Luke 22

Ankumu ma akura tsuumu oma Zezi

1Cinda e Paake eki eya etsiina. 2Ankumu ma asi ma avwoŋi bla ayisihi ma angri a Ndzyami, asahi osuumbu ma obuma Zezi, ŋa bo aki na vwoho o baari.

Zida atosoho Zezi

3Ŋa Dzabri onyunihi o Zida ma atswoloho mo Sikaryote, nde aki ntuma omo, ntsa antuma a kuumi na vwele. 4Ŋa Zida oyeni na ayeese bla ankumu ma asi ma avwoŋi, na ankumu ma akyelehe ndzo e Ndzyami, osuumbu a nde atosoho Zezi. 5Bo amoni ove bo mini, bo alehi nde ndahi ndi bo ma mpa nde adoro. 6Nde oyalihi, emana nde osahi osuumbu ma otosoho Zezi ma adzisihi. Lemvuuru i yaa ni.

Zezi adza Paake bla alwoni a nde

7Tsuhu e tsinda e mpeembe eli leviire kali eto, aya ma buma baana ma endoombo o Paake. 8Zezi otumi Pyere bla Zan ndi: «Ledzyehe na alaama saabe biila e Paake.» 9Bo apisi nde ndi: «We asaha mbri bisi lelaama dzo kuni?» 10Nde okaali na bo ndi: «Ntini e be lenyuniha ntsa onguundu, be levunuha na balaha mo, ama bira mbasa andza o yula otsui. Be lelwoni nde tii ngo ntsa ndzo e nde anyuniŋa o yo. 11Be leduhi na onga ndzo mbri: “Nkumu apisa we ndi biri e nde adza biila e Paake bla alwoni a nde eli kuni?” 12Nde adze olaha be otini o ndzo o yulu ▼

▼Biri ema odza biila.

ama yeese. Dzya biri e be ledze olaama.» 13Bo ayeni, amoni maami ma osuumbu a Zezi aduhi bo. Bo alaami biila e Paake.

Biila e Nkumu

14Ntini odza eto Zezi okumi o tanda bla antuma a nde. 15Nde na bo ndi: «Me edii kuna odza biila e Paake bla be, omana me ema mono ambaɓa! 16Obila me eduha be, me eka adze oma dza yo bla be ni, tii ngo e Ndzyami ayeese Paake ntsa Onkani o Nde.» 17Nde oyahi koɓo e mali, ompi Ndzyami leve, emana nde ndi: «Leyaha be lekaɓa o mpanihi e be. 18Ŋa me eduha be, ma obaana o tsuhu e loɓi me eka ma nywa mali ba ni tii ngo Onkani o Ndzyami ma oya.»

19Emana nde oyahi lempeembe, omana ompa Ndzyami leve, nde oceɓi lo, ompi bo ndi: «Dzi nyuru e me ma ama mpa o be. Lesa vwa ma oyiɓiha me.» 20Bo amana odza, nde se oyahi koɓo e mali, na bo ndi: «Koɓo e mali dzi ondihi ma onyarihi, oma tohi le me, ledze okele obila o be. 21Ŋa lemono, mvuuru adze otosoho me oli bla me o tanda ŋa! 22Ŋa Mwana mvuuru adze okwa ma osuumbu a Ndzyami ayeesi. Ŋa ndoho eka na mvuuru atosoho nde!» 23O ŋa alwoni aya ma pisa o mpanihi e bo ndi: «Mvuuru abuuna osa dzaa mva dzya na?»

Aveli okiimi o mpanihi alwoni na?

24Alwoni aya ma woɓo o mpanihi e bo. Bo ma pisa abuha ndi: «Mvuuru aveli abuha okiimi o mpanihi e saabe ŋa na?» 25Zezi okaali na bo ndi: «Ankani ma esi, na onkumu o yula baari. Bo ndzala ndi atswoloho bo o “baari ma syaha leve”. 26Ŋa be lekaa syaha mva bo ni. Mvuuru avili okiimi o mpanihi e be, ove nde oki mva mwana onkere. Mvuuru ali nkumu, ove nde oki mva odzandzi. 27Mo be avili okiimi na? Mvuuru ali o tanda si mvuuru alehe biila o tanda? Mbaa mvuuru ali o tanda? Ŋa me eli o mpanihi e be mva mvuuru aleehe biila mo tanda! 28Be leki bla me ma antini a me ma ampasi. 29Ŋa ma osuumbu a Taara a me ama mpa me Onkani, me se empa be Onkani vwa. 30Be ledze odza, be lenywa o tanda ntsa Onkani o me. Be ledze oka ma antsi o yula ambara, ma opama ankaka a kuumi na vwele a Isayele.»

Zezi awoɓo mo Pyere adze obisa nde

31Nkumu ndi: «E Simon, Simon! Sa ayiɓa: Satan asaha be, ma oswesehe be aso, mva ma nyengese mburu. 32Ŋa me ema vwono o we obu mbri we i ma yele oyalihi ni. Ŋa ntini e we aya na vuruha, we ompi baana ma anguhu a we mpari.» 33Pyere na nde ndi: «E Nkumu, me ebuuna odze ongeneŋe bla we, me se ebuuna okwa bla we.» 34Zezi okaali na nde ndi: «E Pyere me eduha we, loɓi ntsusu a ntsomi a ka sa kwoho ni, we akemehe me ekru etari.»

