi: «Me eduha be sisyele, okaasi okuuli omvuɓu yu omi vula abuha aso ompa. 4Obila abuha alehi adoro a bo ma ali kaama kali. Ŋa nde ampi a nde aki na bo aso ma lebihi le nde.»

Zezi atooso etsalihi e ndzo e Ndzyami

5Baari ake aki ma woɓo mo ndzo e Ndzyami, ma aduha ndi yo na owali na akele a yo ma awali, na biiɓi ma ampi Ndzyami. Ŋa Zezi ndi: 6«E be lemono bi eso, etsuhu me edze oya, ma aka ma mono kele o yula kele ni. Ma tsala dzo eso.» 7Bo apisi Zezi ndi: «E Nkumu maami maa ma dze oya o dzini ntini? Ndiimi elaha maami maa edze oka ma?» 8Zezi okaali na bo ndi: «Leesa ayiɓa, leka nyiliha akiisi be ni! Obila baari kuna ma aya o nkuumi e me, bo aduha ndi: “Yu me Krisi!” Na “Antini ami to!” Ŋa leka lwonoho bo ni. 9Ntini e be ledze oyuha ma woɓo ma eta, na baari ma saraha, leka monoho vwoho ni, obila ove maami ma asa aya. Ŋa ntini ekini to ni.» 10Ŋa Zezi oluusi ndi: «Osi omo edzwana bla osi okema, nkani omo se adzwana bla nkani okema. 11Ntsye edila onyuha na mpari, ma ebiri kuna, na ndzala eva bla angaa a nkala, ma adze omono maami a lwari, bla andiimi o yulu. 12Ŋa levusu le maami ma aso, ma kwara be, be lemono ampasi. Ma adze na be ntsa andzo ma avwonoho ma opama be. Omana alehe be ma ongeneŋe. Ma bira be o miisi ma ankani na apatima, obila o me. 13Maami a be leedze omono maa, ma mpa be lengulu ma o siisa enwa o me. 14Lelehe ntsa etima e be mbri: be leka sa baana oyeese maami a be leduha ni. 15Obila me anku empa be mbari bla ntsimi eli abuha ma ombangu i sa ekemi ni, bo aso se i buuna obisa yo ni. 16Na ataara a be bla anguhu se, na baana ma anguhu, na nkwono bla andihi a be, ma adze ompa be na ankani. Bo se ma adze obuma kuna o mpanihi e be. 17Baari aso ma bele be obila o me. 18Ŋa si lemfu lemo le ma otsui a be leka nywoho ni. 19Lesa nkomoho! Lya lemihi le be le edze ovusuha lebihi le be.»

Zezi atooso etsalihi e Zerizaleme

20«Ntini e be le edze omono aworo ma abuha ma ombangu, ama dzenehe Zerizaleme, be leyaa mbri ntini eya tuha ma tsala Zerizaleme. 21Ŋa baari ma adze oka o Zide, ove bo adimi mpili ekuri. Baari ma adze oka ntsa onguundu, ove bo atsuuhi. Baari ma adze oka ntsa anguunu i ma nyuniha ntsa onguundu ni. 22Obila bya ma edze oka etsuhu e mpasi. Maami ma ama teende o ntsa Osaangumu o Ndzyami, ma adze oya. 23Etsuhu bya, ma eka etsuhu e ndoho ma akaasi ma ali na ayimi, na ma ampa baana abyele! Mpasi yo mini edze oka ma osi ki. Ŋa nkala e Ndzyami edze oya o yula baari ama osi ki. 24Ma adze obuma ake ma ekwere, ma adze obira bo mbri engenehe ntsa esi eso. Ŋa baari ama esi ekema, atsala Zerizaleme, tii ngo antini a baari baa ma adze oyira.»

Edzihi e Mwana mvuuru

25«Andiimi ma adze oka o ntsa tari bla ngondo na anyari. O yula ntsye, esi ma edze omono ongwo bla vwoho bo mini. Obila ma lesuhu le mpari na epuhi ma okeri onini. 26Baari ma adze okwa mo vwoho o ntini e bo ma tsimiha maami ma adze oya o yula ntsye. Obila, mpari e biiɓi ma eli o yulu eso me dze o triha. 27O ŋa ma adze omono Mwana mvuuru aya o ntsa lenguri bla mpari na lekuma le nde le eso. 28Ntini e maami maa ma adze obaana oya, be letemehi, lesaari etsui, obila evusihi e be eya tuha.»

Ntsintsami oti a figye

29Ŋa Zezi oti bo ntsintsami ndi: «Lekeese oti a figye bla eti ma emo eso. 30Ntini e be lemono ntsuusi ebaana otsuuha, be leyaa mbri osiɓi ove oya tuha. 31Ma osuumbu dzudzwa, ntini e be lemono maami maa ma aya, ove be ledzyaɓi mbri Onkani o Ndzyami oya tuha. 32Me eduha be sisyele ntini e maami maa ma adze oya, ndzuɓu e loɓi eka adze okwa eso ni. 33Yulu bla ntsye me edze oyira, ŋa mbari e me eka adze oyira ni.»

Leeka mwo

34«Leesa ayiɓa! Lekaa nyiliha otima a be olemi ntsa atsinda na mali a kuna ni, si kali ma ampasi ma lebihi ni, obila tsuhu Opami edze oya be o limihi. 35Mva oyere, yo edze oka tsuhu e kruhu o baari a yula ntsye aso. 36Lekaa tsyaha tolo ni, levwono antini aso. Ŋa be lebaha okiini o maami ma adze oya aso. Mo vwa be le edze obuuna oka ma etele o mwa Mwana mvuuru.»

37Na mui, Zezi ayisiha ntsa ndzo e Ndzyami, ŋa na ekikolo nde oyeni yula okuri eti ma Eliive, lempiiɓi le tsiina. 38Ŋa baari aso nkara entsyere ayi ndzo e Ndzyami ma oyuha nde.