Luke 4

Dzabri asoŋo Zezi

1Zezi awa na Zurde, Oduduma Santi oma luula o nde, Oduduma obiri nde ntsa kayi. 2O kwa, Dzabri osoŋi nde ekuumi ma etsuhu ena. Ntsa etsuhu bya nde aka dza biila ni, emana ŋa ndzala esi nde. 3Dzabri na nde ndi: «Yuhu we mwana Ndzyami, woɓo na kele dzi ekiriha biila.» 4Zezi okaali ndi: «Ateende ntsa osangumu o Ndzyami ndi, mvuuru aka baha lebihi ma lempeembe letu ni.»

5Dzabri obiri nde nkara yulu, olahi nde esi e yulu a ntsye eso. 6Nde na Zezi ndi: «Me edze ompa we onkumu bla osolo e ma esi bya, dzo eso aki ama mpa me. Me se ompa na mvuuru a me edya. 7We owura avwo o miisi a me, dzo eso me edze oka e we.» 8Zezi okaali ndi, ama ateende ntsa Osaangumu o Ndzyami ndi: «We owura avwo eso o miisi a Ndzyami a Nkumu a we, we ovwono eso nde otu.»

9Dzabri obiri Zezi Zerizaleme, nde otsuusi nde o yula ndzo e Ndzyami. Nde na nde ndi: «Yuhu we Mwana Ndzyami va o ntsye! 10Obila ama teende ntsa Osaangumu o Ndzyami ndi: “Ndzyami adze oduha na abaandzi a nde akyele we.” 11Bo ma adze obira we ntsa dzyala e bo ma odema nyiili e we ema tiila o kele.» 12Zezi okaali ndi: «Ateende ntsa Osaangumu o Ndzyami ndi: “We i soŋo Ndzyami a Nkumu a we ni.”» 13Nde oma mana osoŋo Zezi ma angulu aso, Dzabri olaɓihi na nde ma odela oya ntini nkema.

Zezi ovurihi Ngalili

14Zezi ovurihi Ngalili, mpari Oduduma Santi eki ema luula o nde. Baari aya ma woɓo o nde o ntsa ngaala dzya eso. 15Nde oyisihi mbari o ntsa ndzo ma avwonoho. Baari adzuusi nde.

Atsuuri Zezi o Nazarete

16Zezi oyeni Nazarete, mpili ma kuusi nde. Nde onyunihi ntsa ndzo ma avwonoho, o tsuhu ma awuumaha, me esihi e nde e kala. Nde otemihi ma oliira Osaangumu o Ndzyami. 17Ampi nde osaangumu owoɓi a mbari e Ndzyami Ezayi. Nde onaani, oliiri biri ma ama teende ndi:
18«Oduduma a Nkumu oli o me.
Nde ama swolo me, ma otooso Ntsya e Mve na baari ma ali ntsa omvumɓu.
Nde atuma me ma ovusiha baari ma ali ntsa engeneŋe,
ma onaana miisi a baari ma ali i mono ni,
ma ovusiha baari ma ali ntsa ampasi,
19ma oduha ndi ki osiɓi o be lemono eve e Nkumu.»

20Zezi ovuuri osaangumu na odzandzi, oya o ntsi. Baari aso ma aki ntsa ndzo ma avwonoho, ma keese nde. 21Nde na bo ndi: «Maami a be leyuhi ntsa Osaangumu ki, ami mono mo loɓi.» 22Baari aso a siisi enwa e nde, aya kimimi mo mbari e nde e mve. Bo ndi: «Saabe yu ka mwana Zuzefe ni?»

23Ŋa nde na bo ndi: «Be lebuuna ota me ntsintsami dzi mbri: “Osalihi, salaha nyuru e we, we ankulu.” Ŋa be se lebuuna oduha me mbri: “Bisi lema yuha maami a we asi ma onguundu o Kapenaume. Sa ma osuumbu dzwa ntsa onguundu o we.”» 24Nde oluusi ndi: «Ee me eduha be, owoɓi a mbari e Ndzyami se omo ma aka yambaha osi o nde ankulu ni. 25Sisyele me eduha be, ntini owoɓi a mbri e Ndzyami Eli akihi ntsa osi o Isayele, mvula aki aka noho esiɓi etari na otini ni, mpuhu evi ndzala. Ntini dzya se eki na akuuli. 26Ŋa Ndzyami aka tuma Eli mpili e bo aso ni. Nde oswoli okuuli omo akihi ntsa onguundu o Sareta ma osi o Sidon. 27O ntini owoɓi a mbari e Ndzyami Elize akihi o Isayele, eki na se anga ebila, nde aka salaha bo ni. Nde asalihi Naman, osi Siri.»

28Aso ma yuhi nde ntsa ndzo ma avwonoho, abye nkala. 29Bo atemihi, atsuuri nde. Ayeni na nde ntswo onguundu yulu okuri, obiri ma ama twa onguundu o Nazarete. Bo asahi otsiniŋa nde ntsa mbye. 30Nde oyiri o mpanihi e bo, oyeni.

Zezi ovusihi mvuuru aki na edidima ma ebi

31Zezi osurihi Kapenaume, onguundu o ntsa ngaala e Ngalili, nde aki ayisiha o tsuhu ma awuumaha. 32Baari aya kimimi ma osuumbu eyisihi nde bla mpari e Ndzyami. 33«Ntsa ndzo ma avwonoho balaha mo eki na odidima obi. Owuli nkima na nkala.» 34«Aa! We Zezi a Nazarete, we na bisi oma? We omi ya na apama bisi. Me eyaa we, we opeende a Ndzyami atumi!» 35Zezi obye na nde ndi: «Tsuuha o nde!» Oduduma obi obali mvuuru dzwa o ntsye, o mwa okuha. Otsuuhi o nde, aka yusaha nde ngaa ni. 36Bo aso aya kimimi, aya ma ŋiina ompanihi ebo. «Saabe dzi mbari ma? Nde awoɓo na edidima ma ebi na mpari bla lila, dzo ma etsuuha.» 37Okuumu o nde oyeni ntsa ngaala dzya eso.

Zezi Osalihi abyeri

38Zezi otsyehi ndzo ma avwonoho, oyeni ndzo e Simon. Nde obasihi oko o Simon okaasi na obaa o nkala. Bo apisi Zezi ma osalaha nde. 39Nde okumihi o yula okaasi, obye na obaa, obaa owi. O ntsi na ntsi, ŋa nde otemihi, oya ampa bo biila.

40Tari ema va, baari ma aki na abyeri ayi na laha bo na Zezi, nde olehi dzyala o yula bo, bo awuumi. 41Edidima ma ebi etsuuhi na owula ankema: «We Mwana Ndzyami.» Zezi obye na bo ma oka pi. Obila bo adzyaɓi ndi nde Krisi.

Zezi atooso mbari e Ndzyami ntsa andzo ma avwonoho

42Eto na entsyere, Zezi otsuuhi ntsa onguundu ma odze ntsa kayi. Baari aya ma saha nde, bo ayi mpili e nde. Bo akanihi nde ma oduma nde oma dze. 43Nde na bo ndi: «Ove me se yeni na otooso Ntsya e Mve Onkani o Ndzyami, ntsa enguundu ekema. Kya obila o Ndzyami atumi me o yula ntsye.» 44Ŋa nde atoosihi mbari dzya ntsa andzo ma avwonoho a Zide.