Adoro bla mpye na baha ampele mwele

35Emana Zezi na bo ndi: «Ntini e me etumi be adoro kali, mpye kali na akoroho kali, be leki leyeli kiila?» Bo akaali ndi: «Kali.» 36O ŋa nde na bo ndi: «Ŋa ma obaana o tsuhu e loɓi, mvuuru ali na adoro oyahi, ali na mpye se oyahi. Mvuuru ali baha ampele mwele kali, otehi mfa e nde anku ma osuuma baha ampele mwele. 37Obila me eduha be, ama teende o me ntsa Osaangumu ndi: “Ama taala nde ntsa embeŋe.” Ma oma, maami ma ama teende o me, aya oto.» 38Bo na nde ndi: «Nkumu mono abaha ampele mwele.» Nde okaali na bo ndi: «Abaha mwele ma ampele mwele, ami to.»

Zezi avwono ma okuri eti ma Eliive

39Zezi otsuuhi ma otiiri a nde, oyeni okuri eti ma Eliive ŋa alwoni a nde se alwoni nde. 40Ntini e nde ato obiri dzya, nde na bo ndi: «Levwono obu mbri be i ma va o ntsa etsinihi ma ebi ni.» 41Emana nde olaɓihi na bo ntseeri, owuri avwo oya avwono ndi: 42«E Taara yuhu we adya, we osa mbri koɓo e mpasi dzi elabaha na me, ŋa ka ma edziiŋi e me ni, ma edziiŋi e we.» 43O ŋa obaandzi a Ndzyami owi yulu, oyi na ampa nde mpari. 44Zezi omoni ongwo, oyiha avwono na mpari eso, ndzanihi e nde eyiha etsolo o ntsye mva ataŋi a tohi. 45Nde omana ovwono, otemihi, oyi na vuruha mpili alwoni, omoni bo ali antolo. Ama kolo ma obi o bo ma amonihi. 46Nde na bo ndi: «Be letsa antolo bu ma oma? Letemehe be levwono, be i ma va ntsa etsinihi ma ebi ni.»

Ma akwara Zezi

47Zezi aki okini awoɓo, lemvuuru lewasihi. Ntuma a nde omo ntsa antuma a kuumi na vwele ma tswolihi o Zida, aki levusu le bo. Nde otsiini tuha na Zezi ma ompa nde amfemfe. 48Ŋa Zezi na nde ndi: «Zida we atosoho Mwana mvuuru ŋa ma amfemfe?» 49Baari ma kihi bla Zezi amono vwa, bo na nde ndi: «E Nkumu, bisi lebeere bo ma ampele ma abaha a bisi?» 50Ŋa omo o mpanihi e bo, obeeri odzandzi osi avwoŋi onini, emana oceɓi nde tsui le kwoho olumi. 51Ŋa Zezi ndi: «Lenyila vwa!» Nde otiili tsui le balaha dzya, osalihi nde. 52Emana Zezi oduhi na ankumu ma asi ma avwoŋi bla ankumu ma akyelehe ndzo e Ndzyami, na akuuru ma ayi na kwara nde ndi: «Be leyaha me mva ombeŋe, eli be lema aya bla abaha na ankumuha? 53Me eki bla be etsuhu eso o ntsa ndzo e Ndzyami, be leka saha okwara me ni. Ŋa dzi eya ntini e be bla mpari lempiiɓi.»

Pyere atuna Zezi

54Ŋa bo akwari Zezi, ayeni ŋa nde ntsa ndzo osi avwoŋi onini. Pyere aki alwono nde o lala. 55O mwa lebuhu, aki ama vua mbaa, baari ali ma antsi ama dzenehe yo. Pyere oya o ntsi bla bo. 56Odzandzi omo okaasi omoni Pyere o ntsi tuha ŋa mbaa, okeesi nde yemihi ndi: «Balaha dzi se eki bla Zezi!» 57Ŋa Pyere otuni, na nde ndi: «Kali me i yaa nde ni.» 58Antini ayira, mvuuru okema omoni nde, oduhi ndi: «We se a bla bo!» Pyere okaali na balaha dzya ndi: «Kali, me ka a bla bo ni.» 59Tari mo eyira, okima ovurihi odzisihi ndi: «Sisyele yu se aki bla nde, obila nde se osi Ngalili.» 60Ŋa Pyere okaali ndi: «Me i yaa a we ŋa saha oduha ni.» O ŋiŋa nde aki okini awoɓo, ntsusu okwohi. 61Nkumu okalihi, okeesi Pyere, o ŋa Pyere oyiɓihi mbari e Nkumu aduhi na nde ndi: «Ntsusu antsomi aka sa kwoho ni, we atuna me amihi atari.» 62Pyere otsuuhi, oyiha alila kuna.

Lebeere na letuha le Zezi

63Abalaha ma kyelihi Zezi aki ma lelehe nde, bo se ma beere nde. 64Bo adiɓihi nde olya ma amfa, emana aya ma pisa nde ndi: «Owoɓi a mbari e Ndzyami, Mvuuru abeeri we na? Ma yimba!» 65Ŋa bo aselihi otuha nde.

Zezi o mwa ankani ma anini

66Tsuhu etsa, akuuru ma okuha bla asi ma avwoŋi ma anini, na ayisihi a mbari e Ndzyami, akusihi abuha. Bo ayeni na Zezi mpili ankani ma anini, ma opama nde. 67Bo apisi nde ndi: «Yuhu we Krisi duha bisi.» Nde okaali bo ndi: «Me oduha be, be lekaa yalaha me ni. 68Ŋa me se olehe be oduhi, be leka kaala me ni. 69Ŋa ma obaana o tsuhu e loɓi, Mwana mvuuru aka o ntsi mo kwoho olumi o Ndzyami a mpari.» 70Bo aso apisi nde ndi: «We ŋa ndzaa Mwana Ndzyami?» Nde okaali bo ndi: «Be anku leduha mbri me Mwana a Ndzyami.» 71O ŋa bo aduhi ndi: «Bisi kaama mo mvuuru asiisa enywa kali! Bisi anku lemi yuha mbari e ma onywa a nde!»