Luk 8 | MdtSC | STEP | Emana Zezi oyeni ntsa ampuhu na enguundu ma otooso Ntsya e Mve Onkani o Ndzyami. Antuma a kuumi na vwele aki bla nde.

Luke 8

Antuma a kuumi na vwele bla akaasi ma lwonihi Zezi

1 Emana Zezi oyeni ntsa ampuhu na enguundu ma otooso Ntsya e Mve Onkani o Ndzyami. Antuma a kuumi na vwele aki bla nde. 2 Eki se na akaasi ma atusihi edidima ma ebi o bo, emana asalihi angaa a bo. Eki Mariya ma atswolo o Mariya a Madala ma tusihi edidima ntsaami. 3 Zaane okari a Suza odzandzi Erode, Sizaane bla akima kuna ma ampihi Zezi biiɓi e bo ma oyamaha nde bla alwoni a nde.

Ntsintsami okuni

4 Lemvuuru lewi ma enguundu eso ma odze mpili e Zezi, nde oti bo ntsintsami ndi: 5 «Mvuuru omo oyeni akuna mburu. Ntini e nde akunihi, mburu e ntsomi evi osyese a ndzila, baari adzarihi, anyui a yulu adzi eso. 6 Mburu e mo evi o yula akele. Biila ekuli, ekayi mo kaama andza. 7 Mburu nkima evi ntsa antsyene, dzo eso ekuli, emana antsyene abumi biila. 8 Mburu e mbisa evi o ntsye eve, ekuli empi mburu kuna kuna. ^{▼▼Like ateendi ekuumi e mburu kuumi.}» Ŋa Zezi owoɓi na ankala ndi: «Ali na atsui ma oyuha, oyuhi!»

9 Alwoni a Zezi apisi ndi ntsintsami dzya ma oduha ndi nki. 10 Nde okaali ndi: «Be lema basaha puha ma oyaa maami ama adzisihi ama Onkani o Ndzyami, ŋa o baari akima, me owoɓo na bo ma antsintsami. Bo ma akeese okoroho bo i mono ni, bo ma ta tsui okoroho bo i yuha yemihi ni.»

Zezi apasa bo ntsintsami dzya

11 Ŋa ntsintsami dzya ma oduha ndi: mburu oma kaha mbari e Ndzyami. 12 Eli osyese a ndzila oma kaha baari ma yuha mbari e Ndzyami omana Dzabri otsyesi mbari ntsa etima e bo, ma oduma bo ama yalaha Ndzyami bo se ama vuuha. 13 Mburu evi o yula akele oma kaha baari ma yuha mbari e Ndzyami, ayalihi yo bla oswere, mbari e Ndzyami ekini obaha ekaŋa nkara ntsa etima e bo ni. Bo oyalaha ma antini ake. Ŋa ntini ampasi bo asuɓi. 14 Mburu evi ntsa antsyene, oma kaha baari ma yuha mbari e Ndzima omana ampasi, bla osolo na eve ma lebihi, elihi bo kula. Bo i ma yele ni. 15 Mburu evi o ntsye e mve, oma kaha baari ma yuha mbari e Ndzyami, aya tele na otima ove. Bo ma kyele yo, omana bo asi maami ma ave, mo nkomoho e bo.

Ntsintsami e baami e mbaa

16 Mvuuru i buuna onaasa baami e mbaa owuhi yo o ndzuu si kali olehi ntsina ntari ni. Nde otsuusa yo o biri eli baari onyunuŋa, amoni oyalala. 17 Maami aso ma ama diɓiha ma dela otsuuha tsuhu mo. Ma ali ma adzisihi aso ma dela oyaa, atsuuha o ndzi. 18 Lesa ayiɓa ma osuumbu a be leyuha, obila mvuuru ali na kiila ma selehe oluusa, mvuuru ali kiila onyaŋa, ma tsyese na okyehe se o biiɓi e nde atsimiŋa oka na dzo.

Zezi alaha nkwono e nde e dzaa dzaa

19 Nguhu a Zezi bla nkwono e nde, ayi na basaha nde. Bo aki i buuna oto mpili e nde ni, obila ma lemvuuru. 20 Baari na Zezi ndi: «Nguhu a we bla nkwono e we ali o ndzi, ma saha omono we.» 21 Zezi okaali na bo ndi: «Nguhu a me bla barihi a me, oma kaha baari ma yuha mbari e Ndzyami ŋa ma asyaha maami a nde.»

Zezi abye na okru

22 Tsuhu mo, Zezi bla alwoni a nde akumi ntsa mbuungu, nde na bo ndi: «Letswe levuula ngula dzaanga. ^{▼▼Dzaanga dzya eki e Galili, ma atwolo se o Zenezarete. Ngula kwa mpili e baari ma ali ka a Azife ni.}Bo se ayeni.» 23 Ntini e bo ma vulihi, tolo lebiri Zezi, okru oyi, andza aluuli o mbuungu, bo aya o mbimbi. 24 Alwoni atsiini na e Zezi, anyuusi nde ndi: «E Nkumu, e Nkumu saabe loɓi lekwa.» Nde onyusihi, obye na okru. Na pyeɓi, na andza elomi. Dzo eso eya kami. 25 Emana nde opisi bo ndi: «Oyalihi o be oli kuni?» Bo amoni vwoho na lekimi. Aya ma woɓo o mpanihi e bo ndi: «Saabe yu mvuuru na, eli na andza na okru ma nyiima nde.»

