Luke 24

Enyusihi e Zezi

1Tsuhu e ntsomi ntsa etsuhu ntsaami e dzandza ▼

▼Tsuhu dzya mva tsuhu e pulu na saabe. E bo ma baana dzandza.

nkara entsyere, akaasi ayeni antswo. Bo abiri maari bla eyombo e bo ma ayeesi. 2Bo amoni ndi kele lediɓihi onywa a muuma, ami buuna o paani. 3Bo anyunihi, ŋa bo aka basaha obiimi o Zezi a Nkumu ni. 4Bo aki i yaa dzaa oduha ni. Abalaha vwele ayi na e bo ama laasa amfa ma kyeme. 5Akaasi amoni vwoho, apiisi miisi o ntsye. Abalaha ba na bo ndi: «Be lesaha mvuuru ali mwo o mpanihi akui ma oma? 6Nde kuuni onyaŋa, nde oma nyusiha. Leyiɓaha maami a nde aduhi be o ntini e nde aki okini o Ngalili. 7Nde aduhi ndi: “Ove ampi Mwana mvuuru o dzyala ma anga ambiini akomi nde ma lembandzi, ŋa tsuhu otari nde onyusihi ntsa leku.”» 8Ŋa akaasi ayiɓihi mbari e Zezi. 9Bo atsyehi antswo ayeni na aduha na antuma akuumi na omo bla alwoni maamo aso. 10Eki na Mariya a Madala, na Zaane bla Mariya a nguhu a Zaake. Ŋa eki na akaasi akima ma ayeni na aduha maami maa na antuma. 11Ŋa antuma atsimihi ndi bo ma aduha maami ma otsa. Bo se aka yalaha maami a bo ma aduhi ni. 12Ŋa Pyere otemihi oyeni antswo o ntsiini. Nde okemiha bu, omoni amfa atu ma aki ma ama poroho obiimi. Emana nde ovurihi ndzo ntsa lekimi mo maami ma ayiri.

Alwoni vwele o ndzila Emayise

13Ŋa o tsuhu dzi dzya, alwoni vwele o ntsa bo, ayeni na mpuhu ma tswoloho ma Emayise. Osa atari mwele a dzwe ma oto Zerizaleme. 14Bo aki ma awoɓo o mpanihi e bo o maami ma ayiri aso. 15Ntini e bo ma woɓihi o mpanihi e bo, Zezi nde anku otsiini, oya alaana bla bo. 16Bo ma mono nde, okoroho bo i yimba nde ni. 17Zezi opisi bo ndi: «Be oma ledzyehe na owoɓo?» O ŋa bo asuri, bo aya ma mono obi. 18Omo o mpanihi e bo a vwele, a nkuumi Klopase okaali nde ndi: «Ali i yaa maami ma ayiri o Zerizaleme ma etsuhu bi ni, mini we otu?»

19Nde opisi bo ndi: «Mo ama?» Bo akaali nde ndi: «Maami ma ayiri o Zezi a Nazarete! Nde aki owoɓi a mbari e Ndzyami onini. Mbari e nde eki na mpari. Nde osi maami a lwari, o miisi a Ndzyami bla a baari aso. 20Ankumu ma asi ma avwoŋi a saabe bla ankumu maamo, ama mpa nde ndi abuma nde, emana ama komo nde ma lembandzi. 21Bisi leki na tari mbri nde avusaha Isayele. Ŋa loɓi tsuhu otari e maami maa ma asi yira. 22Bisi lema kima, akaasi ake a bla bisi ama dze antswo nkara entsyere. 23Ŋa bo aka mono obiimi o nde ni. Bo ayi na avuriha, aduhi ndi bo ami mono abaandzi. Abaandzi ami duha na bo ndi nde oli mwo. 24Abuha a bla bisi ake se ama dze antswo. Bo amoni maami ma osuumbu akaasi ma aduhi bo. Ŋa bo aka mono nde ni.» 25Ŋa Zezi na bo ndi: «Be baari leli oyalihi kaali. Be ma oyalaha maami ma awoɓi a mbari e Ndzyami ma duhi ntsa etima e be ŋa onono! 26Eki mbaa ove Krisi osi amono ambaɓa, omana nde onyunihi ntsa lekuma le nde?» 27Ŋa Zezi obaani oduha bo maami ma woɓihi o nde ntsa Osaangumu o Ndzyami oso. Ma obaana ma esaangumu e Moyize, tii ngo esaangumu ma awoɓi a mbari e Ndzyami eso.

