Luke 6

Zezi Nkumu a tsuhu ma awuumaha

1Tsuhu ma awuumaha, Zezi bla alwoni a nde aki ma yira ntsa nguunu. Alwoni aki ma boloho mburu e ble ▼

▼Ble oma kaha mva mburu aluumu, ma syaha na mpeembe bla yo.

,bo ma miiŋa o dzyala, ma adza. 2Afarizi ake na bo ndi: «Be lema syaha dzaa ma ama lehe saabe ngri o tsuhu ma awuumaha dzi oma?» 3Zezi okaali bo ndi: «Be leka liira osuumbu a Davide asi bla abuha a nde, ntini e bo ma aki ndzala ni?» 4Nde onyuniŋi ntsa ndzo e Ndzyami. Oyahi mpeembe odzi, ompi abuha a nde. Okoroho mpeembe dzya eki odzi eso asi ma avwoŋi. 5Ŋa Zezi na bo ndi Mwana Mvuuru, nkumu a tsuhu ma awuumaha. 6Eto tsuhu ma awuumaha e mo, Zezi onyuniŋi ma oyisiha mbari e Ndzyami ntsa ndzo ma avwonoho. O ŋa balaha mo eki oleme o kwoho olumi. 7Ayisihi a mbari e Ndzyami bla Afarizi aki ma akeese yuhu Zezi asalaha nde o tsuhu ma awuumaha, ma obanaha nde. 8Zezi aki oya etsimiŋi e bo nde na oleme ndi: «Temehe, ka o mwa baari aso.» Nde se otemihi. 9Zezi opisi bo ndi: «Ngri e saabe eduha ndi nki? Lesa leve si lebi o tsuhu ma awuumaha, ma ovusuha mvuuru omuo si ma obuma?» 10Zezi okeesi bo aso, nde na oleme ndi: «Laɓa kwoho.» Nde olaɓi, owuumi. 11Ateendi a mbari e Ndzyami bla Afarizi abiri nkala yo mini, bo ma woɓo o mpanihi e bo ma osaha dzaa e bo ma buuna osa Zezi.

Zezi aswolo antuma a kuumi na vwele

12Tsuhu mo Zezi okumi yula okuri, nde ovwoni Ndzyami lempiiɓi letsiina. 13Tsuhu etsa, Zezi otswoli alwoni a nde. Oswoli kuumi na vwele, nde ompi bo a nkuumi ma antuma. 14Simon a nde aluhi Pyere, na Andre a mwarihi a Simon. Zaake, bla Zan, Filipe bla Batelemi, 15Matye bla Toma, Zaake a mwana Alife na Simon ma tswoloho o Zelote. ▼

▼Zelote, mvuuru ali na ndzala osi o nde.

16Zide a mwana Zaake na Zida osi Sikaryote, atoosihi Zezi.

Zezi ayisiha lemvuuru

17Zezi osurihi okuri bla antuma a nde. Bo asuri o biri odzemi. O ŋa eki na lenkindi la alwoni a nde. Eki se na lemvuuru le Zide leso, na le Zerizaleme na enguundu e ma osyese okeri a Tiire bla Sidon. 18Bo ayi na ayuha mbari ma osaha nde se osalaha bo. Zezi se osalihi ma aki na edidima ma ebi. 19Lemvuuru leso lesahi otiila nde mo mpari eki o nde. Osalihi bo aso.

Oswere bla ndoho

20Zezi okeesi alwoni a nde, na bo ndi:
«Oswere oka na be leli ntsa omvuɓu,
obila Onkani o Ndzyami oli bla be.»
21Oswere oka na be baari leli na ndzala o ntini dzi,
obila nde adela ompa be biila e kuna.
Oswere oka na be baari lelila loɓi,
osuuha be le edze oseɓe!

22Oswere oka na be baari ma ama bele, ma ama tsuura, ma atuuha, na leduha le maami ma abi o be obila o Mwana mvuuru.

23O ntini dzi leswere, lekina na mpari e nyuru obila o puha enini edela be o yulu. Bo ali ma antaami ma akuuru a bo, ma swesihi awoɓi a mbari e Ndzyami.
24«Ndoho eka na be anga osolo,
obila be lemi mana obaha e be mvuuha.»
25«Ndoho eka na be le eli na eso loɓi,
obila be le edze oka ndzala.
Ndoho eka na be leseɓe loɓi,
obila be le edze oka ntsa ndoho, be lelila.»

