Luk 10 | MfnSC | STEP | Okpe ngwo oseng, Ɔvaar Jisɔs oreng abuwinnam araw attan ukkuma zowanffa adɛgɛ, ɔtɔm bɛ anang ka affa ka affa aba ta ki ifon ɔttara ki iwang rɛno oben abɛ uyɨn.

Luke 10

Jisɔs Ɔtɔm Abuwinnam Pɛ Araw Attan Ukkuma Zowaffa

1 Okpe ngwo oseng, Ɔvaar Jisɔs oreng abuwinnam araw attan ukkuma zowanffa adɛgɛ, ɔtɔm bɛ anang ka affa ka affa aba ta ki ifon ɔttara ki iwang rɛno oben abɛ uyɨn. 2 Jisɔs oteg bɛ abɛ, “Itɔga ibar-ɔbar, anang pi itɔga na sawa. Zɔm atɨm nang Ɔvaar kwi itɔga ɔtɔm atɔm-nang aba akwu kwa attara ki imɨn. 3 Asɔng, azɨma abɛ ntɔm banga otse kwa arɔmaan va ana ninga ko ottemkwɛ kwɨ nttɔ. 4 Nang ɛkpa nwa sa akpog atɨm, nang ɛkpa atɨm, nang ntwag atɨm. Ɔttara nang ɔnang asɨm ke eden.

5 “Odesɛ abanga nwa kɔ ɔtsɔm, atɨmeden aben abɛ, ‘Udɨrada kwu Ubɨnɔkpaabyi unɨnga ɔttara kɔ ɔtsɔm ngwa abɛ.’ 6 Odesɛ ɔnang kwu udɨrada unɨng muma, udɨrada nu nɨnga abɛ, odesɛ ɔnang kwu udɨrada ɔnanu nɨnga, udɨrada no tor abangama oyen. 7 Anɨnga mma kɔ ɔtsɔm ngwo. Atsi attara agwo ɔttɔg fidede pfa aba atɨm akwu. Ukwurabɛ ɔtɔm-nang ɔbanma kwa aba nang-ɛ akpog pɛ. Ananga asenga akpanga ki itsɔm ki itsɔm.

8 “Odesɛ abanga nwa ko ofon abɛ alow banga atsi ɔttɔg fidede pfa aba aber banga. 9 Agweng anang pɔ ɔmma-bɛ-omma muma attara ateg bɛ abɛ, ‘Ɛvaar tsu Ubɨnɔkpaabyi ka abanga effora.’ 10 Odesɛ abanga nwa ko ofon, aba na abanga na taga, asɔng ga nden ro ofon ngwo, aben abɛ, 11 ‘Ububuma kwo ofon ngwa kwɔ ɔbɛr mana kɨ nfokpatwak ka anfɔna masɛ ikamana abɛ Ubɨnɔkpaabyi no opong banga oponga, azɨma abɛ Ɛvaar tsu Ubɨnɔkpaabyi kefora.’ 12 Nteg banga udɨg ɔkka, nuzuw anang pɨ Sodom ɔyɔnga ofon ngwo ki igwu si iponga.

13 “Nupyuw ɔnang banga anang pa Korazin ɔttara anang pa Bɛtsaida, wɛrɛ udabɛ ikkikkkona dɨg da ra aba assi anang banga, aba assi anang anang pa Tai ɔttara Sidon, apyuwa nang mbo, wɛrɛ aba kɨmpyuwaa ndo ɔbɔg atta kan aba nɨnga nyer aba ke ekpo tama aba afona atɨtɔng ke etso. 14 Nuzuw ɔnang Tai ɔttara Sidon ɔyɔnga abangama ki igwu si iponga. 15 Abangama Kapanum abanga na tan abɛ Ubɨnɔkpaabyi nu dɨr banga opfona kɛ ɛrang? Abanga na pfon ke ekpon.”