Zezi osalihi balaha eki na edidima ma ebi

26 Zezi bla alwoni a nde ato osyese osi o Zerezani, eli ngula dzaanga e tele na Ngalili. 27 Ntini e Zezi atsuuhi ntsa mbuungu, balaha mo e ma onguundu kya, aki na edidima ma ebi oyi na avunuha bla nde. Nde aki aya odzyeŋe otaɓa. Aki ayiha i ka o ndzo ni, okaha ntsa antswo. 28 Nde omono Zezi owuli nkema, ovi o miisi a Zezi. Owoɓi na ankala ndi: «We na me oma Zezi, we mwana a Ndzyami a Nkara Yulu? Kolo kolo e we nyila me oswesehe!» 29 Zezi obye na odidima obi ndi: «Tsuuha o nde!» Tso oki oma biha nde o nyuru, akuri nde endi o dzyala ankoso o nyiili, nde otseɓi. Odidima kya obiri nde ntsa ebiri e kayi. 30 Zezi opisi nde ndi: «Nkuumi e we na?» Nde okaali ndi: «Lenkindi la aworo.» Obila edidima kuna eki ema nyuniŋa o nde. 31 Edidima episi kolo kolo na Zezi, ma oduma nde oma tina dzo ntsa mbye leku ^{▼▼Mpili e Ndzyami ama lehe edidima ma ebi ongenege.}. 32 Ŋa dziimi le enguu, leki o paani e bo, ledza biila o yula okuri. Edidima ma ebi na Zezi ndi: «Nyila bisi ledze ntsa enguu.» Nde se oyalihi. 33 Edidima ma ebi etsuuhi o balaha dzya, enyunihi ntsa enguu, dziimi lya se lesurihi ntsa ongulu, lekui. 34 Akyeli ma enguu amono le eyiri, adimi ma antsiini na aduha baari a ma onguundu na ampuhu. 35 Baari atsuuhi na amono maami ma ayiri, bo abasihi balaha ma tusihi edidima ma ebi. Oya o ntsi o paani e Zezi, ama laasa amfa, oya yemihi. Bo amoni vwoho. 36 Baari ma amoni maami ma ayiri aso, ayeni na aduha abuha osuumbu a Zezi avusihi balaha eki na edidima ma ebi. 37 Baari ama osi o Zerezani aso na Zezi ndi: «Cyehe bisi o mpuhu.» Obila bo aki na vwoho yo mini. Zezi okumi ntsa mbuungu ovurihi. 38 Balaha ma tusihi edidima ma ebi na Zezi ndi: «Kolo kolo e we, bira me bla we!» Zezi ovuuri nde ndi: 39 «Vuruha ndzo e we, we oduha maami a Ndzyami asi o we.» Nde ovurihi na aduha ntsa onguundu oso maami a Zezi asi o nde.

Zezi onyuusi mwana Zayirise okaasi. Osalihi okaasi aki na ngaa esiɓi kuumi na dzyele.

40 Ewihi e Zezi ngula ongulu, baari ayambi nde. Ma oma, bo aso adilihi nde. 41 Balaha mo e nkuumi Zayirise, nkumu a ndzo ma avwonoho, owasihi na e Zezi, ovi o nyiili e Zezi. Ovwoni nde ma oya ndzo e nde. 42 Obila nde aki na mwana okaasi, nde aki mwana a kya. Mwana esiɓi kuumi na dzyele. Oli na ngaa e nkala. Zezi o ndzila, lemvuuru leki lepya nde. 43 O ŋa eki na okaasi omo na ngaa ovuvuhu. Esiɓi eki emi yira kuumi na dzyele. Nde aki ama kaɓa adoro kuna mpuhu asalihi a baari. Ŋa mvuuru si omo aka buuna osalaha nde ni. 44 Nde oyiri ngula Zezi, otiili poho e mfa e nde, ovuvuhu owi. 45 Zezi opisi ndi: «Atiili na me na?» Baari aso abisi. Ŋa Pyere ndi: «Nkumu, lemvuuru ledzenehe we, lepya we!» 46 Zezi okaali ndi: «Mvuuru ama tiila me. Me emoni mpari ema tsuuha o me.» 47 Okaasi dzwa omono ndi nde i ma buuna odzisiha ni, oya atiriha, oyi na awura avwo o nyiili e Zezi mwa baari aso. Nde se oduhi obila o nde anaami na Zezi, na osuumbu a nde awuumi o ntsi na ntsi. 48 Zezi na nde ndi: «Kaasi, oyalihi o we omi vusuha we. Dzyehe ntsa oduusu». 49 Zezi okini awoɓo, balaha mo ntu ewi ndzo e Zayirise a nkumu a ndzo ma avwonoho, na nde ndi: «Mwana a we omi kwa nyila oma weele Nkumu.» 50 Zezi oyuha vwa nde na Zayirise ndi: «Kaa monoho vwoho ni, lehe oyalihi, mwana a we a vuuha.» 51 Nde oto ndzo, aka yalaha ndi baari aso anyuniha ni. Ongula Pyere, Zan, Zaake na nguhu bla taara a mwana. 52 Baari aso aki ma olili. Ali o nkwono obila o nde. Zezi ndi: «Lenyila olili, nde okini o kwa ni, oli tolo!» 53 Ŋa bo aya ma seɓe Zezi, ma oma bo aki ayaa ndi mwana ama kwa. 54 Zezi okwari nde o kwoho, owoɓi na ankala ndi: «Mwana me, nyusuha!» 55 Mwana okaasi se oduduma a nde oyi na vriha, otemihi o ntsi na ntsi. Zezi na bo ndi: «Lempa nde biila.» 56 Nguhu bla taara a mwana aya ntsa lekimi. Zezi na bo ndi: «Be lekaa duha mvuuru maami ma ayiri ni.»