Luk 23 | MdtSC | STEP | Baari aso asarihi, ayeni na Zezi mwa Pilaate.

Luke 23

Zezi o mwa Pilaate

1 Baari aso asarihi, ayeni na Zezi mwa Pilaate. 2 O ŋa bo aya ma banaha nde ndi: «Bisi lemi mono mvuuru yu, nde ataasa baari a bisi, nde aliha baari owura lepo le Sezaare. Nde anku aduha ndi nde Krisi, nde se nkani.» 3 Pilaate olehi nde oduhu ndi: «We nkani Azife?» Zezi okaali nde ndi: «We anku aduha.» 4 Pilaate oduhi na ankumu ma asi ma avwoŋi bla lemvuuru ndi: «Me i mono obila ma buma mvuuru yu o tso ni.» 5 Ŋa bo aselihi odzisiha ndi: «Nde atsyese baari mo mbari e nde ayisiha, nde oma baana o Ngalili, omi yira o Zide eso, omana omi to tii ngo kuuni.»

Zezi o mwa Erode

6 Ntini e Pilaate ayuhi vwa nde opisi ndi: «Balaha dzi osi Ngalili?» 7 Nde oyaa ndi Zezi awihi na onguundu Erode akihi nkumu, nde ovuuri Zezi mpili Erode, obila nde se akihi o Zerizaleme ma etsuhu bya. 8 Erode omoni ove bo mini ntini e nde amoni Zezi. Obila nde aki oma yuha ma woɓo o nde. Erode se aki na ndzala omono Zezi osa omaa o miisi a nde. 9 Nde olehi nde eduhu ekuna kuna, ŋa Zezi aka kaala dza se lemo ni. 10 Ankumu ma asi ma avwoŋi, bla ayisihi a mbari e Ndzyami ma selehe obanaha Zezi. 11 Erode bla aworo a nde, ma seɓe nde, bo ayahi nde o mvuuru otsa. Bo alaasi nde mfa e mvunu emana bo avuuri nde mpili e Pilaate. 12 Erode bla Pilaate aki abuha ma ombangu na kala, ŋa o tsuhu dzya bo akirihi andihi.

Opami a Zezi bla leku

13 Pilaate okusihi ankumu ma asi ma avwoŋi bla ankani na baari. 14 Nde na bo ndi: «Be lema aya na me mvuuru yu mbri nde atosoho baari, ŋa me emi lehe nde oduhu o mwa be, ŋa me eka mono dza e mbi e be lebanaha nde o yo ni. 15 Erode se aka mono dza e mbi ni, kya obila o nde atumi nde mpili e bisi. Balaha dzi eka asa dza e mbi eli ove abumi nde o yo ni. 16 Me etuma abeere nde ekatsi, omana me nyasaha nde.» 17 Atsinda a Paake aso, eki ove Pilaate otusihi mvuuru omo ma ongenehe. 18 Bo aso awuli ankema ndi: «Buma balaha dzi! Nyila bisi Barabase!» 19 Barabase aki alehi ongeneŋe, nde atsyesihi baari ntsa onguundu, nde se abumi mvuuru. 20 Pilaate aki na ndzala onyasaha Zezi, ŋa nde ovurihi oyahi mbari. 21 Ŋa bo awuli ankema ndi: «Komo nde ma lembandzi! Komo nde ma lembandzi!» 22 Mo dzwe le otari Pilaate oyahi mbari ndi: «Nde dza e mbi ama sa ma? Me eka mono dza ma buma nde o yo ni. Ŋa me etuma abeere nde ekatsi omana me nyasaha nde.» 23 Ŋa bo aselihi odzisiha na ankema a nkala ndi: «Komo nde ma lembandzi!» Ŋa ankema a bo avili. 24 O ŋa Pilaate oyalihi ndi bo asa ma osuumbu a bo ma dya. 25 Nde onyasihi balaha e bo ma pisihi, eki ma ongeneŋe. Obila nde atsyesihi baari na nde se abumi mvuuru. Nde ompi bo Zezi mo bu ndi, bo asa nde ma osuumbu a bo ma dya.