16 Jisɔs oben abuwinnam abɛ, “Ɔnang kwɔ ɔkɔm itɔng kɔ ɔtonga kwa abanga, ɔtaga ɔtɔnga ngwo ka amma ɔtaga. Ɔnang kwu afum banga ka amma ufuma. Odesɛ aba afum amma aba afum Ubɨnɔkpaabyi kwɔ ɔtɔm-ɔ.”

17 Abuwinnam mbo araw-attan ukkuma zowanffa masɛ aba akwun, aba akwun olew afufɛ, aba ben abɛ, “Ɔvaar Jisɔs akpakpa pyuwa atser ɛnang mana ke etse tsɔ.”

18 Jisɔs ɔpɔn bɛ abɛ, “Amma nse Sɛtan su ubɨn ke ɛrang otto masɛ aman-man. 19 Amma ka abanga ɛffa nnanga tsa abanga ma atɨma abar ɔzɔw ɔttara ka anɨnang, ɔttara abanga akema nffa ibɨng ro oyogikwan, ɔttɔg fɛ mu si banga ko ode. 20 Ɔkwɔn ode abɛ ka abanga ɛffa nzo nnanga, ɔnang banga olew abɛ apyuwa-nang ka tsera anang banga, olew banga abɛ ntse ra abanga kɨnwa kɨ nnwer kwɛ ɛrang.”

21 Ibe ndo ɔkpakpa kwu Ubɨnɔkpaabyi ussi Jisɔs olew-ɛ, oben abɛ, “Amma ntsona Adere Ɔvaar kwɛ ɛrang ɔttara ki iseg. Ukwurabɛ ɔma aduw idɨg nda ka anang pa akam esonga ɔttara pa song nwer, ɔma akwa jag anang anang pa ade masɛ uvava. Ntsera nnang-ɔ, Adere ottem-dɨr kwɔ wɔ ma.

22 “Adere wɔ ɔnang-m ekpo pyidede ibɨng, ɔnang ko ode kwo osong Unwa ono Otte nuda ɔttara ɔnang ko ode kwo osong Otte unu Unwa nuda ɔttara ka anang mbo pu Unwa ɔdagɛ abɛ ɔjag Otte ɔnang bɛ.”

23 Jisɔs ɔwag innam okker abuwinnam, ɔtɔnga abɛma abubɛ mɨntsen, oteg bɛ abɛ, “Uzuw tɔng ɔnang banga sa abanga se idɨg nda ra abanga ase. 24 Nteg banga abɛ ategnkkawa pu Ubɨnɔkpaabyi ɔttara ka avaar aba ror eden tsa abɛ ma se otse kwa abanga ase, abɛ na sa, ɔttara ki idɨg ra abanga awang abɛ na awanga.”

Otse Ɔnang kwu Sameriya Ussi Izuwa

25 Igwu zan ɔnang kwɔ ɔnɔ kpewa inyɨna tsi Mosis ^{▼▼Ɔnang kwɔ ono okpewa nnyina ri Mosis. Ɛma wɔ ono okpewa nnyina rɨ Mosis ri ibe do Ubɨnɔkpaabyi ejag ɛnang oteg-ɛkawa kwɛ Mosis, otse kwa anang pɛ ma arɨg. Aba akker ka atseden nwɛrr byo asen pyu nwɛrr kwu Ubɨnɔkpaabyi.} ubɨna obe abɛ oyoma Jisɔs, ɔbɔw-ɛ abɛ, “Okpewnnwer, mɨ nssiyam pɛrɛ nkama akpen pa ana itɨma na kama?” 26 Jisɔs ɔpɔn-ɛ abɛ, “Inyɨna tsɛ Mosis eben aban? Ɔma ajer yan?” 27 Ema ɔpɔn-ɛ abɛ, “‘Ɔvaar Ubɨnɔkpaabyi ɔdag-ɔ ke ettem tsɔ ibɨng, kɨ ntana rɔ ibɨng, kɔ ɔkpakpa kwo ibɨng ɔttara kɛ ɛffa tsɔ ibɨng’; ɔttara ‘Oyog-rɨg-banga kwɔ ɔdag-ɔ masɛ ɔma oyen.’” ^{▼▼Itɔnga ndo aba akkɛr kɨ nwɛrr kwu Ditrɔnɔmi 6:5 ɔttara ku nwɛrr kwu Levitikɔs 19:18.}

28 Jisɔs oben-ɛ abɛ, “Ka pɔna obengana, sɔng ta assi otse ngwoma fasɛ arɨg akpen.”

29 Ɛma oben abɛ ɔkɔga abe ɛma ode ɔnang ɔkka, ɔbɔw Jisɔs abɛ, “Anɛwɔ ode oyog-rɨg-banga kwam?”

