Luke 3

Zan atooso mbari e Ndzyami

1Tibeere oya nkumu esi e Rome, esiɓi emi yira kuumi na etaani. Posi Pilaate aki lepatima o Zide. Erode Atipase aki nkumu o Ngalili. Filipe okulu Erode aki nkumu a Iture bla Takonite. Lisana nkumu Abilene. 2Aane bla Kayife aki ankumu ma asi ma avwoŋi ma anini. Dzya ntini e Zan ayuhi mbari e Ndzyami, Zan a mwana Zakari o ntsa kayi. 3Zan opori angaala ama osyese okeri a Zurde aso. Nde otoosi mbari ndi: «Leyaha ateeme, ma olaha mbri be na ndzala okaala lebihi le be, mo vwa Ndzyami oboloho ambiini a be.»

4Lemihi le Ezayi owoɓi a mbari e Ndzyami ateendi ntsa osaangumu o nde ndi:
«Mvuuru awula ankema ntsa kayi:
Be leyeese ndzila e Nkumu,
Be lesiila nde ewoombo eka tele.
5Ma adze okiisa ambye aso.
Ma adze obula ekuri eso bla enguma eso.
Ma adze osiila avunu, aka tele,
ma adze oyeese andzila ma abi.
6Ŋa baari aso amono ndi Ndzyami asaha ovusaha bo.»

7Zan na lemvuuru leyi mpili e nde ma oyaha ateeme ndi: «Be mva lekaha le antaari, ayisihi be ma oduma nkala e Ndzyami edze oya na? 8Lesa maami ma ave, ma olaha bu mbri be lemi kaala lebihi le be. Leka tsimiŋa be anku mbri: “Abraame taara a bisi” ni. Ŋa me eduha be Ndzyami abuuna okaala akele ma, akirihi baana ma Abraame. 9Opami a Ndzyami aya mva mvuuru ali na owunu o dzyala ma okumuha eti mpili ekaŋa. Ŋa eti ma eli mburu e mve kali, ma adze okumuha dzo atena o mbaa.»

10Lemvuuru lepisi nde ndi: «Ŋa bisi lesa buni?» 11Nde okaali bo ndi: «Ali na amfa mwele ompi buha mo, aki na biila ompi buha.» 12Atoniŋi ma lepo ▼

▼Baari ma tonoho adoro a ma osi.

, ayi se ma oyaha ateeme, bo na Zan ndi: «E Nkumu, bisi osa buni?» 13Nde okali ndi: «Ntini e be letonoho adoro leka nyuraha mvunu ma pisi ni.» 14Aworo se na Zan ndi: «Ŋa bisi, bisi se osa buni?» Nde ndi: «Lekyele okyehe ma mpa be, leka piiniha baari adoro na lebanaha le maami ni.»

Zan awoɓo ma edzihi e mvuuru avuli nde

15Baari ma dilihi Krisi, atsimiŋi ndi Zan oma kaha nde. 16Zan na bo aso ndi: «Ateeme a me, ateeme ma andza. Okema aya avuli me, o mwa nde me nkara ntsi me i buuna otsise endi e ma akoroho a nde ni. Nde ampa be ateeme ma Oduduma Santi, ateeme a mbaa. 17Nde oli ma lebuhu na nyengese o dzyala, nde adze otsyese mfisi ntsa mburu e mve, nde adze oyaha mburu e mve olehe o kandza. Ŋa nde adze otsuha mfisi o mbaa eli i dima ni.» 18Zan otoosi Ntsya e Mve, na lempa le baari andwo.

Erode bla Zan Batise

19Zan obye na Erode a nkumu a Ngalili ma obila o nde ayahi Erodiade olehi ma andzo, na maami akima kuna ma abi a nde asi. 20O yula maa aso, Erode ovurihi olehi Zan ongeneŋe.

Zezi ayaha ateeme

21Baari aso amana oyaha ateeme, Zezi se oyi na ayaha a nde. Ntini e nde avwonihi, yulu enahi. 22Oduduma Santi osurihi o yulu a nde mva kuumbi, dzuuhi lewi yulu ndi: «We Mwana a me a dya, oswere o me oso oli o yula we.»

Ombisa o Zezi

23Zezi aki abuuna oto ekuumi ma esiɓi etari e nde a baani dzandza le nde. Baari atsimihi ndi nde mwana Zuzefe a mwana Eli. 24Eli mwana Matate, Matate mwana Levi, Levi mwana Meleki, Meleki mwana Zanayi, Zanayi mwana Zuzefe. 25Zuzefe mwana Matatyase, Matatyase mwana Amose, Amose mwana Naume, Naume mwana Eseli, Eseli mwana Nagayi. 26Nagayi mwana Maate, Maate mwana Matatyase, Matatyase mwana Semeyine, Semeyine mwana Yoseke, Yoseke mwana Yoda. 27Yoda mwana Yoana, Yoana mwana Resa, Resa mwana Zorobabele, Zorobabele mwana Salatyele, Salatyele mwana Neri. 28Neri mwana Meleki, Meleki mwana Adi, Adi mwana Kosame, Kosame mwana Elimadame, Elemadame mwana Ere. 29Ere mwana Zezi, Zezi mwana Elyezere, Elyezere mwana Yorime, Yorime mwana Matate, Matate mwana Levi. 30Levi mwana Simion, Simion mwana Zida, Zida mwana Zuzefe, Zuzefe mwana Yoname, Yoname mwana Elyakime. 31Elyakime mwana Meleya, Meleya mwana Mena, Mena mwana Matata, Matata mwana Natame, Natame mwana Davide. 32Davide mwana a Zese, Zese mwana Obede, Obede mwana Buuse, Buuze mwana Sala, Sala mwana Naasone. 33Naasone mwana Aminadabe, Aminadabe mwana Adimine, Adimine mwana Arini, Arini mwana Eserone, Eserone mwana Farese, Farese mwana Zida. 34Zida mwana Zakobe, Zakobe mwana Izaake, Izaake mwana Abraame, Abraame mwana Tera, Tera mwana Naore. 35Naore mwana Seruke, Seruke mwana Rago, Rago mwana Faleke, Faleke mwana Ebeere, Ebeere mwana Sala. 36Sela mwana Kayiname, Kayiname mwana Arefakade, Arefakade mwana Seme, Seme mwana Nowe, Nowe mwana Lameke. 37Lameke mwana Atuzaleme, Atuzaleme mwana Enoke, Enoke mwana Yerede, Yerede mwana Maleleyele, Maleleyele mwana Kayiname. 38Kayiname mwana Enose, Enose mwana Sete, Sete mwana Adam, Adam mwana Ndzyami.