Luke 5

Zezi aswolo alwoni a nde antsomi

1Tsuhu lemo Zezi aki osyese a dzaanga e Zenezarete, lemvuuru lema dzenehe nde. Lepya nde, ma oyuha mbari e Ndzyami. 2Nde omoni ambuungu mwele ma osyese a dzaanga, anga mo aki ama suriha ma otsuka apondzi. 3Zezi okumi o ntsa mbuungu mo, mbuungu dzya eki e Simon. Zezi oduhi na Simon ndi tsiina na mbuungu mwa andza. Nde oya o ntsi ntsa mbuungu, ayisiha lemvuuru.

4Nde omana oyisiha, nde na Simon ndi: «Ciisa mbuungu mwa okeri, lehe apondzi ma andza, ma okwara antsu.» 5Simon okaali na nde ndi: «Nkumu, bisi lema dzandza lempiiɓi leso, leka abaha kiila ni. Ŋa me elehe apondzi ma andza lemihi na eduhi e we.» 6Bo alehi apondzi ma andza, akwari antsu a kuna, apondzi aya ma baha. 7Bo atswoli abuha ma aki o mbuungu emo, na ayamaha bo. Bo ayi, aluusi ambuungu a mwele. Antsu ama vula kuna, ambuungu aya ma dzina. 8Simon Pyere oma mono maami maa aso, nde ovi ma avwo o miisi a Zezi. Nde na nde ndi: «Aa Nkumu, labaha na me, me osi ambiini.» 9O ŋa, Simon bla abuha a nde aso amoni vwoho, obila mo kuna antsu a bo ma kwari. 10Zaake bla Zan baana a Zebede, aki bla Simon amoni vwoho se. Ŋa Zezi oduhi na Simon ndi: «We oka monoho vwoho ni, na ema ka we, dzandza e we oma ka lesaha le baari.» 11Bo ama ya na mbuungu o saɓi, asuɓi mo kalihi, alwoni Zezi.

Zezi osalihi nga ebila

12Tsuhu mo Zezi aki ntsa onguundu. Balaha mo, aki na ebila, omono Zezi, oyi na akumuha o miisi a nde mpaa o ntsye. Nde ndi: «Nkumu, me eyaa mbri we odya, we abuuna osalaha me.» 13Zezi olaɓi kwoho, otiili nde ndi: «Me edya, wuuma!» O ŋa, ebila ewi. 14Zezi ndi: «We okaa duha mvuuru ni. Dzyehe na alaha nyuru mpili osi avwoŋi, ma ompa vwoŋi ma osuumbu a Moyize aduhi. Ma olaha mbri we a siisa enwa.»

15Baari kuna ma woɓo o ntsya e nde. Lemvuuru lekuha na e nde, ma oyuha nde, ma osaha nde osalaha angaa a bo. 16Ŋa nde oyeni ntsa kayi na avwono Ndzyami.

Zezi osalihi obuka

17Tsuhu mo Zezi aki ayisiha. Afarizi bla ayisihi ma angri a Ndzyami, aki o ntsi o paani e Zezi. Bo awihi ampuhu ma angaala a Ngalili na onguundu o Zide na Zerizaleme. Mpari e Nkumu eki bla Zezi ma osalaha abyeri. 18Baari ayi bla obuka o yula osari ma osaha osuumbu ma onyunuŋa ntsa ndzo, ma otsuusa nde o miisi a Zezi. 19Baari aki ama vula kuna, bo aka yaa osuumbu onyunuŋa ni, bo akumi yula ndzo. Anaani maha, atuɓi bulu. Apiisi nde bla osari o mwa okuha, o miisi a Zezi. 20Nde omoni oyalihi eki bla bo, na obuka ndi: «Ambiini a we amiboloho.» 21Ayisihi a mbari e Ndzyami bla Afarizi, aya ma awobo ndi: «Yu mvuuru na, atuuha Ndzyami yu? Ongula Ndzyami mvuuru okima abuuna oboloho ambiini? Ndzyami otu!» 22Zezi oyaa etsimiŋi ebo, okaali ndi: «Be bi etsimiŋi ema? 23Osyami kali oma? Leduha le ndi “Ambiini a we amiboloho” si kali ma oduha ndi: “Temeŋe, we olaana?” 24Mo bu mbri be leyaa mbri Mwana Mvuuru na onkumu ma oboloho ambiini o yula ntsye.» Nde na obuka ndi: «Temeŋe, yaha osari a we, dze ndzo.» 25O ŋiŋa, obuka otemihi o miisi a baari, oyahi osari a nde akihi o yula nde, oyeni ndzo. Na okuusa lekuma le Ndzyami. 26Baari aso aki ntsa lekimi na lenyiima, bo ma akuusa lekuma le Ndzyami ndi: «Loɓi bisi lemi mono maami a lwari.»

Zezi oswoli Levi

27Emana Zezi oyeni, otoniŋi lepo a nkuumi Levi, obiri e dzandza. Zezi na nde ndi: «Lwono me!». 28Levi otemihi, osuɓi eso kalihi, olwoni nde. 29Emana Levi osi biila e kuna, otswoli Zezi ndzo e nde na adza. Baari aki kuna, na abuha a nde ma atoniŋi ma lepo. 30Afarizi bla ayisihi a mbari e Ndzyami ma ŋiina, na alwoni a Zezi ndi: «Be ledza, lenywa bla atoniŋi ma lepo, bla asi ma ambiini ma oma?» 31Zezi okaali na bo ndi: «Baari ma ali enganaha kaama mo osalihi kali, abyeri baari ma ali na kaama. 32Me eka aya na atsuolo baari ma tsimiŋa ndi bo ali tele ni, ŋa asi ma ambiini, mo bu ndi bo akaala eku.»

Zezi awoɓo ma ongerehe

33Afarizi na Zezi ndi: «Alwoni a Zan Batise bla abisi ma aka ongerehe ma ovwono. Ŋa alwoni a we, ma adza, ma anywa.» 34Zezi okaali na bo ndi: «Ŋa tsuhu e tsinda e baala be lebuuna onyila andihi ma olumi aki ndzala o ntini olumi ali bla bo? 35Ŋa ntini edze oto, ma adze otsyese olumi o mpanihi e bo. Bya etsuhu ebo ma adze oka ntsa ongerehe.»

36Zezi oti bo ntsintsami ndi: «I buuna oceɓe o baari o mfa e nyarihi ma otwa yulu mfa e kala ni. Osa vwa, abiisi mfa e nyarihi. Obari kya se i vunuha bla mfa e kala ni. 37Mvuuru i buuna olehe mali ma anyarihi ntsa ambiina a kala ni. Caaki mo abuli ambiina. Nde oyeli aso. 38Ove alehi mali ma anyarihi ntsa ambiina ma anyarihi. 39Mvuuru i buuna onywa mali a kala ovurihi opisi ma anyarihi ni. Obila baari ndi: “A kala avuli ove.”»