30 Jisɔs ɔpɔn-ɛ abɛ, “Udwunɨng wan ubɨn Jɛrusɛlɛm abɛ ɔta Jɛrikko. Utu pɨra ge eden, oto to kɨ mbɔg ra aruruwa. Aba tsar-ɛ ekpo urɨg irɨnkɨm. Aba kpɨn-ɛ tarr urɨg kɛm oppe. 31 Masɛ uyum muma ɔffɔnɛzza kwu Ubɨnɔkpaabyi okwo oseng ke eden nzo, ukwu use udwunɨng nwo uyɨm muma, ɛma oseng ɔkan-ɔkan. 32 Ɔnang kwɛ no otor ɔffɔnɛzza ukwu seng ma ke eden nzo, ukwu ose udwunɨng nwo uyum muma, ɛma oseng ɔkan-ɔkan. 33 Oyog kwu Sameriya ukwu seng ke eden nzo ose udwunɨng nwo, ussɛ okwo. 34 Ɔta to oker-ɛ, ɔdaw-ɛ awag byo, ɔtaga ana ɔttara ka atwug oke ma ka awag. Udɨra ɔnang nwo ɔnana ke eten tsɛ tsɔnɔ ɔtɔga anang, ɔtɔg-ɛ opfona kɔ ɔtsɔm kwa akiken-nang na yam ayɨma. Okker-ɛ. 35 Si igwu etsow, ɔtaga adinari nffa ɔnang ɔnang nwo kwɔ no okker ɔtsɔm gwo. Oben-ɛ abɛ, ‘Ker-ɛ nang-m tarr mmanga innam, odesɛ akpog mbo anana gba nɨnɔngɔ akpog pa aba arɨg.’”

36 Jisɔs ɔbɔw-ɛ abɛ, “Ka anang bo attan, anɛwɔ ode oyog-rɨg-banga kwɔ ɔnang nwo kwo to kɨ mbɔg ra aruruwa?” 37 Ɔnang kwo osong inyɨna tsɨ Mosis kidan ɔpɔn-ɛ abɛ, “Ɔnang nwo kwɔ ɔkam ikwosisi ɔnang-ɛ.”

Jisɔs oben-ɛ abɛ, “Sɔng ta si otse ngwo.”

Jisɔs uduw Matta ɔttara Meri

38 Si Jisɔs ɔttara abuwinnam abɛ na senga, aba ta wem ko ofon, ukwanɨng kwo okpen Matta, ogwong ɔtsɔm kwɛ ɔnang-ɛ. 39 Ɔkam unwɔkka kwo okpen Meri kwu unɨng ɛyar ɔbanga Ɔvaar ɔnɔ ɔkɔm-ɛ. 40 Matta ɔdwɔg-ɛ ki itɔm sawada rɛ unu si mɨntsen. Ubɨna ɔtɔ bɔw Jisɔs abɛ, “Ɔvaar, uzuw ma abɛ unwɔkka kwam ottem ɔbɔg nkpɨn mɨntsen? Ben-ɛ ukwu kwo otor-m!”

41 “Matta, Matta” Ɔvaar ɔpɔn-ɛ abɛ, “Idɨg kɔmɛ yaga ɔttara ɔdwag-ɔ kidam ke ettem, 42 ɔkam udɨg gwan kwɔ ɔban, Meri kɔ ɔkkapfɛ ɔtaga, ɔnang kwɛ mɔ ɔtaga ɔttɔg ɔkka nvo pfɛ kode.”