Luke 7

Zezi osalihi odzandzi a nkumu aworo

1Zezi omana owoɓo mbari e nde eso na baari, oyeni Kapenaume. 2Ntsa onguundu kya, eki na nkumu aworo ekuumi kuumi. Odzandzi a nde aki na ngaa e nkala. Nkumu aki na ndzala nde kuna. 3Nde oyuhi ma woɓo o Zezi. Nde otumi akuuru ma Azife na apisa kolo kolo ma oya na avusuha odzandzi a nde. 4Bo ato tuha na Zezi, bo aselihi opisa nde kolo kolo ndi: «Nkumu aworo dzwa mvuuru ove, yamaha nde. 5Nde na ndzala baari a saabe, nde mvuuru atswi ndzo ma avwonoho.» 6Zezi oyeni bla bo, bo aki aya la na ndzo kali. E nkumu aworo ma ekuumi kuumi atumi andihi a nde, na aduha Zezi ndi: «Me na okiimi o we Nkumu, me kaa dya mbri we onyunuha ntsa ndzo e me ni. 7Kya obila o me eka aya me ankulu na amono we ni. Duha dzaa lemo, ŋa odzandzi a me owuuma. 8Me anku se na nkumu a me enyiimaha. Me na aworo o ngula me. Me oduha na omo, mbri: “Dzyehe”, nde oyeni. Me oduha na okema mbri: “Dzyaha”, nde oyi. Me oduha na odzandzi a me mbri: “Sa bu”, nde osi.» 9Zezi oyuha mbari e nkumu aworo, odzuusi nde. Nde okalihi, na lemvuuru lelwonihi nde ndi: «Me kini mono oyalihi mva ki se o Isayele ni?» 10Antuma a nkumu aworo avurihi ndzo e bo, amoni odzandzi omi wuuma.

Zezi onyuusi mwana okuuli

11Emana Zezi oyeni onguundu o Nayine. Alwoni a nde bla lemvuuru aki bla nde. 12Ntini e nde ato ntswo e mpuhu, baari ma adze na obiimi antswo. Okui aki mwana a balaha, nde se aki mwana a kya. Nguhu okui aki okuuli. Lemvuuru le ma onguundu kya lekihi bla okuuli. 13Nkumu omono nde nkerihi esi nde, na nde ndi: «nyila olila!» 14Nde otsiini, otiili osari, abiri ma obiimi asuri. Nde na obiimi ndi: «Odzambu a balaha, me eduha na we mbri temehe!» 15Obiimi oya o ntsi, owoɓi. Zezi oyahi mwana, ovuuri na nguhu a nde. 16Baari aso amoni vwoho, aya ma kuusa lekuma le Ndzyami ndi: «Owoɓi a mbari e Ndzyami onini omi ya o mpanihi e saabe. Ndzyami omi ya na vusuha baari a nde.» 17Antsya a Zezi ayeni ntsa osi o Zide oso, na ma apaani.

