Luk 9 | MdtSC | STEP | Zezi okusihi alwoni a kuumi na vwele. Nde ompi bo mpari bla onkumu ma otsuura edidima ma ebi eso, na lesalaha la abyeri.

Luke 9

Zezi otumi alwoni a kuumi na vwele

1 Zezi okusihi alwoni a kuumi na vwele. Nde ompi bo mpari bla onkumu ma otsuura edidima ma ebi eso, na lesalaha la abyeri. 2 Nde otumi bo ma otooso Onkani o Ndzyami, na lesalaha la abyeri. 3 Nde na bo ndi: «Ntini e be ledze, lekaa biriha kiila si omo ni: i bira osuumbu, i bira mpye, na biila, na adoro ni. Be i bira amfa mwele ni. 4 Ntini ma yamba be o ndzo mo, be leki ŋa tii ngo e be le tsyehe mpuhu dzya. 5 Ntini e baari ma ali i yamba be ni, be letsyehi ma onguundu kya, lekuɓihi ogru a mo nyiili e be. Ntini e be lesa vwa, ma olaha mbri be le siisa enwa mo apama bo.» 6 Bo ayeni ma ampuhu. Atoosi Ntsya e Mve, na lesalaha la abyeri.

Erode amono ongwo o mvuuru a nkuumi Zezi

7 Erode Atipase aki nkumu a Ngalili, oyuha maami ma ayiri, ongwo osi nde. Obila maamo ndi: «Zan omi nyusuha ntsa leku». 8 Akema ndi: «Eli omi ya na avuruha». Ma lembisa ndi: «Omo ntsa awoɓi a mbari e Ndzyami a kala omi ya na avuriha.» 9 Erode ndi: «Zan me ti etuma oceɓe nkii, ŋa yu mvuuru okema ma woɓo o nde na?» Nde aki asaha omono Zezi.

Zezi abunuŋa lemvuuru le kuna

10 Antuma ayi na avuriha, aduhi Zezi maami a bo ma asi aso. Nde obiri bo, oyeni na bo la na baari, mpili onguundu o Betesayida. 11 Lemvuuru leyuha vwa, lelwoni nde. Zezi oyambi bo, owoɓi na bo ma Onkani o Ndzyami. Osalihi ma aki na kaama. 12 Tsuhu eki eya ekolo, antuma a kuumi na vwele atsiini mpili e nde ndi: «Vuura baari ntsa ampuhu na andzo a mo paani. Mpili e bo ma baha biri e tolo na biila e bo ma adza. Obila saabe leli o biri e kayi.» 13 Zezi na bo ndi: «Lempa bo biila be anku.» Bo akaali ndi: «Bisi leli ŋa na mpeembe taani na antsu vwele atu. Leke we asaha mbri bisi lema suuma biila mo baari ba aso?» 14 Bo aki ma buuna oto enkama e baari kuna. Zezi oduhi na alwoni a nde ndi: «Leduha bo aka ma antsi asa edzu. Odzu omo ekuumi e baari etaani.» 15 Bo anyiimi, atsuusi baari aso ma antsi. 16 Zezi oyahi mpeembe e taani na antsu a vwele. Okeesi yulu, ovwoni, ompi andosoho o yula biila, okaɓi, ompi na alwoni ma okabaha lemvuuru. 17 Bo aso adzi, adzurihi. Abiri angara kuumi na mwele, ma entiha e biila ma esiili.

Pyere ndi Zezi Krisi

18 Tsuhu mo Zezi avwono o paani bla alwoni a nde. Opisi bo ndi: «Lemvuuru leduha ndi me na?» 19 Bo akaali ndi: «Zan Batise, maamo ndi Eli. Ma lembisa ndi owoɓi a mbari e Ndzyami a kala, ama nyusuha.» 20 Zezi opisi bo ndi: «Mo be, me na?» Pyere okaali ndi: «We Krisi a Ndzyami.»