Leku le Zezi o yula lembandzi

26 Ntini e bo ma birihi nde, bo akwari balaha mo ewa na anguunu, nkuumi e nde Simon osi Sirene. Aworo akwari nde, ma obira lembandzi ngula Zezi. 27 Lemvuuru le kuna leki lelwono nde, eki se na akaasi, ma lila. Ma amono obi obila o nde. 28 Ŋa Zezi okalihi mpili e bo na bo ndi: «Akaasi a Zerizaleme, leka liliha o me ni! Lelila o be anku na mo baana a be! 29 Obila, antini ma aya, ma dze oduha ndi: “Oswere oka na akaasi ma onguma bla akaasi ma akini okula ni, na ma kini ompa baana abyele ni!” 30 O ŋa baari ma adze oduha na ekuri ndi: “Leva o yula bisi!” Na ŋa enguma ndi: “Ledzisiha bisi!” 31 Obila yuhu ma asa bu ma oti obisi, ŋa ma adze osa buni ma oti ama kaa?» 32 Ayi na abalaha akima vwele ma abi se, ma obuma bo bla Zezi. 33 Bo ato obiri ma tswoloho o «Kraane ^{▼▼Kraane kuumi okuri ma komi Zezi ma lembandzi. O dzuuhi la Azife: Golgota. Ŋa ma lembaama okoko otsui. Obila, okuri kya oki oma wwana okoko otsui.}», aworo akomi Zezi o kuri bla abalaha vwele ma abi, yu o kwoho olumi, yu mo kwoho omboho. 34 Ŋa Zezi oduhi ndi: «E Taara boloho bo obila bo i yaa maami a bo ma syaha ni.» Aworo akabihi amfa a nde o mpanihi e bo. Bo aya ma taama ma oswolo mo. 35 Baari aki ŋa ma okeese. Ankumu ma Azife aki ma seɓe nde ndi: «Nde oma vusaha baari akima, ŋa nde se ovusaha nyuru e nde anku, yuhu nde Krisi a Ndzyami ama swolo!» 36 Aworo se aseɓihi nde, ma tsiina mpili e nde, na lempa le nde mali a ŋayi. 37 Ma duha ndi: «Yuhu we nkani Azife vusuha nyuru e we, we anku!» 38 Ŋa leyulu le otsui a nde aki ama teende ndi: «Yu nkani Azife.» 39 Balaha mo o ntsa embeŋe e dzyele ma komi bla Zezi, aki aduha na nde ndi: «We ka Krisi ni? Vusaha nyuru e we we anku, we se ovusaha bisi!» 40 Ŋa buha omo obye na nde ndi: «We vwoho o Ndzyami kali, ni we ma aliisa bla nde ŋa se osuumbu omo? 41 Mo saawe yemihi, saawe lemono ampasi, obila saawe maami abi. Ŋa nde aka sa dza e mbi ni.» 42 Emana nde oluusi ndi: «Zezi yiɓaha me o ntini e we adze oya ma oka nkani.» 43 Zezi okaali na nde ndi: «Me eduha we sisyele, loɓi we aka bla me o biri e mve.»

Leku le Zezi

44 Tari leki leya o mwa ndzanga, mui odimi, lempiiɓi leyi ma osi oso, atari ayiri. 45 Mui odima, mfa eki ntsa ndzo e Ndzyami ebaahi o mwa kari. 46 Zezi owuli nkema enini oduhi ndi: «E Taara me evuura odidima o me ntsa dzyala e we.» Nde omana owoɓo vwa, nde okui. 47 Nkumu aworo ma ekuumi kuumi ama osi o Rome, omoni maami ma yirihi, okuusi lekuma le Ndzyami oya aduha ndi: «Dzaa dzaa balaha dzi eki opeende!» 48 Lemvuuru leso leki leyi, ma omono maami alwari maa, lemoni mo. O ŋa bo avirihi na okuruha endundu ^{▼▼Mpili a Azife, lekuruha le ondundu, ma olaha ndi baari ali o ndoho, si kali bo ami mono obi.} ma obi o bo ma amoni. 49 Andihi a Zezi aso bla akaasi ma baani olwono nde, nkara Ngalili, ma keese osuumbu e maami ma ayirihi.

Alehi Zezi o muuma

50 Eki na balaha mo ma tswolihi o Zuzefe nde aki ntsa ankani ma Azife. Balaha dzya ekihi tele nde se aki balaha e mve. 51 Nde aka yalaha opami bla maami a bo ma asihi ni. Nde aki osi Arimate onguundu Azife. Nde aki adela Onkani o Ndzyami. 52 Nde oyeni mpili e Pilaate ma opisa obiimi o Zezi. 53 Emana nde otsyesi obiimi o yula lembandzi, okuri ntsa mfa e mvunu. Otsuusi ntsa muuma ma tsimi o ntsa akele ^{▼▼Mpili a Azife amuuma akihi yula ekuri ma akele, atubi bulu o ntsa mo.}, muuma dzwa aki akini odziiha mvuuru okema ni. 54 Eki eya tuha na tsuhu ma awuumaha. Tsuhu dzya eki eya etsiina. 55 Akaasi ma awi bla Zezi nkara Ngalili alwoni Zuzefe, bo akeesi ntsa muuma, na osuumbu ma tsuusi obiimi o nde. 56 Emana bo ayeni andzo, bo ayeesi maari bla eyombo ma obiimi. Bo anyiimi tsuhu ma awuumaha mva ma ama teende ntsa angri.