28Ŋa bo atsiina tuha na mpuhu e bo ma yenihi, Zezi osi mva alaɓaha na bo. 29Ŋa bo akanihi nde ndi: «Ka bla bisi, tsuhu eya ekolo, lempiiɓi leya le eya.» O ŋa nde onyunihi ntsa ndzo, na aka bla bo. 30Nde okuma tanda bla bo, nde oyahi lempeembe. Ovwoni, nde oceɓi ompi bo lo. 31O ŋa bo miisi anahi, bo ayimbi nde. Emana nde onywoŋi o miisi a bo. 32Bo aya ma woɓo o mpanihi e bo vwele ndi: «Saawe leka mono mbaa ntsa etima e saawe o biri e nde awoɓihi na saawe o ndzila, na o nde awobihi saawe o mbari e Ndzyami ni?»

33Bo asarihi asisari, avurihi Zerizaleme. Bo amoni antuma a kuumi na omo ama kusaha abuha bla abuha akima. 34Bo aduhi ndi: «Dzaa dzaa Nkumu ama nyusiha! Nde ama laha nyuru na Simon!» 35Ŋa bo aduhi maami a bo ma moni o ndzila. Na osuumbu a bo ma yimbi Zezi, o ntini e nde atsebi lempeembe.

Zezi alaha nyuru na alwoni a nde

36Bo aki akini ma woɓo vwa Zezi nde anku owasihi o mpanihi e bo, na bo ndi: «Oduusu oka bla be!» 37Bo amoni ongwo bla vwoho yo mini, bo aki ndi odidima obi. 38Ŋa Zezi na bo ndi: «Be lemono ongwo ma oma? Ŋa ekemi ntsa etima e be buni? 39Lekeese dzyala e me bla nyiili. Be lemono mbri me! Letiila me be lemono. Odidima akaɓi kali, eyesi kali. Okoroho be lemono mbri me na dzo.» 40Nde oduha vwa, nde olahi bo dzyala bla nyiili e nde. 41Bo aki akini ntsa oswere na lekimi. Bo akini oyalaha ni. Ŋa nde opisi bo ndi: «Be kuuni na kiila ma odza?» 42Bo ampi nde otini o ntsu ma ama kaanga. 43Nde oyahi tso, odzi o miisi a bo.

44Emana nde na bo ndi: «Lemono maami a me ewoɓihi ntini eme eki ekini bla be. Maami ma ama teende o me ntsa angri a Moyize, na Awoɓi a mbari e Ndzyami bla a Soome, ove amoni mo.» 45Emana nde onaani oyeri o bo ma oyuha maami ma ama teende ntsa Osaangumu o Ndzyami. 46Ŋa nde na bo ndi: «Ama teende ndi, Krisi ove omoni ambaɓa, omana o tsuhu otari nde onyusihi ntsa akui. 47Ma adze otooso mbari o nkuumi e nde, ma esi eso. Baari akaala eku, nde oboloho ambiini a bo, ma obaana o Zerizaleme. 48Be baari le siisa enwa o maami maa aso. 49Ŋa me etuma be ndahi e Taara a me alehi be. Be lesa aka ntsa onguundu, tii ngo e mpari e yulu ewuha be.»

Zezi adze yulu

50Emana nde obiri bo mpili e Betani. Nde osaari dzyala na yulu ma ompa bo andosoho. 51Ntini e nde ampihi bo andosoho, nde otsyehi bla bo, oyeni yulu. 52Bo amana okumuha ma ovwono o miisi a nde, bo avurihi na Zerizaleme bla oswere enini. 53Ŋa bo akiihi antini aso ntsa Ndzo e Ndzyami ma osiha aluumu a Ndzyami.