21 Zezi obye na bo ndi: «Leka duha dzaa dzya na mvuuru ni.» 22 Nde oluusi ndi: «Ove mwana Mvuuru omoni ambaɓa mo mini. Akuuru a ntsa ekuha, ankumu ma asi ma avwoŋi, na ayisihi a mbari e Ndzyami, ma adze obuma nde. Ŋa tsuhu otari nde onyusuhi.»

Osuumbu ma olwono Zezi

23 Emana nde na bo aso ndi: «Mvuuru asaha olwono me, i ma tsimiha o nde anku ni, ove nde obiri lembandzi, ŋa nde olwoni me. 24 Mpini mvuuru asaha okyele lebihi le nde, ayele lo. Ŋa mvuuru adze oyele lebihi le nde o me, adze ovusuha lo. 25 Mvuuru obaha biiɓi e yula ntsye eso, omana nde obiisi lebihi le nde, si kali nde oposihi lo nde anku, nde obaha oma? 26 Mpini mvuuru amono okru o me, na mbari e me, Mwana Mvuuru adze omono okru o nde se, o ntini e nde adze oya ntsa lekuma le nde, na le Taara, na la abaandzi ma epeende. 27 Me eduha be asisyele, maamo o mpanihi e be ŋa ma aka sa kwa yuhu bo akini omono maami ma Onkani o Ndzyami ni.»

Zezi ntsa lekuma le Ndzyami

28 Etsuhu mfwomo eyiri e nde amani owoɓo, Zezi oyahi Pyere, bla Zan na Zaake, okumi yula okuri na avwono. 29 Ntini e nde avwonihi, olya o nde okalihi osuumbu, amfa aya kuɓuhu mva epeŋi e ngari. 30 O ŋa, abalaha vwele aya ma awoɓo bla nde. Eki Moyize bla Eli bo aki awoɓi a mbari e Ndzyami. 31 Bo awasihi. Lekuma le Ndzyami lema dzenehe bo. Ma awoɓo na Zezi ma ekuhi e nde o Zerizaleme. 32 Pyere bla abuha a nde ama ntsa tolo lo mini. Bo anyusihi, amoni lekuma le Zezi, bla abalaha vwele ma aki bla nde. 33 Ntini e Moyize bla Eli ma nyili Zezi, Pyere na nde ndi: «Nkumu saabe ma oka ŋa yemihi. Letwa elebe etari. Omo a we, omo a Moyize, omo Eli.» Pyere aka yaa maami a nde aduuhi ni. 34 Ntini e nde awoɓihi vwa, lenguri lewuhi bo. Alwoni amoni vwoho ntini e bo ma nyuniŋi ntsa lenguri. 35 Dzuuhi lewoɓi ntsa lenguri ndi: «Yu Mwana a me ema swolo, leyuha nde!» 36 Dzuuhi lemana owoɓo, Zezi ama ka nde otu. Alwoni akyeli maami maa, bo aka duha mvuuru o ntini dzya ni.

Zezi asalaha mwana ali na odidima obi

37 Tsuhu etsa, bo asurihi okuri, lemvuuru leyi mpili e Zezi. 38 O ntsa lemvuuru, balaha mo ewuli nkema: «E Nkumu, kolo kolo e we, lehe miisi a we o yula mwana a me a balaha. Me nde mwana a kya! 39 Odidima kya okwari nde o ŋiŋa, nde owuli nkema, tso onyisihi nde na mpari. Awuru aya ma tsuuha nde ma onywa. Odidima kya oswesihi nde kuna, tso ma otsuuha o nde eki na onono. 40 Me vwoni alwoni a we ma otsuura tso, bo aka buuna ni.»