Antuma a Zan Batise ayi mpili e Zezi

18Alwoni a Zan Batise aduhi maami maa aso na Zan a nkumu a bo. Ŋa nde otswoli vwele o mpanihi e bo. 19Nde otumi bo mpili e Nkumu na apisa ndi: «We Krisi adze oya? Si kali bisi le dela okema?» 20Bo ato mpili e Zezi bo ndi: «Zan Batise atumi bisi ma opisa yuhu we Krisi adze oya si kali bisi ledela okema?» 21O ntini dzidzya Zezi osalihi a nga angaa kuna, na eleme. Nde otsuuri na edidima me ebi, nde onaani baari kuna miisi. 22Emana nde okaali na antuma a Zan ndi: «Levuruha na aduha Zan a be lemoni, na a be leyuhi: baari ma aki i mono ni, aya ma mono. Eleme eya me edzye, anga ebila ami wuuma, ma ali atsui kali aya ma yuha, akui ami nyusuha. Ami tooso anga omvuɓu Ntsya e Mve. 23Oswere oka na mvuuru ali i suɓa oyalihi kalihi obila o me ni.» 24Alwoni a Zan Batise ama vuruha, Zezi okaali na lemvuuru leki ŋa ndi: «O be leyeni na amono o ntsa kayi oma, le ndziba lefuɓi o pyeɓi, kali? 25Be oma leyeni na amono? Mvuuru ama laasa amfa amvunu? Baari ma laasa amfa amvunu na ma ali na ontaambu, okaha ma andzo ma ankani. 26Be na leyeni na mono? Owoɓi a mbari e Ndzyami? Ee me eduha be, nde ovuli na Owoɓi a mbari e Ndzyami. 27Obila Zan mvuuru ma ama teende ntsa osaangumu o Ndzyami ndi: “Me elehe Ntuma levusu ma oselehe ndzila e we”.» 28Zezi oluusi ndi: «Me eduha be o yula ntsye akini okula mvuuru avuli Zan onini ni. Ma oma mvuuru okyehe ntsa Onkani o Ndzyami ovuli Zan Batise onini. 29Baari aso ma ayuhi nde, na atoniŋi ma lepo aduhi ndi Ndzyami oli tele. Bo ayalihi ndi Zan ompa bo ateeme. 30Ŋa Afarizi bla ayisihi ma angri a Ndzyami abisi ediŋii e Ndzyami o bo, bo se abisi ateeme a Zan Batise.» 31Zezi ovurihi ndi: «Be baari a loɓi me oyelehe be bla na? Bo se owwana na? 32Bo owwana enkere me eli o ntsi, me etaama ma lebuhu, bo ma tswolo abuha ndi: “Bisi leberehe be ngomo, be i kina ni, bisi lemi yima be luumu le ndoho, be leka lila ni.” 33Ma oma, Zan Batise ayi nde i dza biila ni nde i nywa mali a ba ni, be mbri: “Nde na lari.” 34Mwana mvuuru oya nde adza, anywa, ŋa be mbri: “Nde na ndzala odza bla lenywa le mali, nde andihi atoniŋi ma lepo bla anga ambiini!” 35Ntsimi e Ndzyami eli tele mo baari ma ama yalaha nde aso.»

Zezi ntsa ndzo e Simon Ofarizi

36Ofarizi omo otswoli Zezi na adza bla nde. Zezi onyunihi ntsa ndzo Ofarizi oya o tanda. 37Ntsa onguundu kya, eki na okaasi obla. Nde oyuhi ndi Zezi oli ndzo Ofarizi, nde oyi na mbiina oyombo ▼

▼Mbiina e mvunu ma tswoloho mo albatre

e mvunu to. 38Nde oya o ngula Zezi, alila antsya ma va Zezi o yula nyiili. Nde okwomi antsya o mfu e nde, ompi nde amfemfe o nyiili, odzirihi nde oyombo o nyiili. 39Ofarizi atswoli Zezi omono vwa, otsimihi ndi: «Mvuuru yu aki ma oka owoɓi a mbari e Ndzyami, kaa nde adzyaɓi ndi okaasi yu na obla.» 40Zezi na Ofarizi ndi: «Me na dzaa ma oduha we Simon.» Ofarizi ndi: «Woɓo Nkumu.» 41Zezi ndi: «Mvuuru omo obihi baari vwele adoro. A ntsomi ekuumi ma enkama etaani, odzwele ekuumi etaani. 42Ŋa bo aka buuna okasa obiimi kya ni. Obihi na bo ndi i ma kasa ni. Ŋa ntsa bo vwele avuli odya nga adoro na?» 43Simon okaali ndi: «Me etsimiŋa mbri a nde asi mpolo ma obiimi enini.» Zezi okaali ndi: «We na mpyeme.» 44Nde okalihi mpili okaasi, na Simon ndi: «We amono okaasi yu, me nyunihi ntsa ndzo e we, we aka dziriha me andza o nyiili ni. Ŋa nde ama vwoso me nyiili ma antsya, oma kwomo o mfu e nde. 45We aka ampa me amfemfe ni, ŋa lebihi le esi nyuniha nde, nde okini onyila ompa me amfemfe o nyiili ni. 46We aka dziriha me maari o yula otswi ni, nde omi dziriha me oyombo o yula nyiili. 47Kya obila o me eduha we mbri ambiini a nde kuna ami boloho. Ma osuumbu a nde alahi dya e nde enini. Mvuuru ma boloho ntseeri, olaha se dya e nkyehe.» 48Zezi oduhi na okaasi ndi: «Ambiini a we ami boloho.» 49Baari ma aki ma odza bla nde, aya ma tsimiha ndi: «Yu mvuuru abuuna oboloho ambiini na?» 50Zezi na okaasi ndi: «Oyalihi o we omi vusuha we. Dzyehe ntsa oduusu.»