26«Ndoho eka na be o ntini e baari aso ma dzuusa be, dzwa osuumbu ataara a be ma asihi bla awoɓi a mbari e Ndzyami ma abi!»

Ledya la abuha

27«Me eduha be baari leyuha me, ledya a nga mbele e be. Lesa leve na baari ma ama bele be. 28Lempa baari ma loho be andosoho. Levwono Ndzyami o baari ma woɓiho maami ma abi o be. 29Mvuuru obula we lempali mo baa mo, laha nde baa le odzwele. Mvuuru ayaha we mfa, we i liha nde ngoyi nkema ni. 30Mvuuru opisa we kiila, we ompi. Mvuuru oyaha we kiila, kaa kalaha nde ni. 31Lesa abuha maami a be ledya mbri asa be. 32Yuhu be odya eso baari ma dya be atu, be osaha mbri asa be leve buni? Na asi ma ambiini ma diiŋa se baari ma ali na ndzala bo. 33Yuhu be osyaha leve na baari ma syaha be leve, be osaha mbri asa be leve buni? Anga ambiini se ma syaha vwa. 34Yuhu be obiha eso baari ma abuuna ovuura be, be osaha mbri asa be leve buni? Na anga ambiini se ma abiha ndi abuha avuura bo ma osuumbu dzwa. 35Ŋa ledya anga mbele e be. Lesa leve, lebiha ngori, be ledela obaha puha e nini. Be le edze oka baana a Ndzyami a Nkara Yulu, obila nde oli ove o baari ma anga lebi na baari ma abi. 36Leka ave, mva e taara a be ali ove.»

37Le kaa pamaha abuha ni, Ndzyami se i pama be ni. Le kaa banaha abuha ni, Ndzyami se i banaha be ni. Leboloho abuha, Ndzyami se oboloho be. 38Lempa abuha, Ndzyami ompa be se. Ma adela oluusa we biiɓi o mpye kuna. Nde adze ompa we ma lemihi le we ampa abuha. 39Zezi oti bo ntsintsami ndi: «Mvuuru ali i mono ni abuuna olaha buha ndzila? Mbaa bo vwele avi ntsa bila! 40Olwoni i vula nkumu a nde ni, ŋa olwoni ma ama yisiha yemihi abuuna oka mva nkumu a nde. 41We amono lemfisi leli ntsa diisi le buha, okoroho otini oti oma diisi le we, we i mono ni? 42We aduha na mwana nguhu “otsyese lemfisi mo diisi le nde”! Okoroho otini oti oli o diisi le we, we i mono ni? We na ompyele, sa tsyese o tini oti o diisi le we, omana we tsyese lemfisi o diisi le buha.»

Oti bla mburu e nde

43«Oti ove i buuna ompa mburu e mbi ni. Oti se obi i buuna ompa mburu e mve ni. 44Oti ma yiimbaha mo mburu e nde. Mvuuru i buna otolo mburu e fiige ma eti ma antsyene ni. I buuna otolo ▼

▼Asi Izayele ma syaha mali a ba o mburu e mva elili

mburu e reze ma ongama ni. 45Mvuuru ove otusaha ntsa otima a nde maami ma ave, mva mvuuru ali na osolo ove. Mvuuru obi otusaha ntsa otima a nde maami ma abi mva osolo obi. Obila maami ma tsuuha ma onywa, ma wwaha ntsa otima.»

Andzo a mwele

46«Be letswolo me o “Nkumu, Nkumu” okoroho be i sa a me eduha be ni? 47Mpini mvuuru aya na e me, ayuha mbari e me, ove nde o nyiimi me. Ŋa me elaha be osuumbu eli nde. 48Nde oma kaha mva mvuuru atuhi ndzo ma otsima owuunu nkara ntsina ntsye o yula kele. Ŋa ntuuna oya, ndzo eka buuna booho ni ma etuuŋi ove. 49Ŋa mvuuru ayuha mbari e me, nde i sa a me eduha ni, nde mva mvuuru atsuuŋa ndzo o yula ntsye eli esumu kali, ntuuna eya enyuniŋi ntsa ndzo, o ŋiŋa ndzo etsalihi eso.»