41 Zezi okaali ndi: «Be baari le eli oyalihi kali, be osyaha maami ma abi. Me edze oka bla be, na lebaha le okiini o ma be, tii ngo dzini ntini?» Zezi na balaha dzya ndi: «Ya na mwana a we kuuni!» 42 Ntini e mwana atsiini, odidima obi obali nde o ntsye, onyisihi nde na mpari. Ŋa Zezi obye na odidima obi, osalihi mwana, ovuuri na taara. 43 Baari aso akimi onini o Ndzyami.

Zezi avuriha oduha ndi nde adze okwa

Ŋa baari aso aya ma yuusa Zezi, o maami a nde asihi. Nde na alwoni ndi: 44 «Leyuha maami a me eduha be. Ma adze ompa Mwana mvuuru o dzyala e baari.» 45 Ŋa alwoni a nde aka yuha mbari dzya ni, yo eki lempiini. Ma oduma bo ama yuha, bo amoni vwoho ma olehe nde eduhu.

Avuli abuha o mpanihi alwoni na?

46 Alwoni aya ma awoɓo o mpanihi e bo, ma saha oyaa mvuuru avuli abuha onkumu. 47 Zezi aki oyaa etsimiŋi e bo. Oyahi mwana onkere, otsuusi o paani e nde. 48 Nde na bo ndi: «Mvuuru ayamba mwana yu, o nkuumi e me, nde ayambi me. Mvuuru se ayamba me, nde ayambi mvuuru atumi me. Obila mvuuru avuli onkere o mpanihi e be, dzwa mvuuru avuli abuha onkumu.»

Mvuuru ali mbele e be kali, oli bla be

49 Zan oyahi mbari ndi: «E Nkumu, bisi lemi mono mvuuru atsuura edidima ma ebi o nkuumi e we. Ŋa bisi lema saha okanaha nde, obila nde i lwono we bla bisi ni.» 50 Zezi okaali nde ndi: «Lekaa kanaha nde ni. Obila mvuuru ali mbele e be kali, oli bla be.»

Zezi adze Zerizaleme. Asi Samari aka yamba nde ni

51 Antini aki aya ma tsiina, ma etsyehi e Zezi o yula ntsye, nde okuri eyenihi e Zerizaleme. 52 Otumi baari levusu le nde. Bo ayeni, anyunihi o mpuhu asi Samari, ma oyeese edzihi e Zezi. 53 Bo aka dya o yamba nde ni, obila nde ayenihi na Zerizaleme. 54 Bo amono vwa, alwoni ma tswolo o Zaake bla Zan na Zezi ndi: «E Nkumu asaha bisi leduha mbaa ewa yulu, etsuha bo?» 55 Zezi okalihi mpili e bo, obye na bo. 56 O ŋa bo ayeni mpuhu nkema.

Lelwono le Zezi

57 Ntini eki bo o ndzila, balaha mo na Zezi ndi: «Me edze olwono we, ma ebiri e we adze oyira eso.» 58 Zezi okaali na nde ndi: «Ebahi na abulu ama otsa tolo, anyui a yulu na andzo. Ŋa Mwana mvuuru biri owuuma kali.»

59 Zezi na okema ndi: «Lwono me!» Ŋa balaha dzya ekaali ndi: «E Nkumu, sa nyila me dze na dziiha taara a me.» 60 Ŋa Zezi okaali ndi: «Nyila akui adziiha akui ^{▼▼Akui ma dziiha akui: baari ma ama kwa ma oduduma. Bo oyaligi kali. Ŋa ba baari ma dziiha ebiimi. Alwoni a Zezi dzandza le tooso la onkani o Ndzyami.} a bo. Ŋa we, dzyehe na atooso Onkani o Ndzyami.»

61 Okema ndi: «Me edze olwono we Nkumu, ŋa sa nyila me dze na laasa nkwono e me.» 62 Zezi oduhi nde ndi: «Mvuuru yuhu akuna nguunu nde okwono, nde mva mvuuru ali i buuna odzandza ma Onkani o Ndzyami ni.»