Luke 16

Ɔtɔmnang kwo odong odong

1Jisɔs oteg abuwinnam pɛ abɛ, “Ɔkam uzuwadanang kwɔ ɔkam ɔtɔmnang kwɔ ono okker ekpo pyɛ, anang ateg-ɛ abɛ unu udɨm akpog pɛ. 2Oyen nwo ojer-ɛ, oben-ɛ abɛ, ‘Bugudig gwɔ kwɨ nnɨ nwanga ɔbanga ɔmabɛ? Kɛr ekpo mbyo akɔg-m otsekwɛ atɨm ekpo pyam ukwurabɛ adag ekpo pyam makker.’

3“Otserɔtɔm nwo oben ɛma oyen abɛ, ‘Mɨ nssiyang sa ɔnang nwa ono oben abɛ otaga ɔtɔm nva ka kam kɔ ɔbɔg? Amma fɨnɨn nkpɔga kwu mɨ ntɨm iseg ɔttara nkpar nɨnssi mussi sɛ mɨ nshem anang ekpo. 4Nsong udɨg ma kwɛ mɨnssi fasɛ okpe kwɛ kam ukuwa kɔ ɔtɔm pfɛ, nkama ayogudikko pa abɛ ma atag-m nnɨnga abubɛ ka abɛ kɔ ɔtsɔm odesɛ kam ukuwa.’

5“Muma, okwo ojer anang pa aba atsi uzuwadanang nwo ifor, ɔnang kawan kawan. Ɔbɔw otseden nang, ‘Atsi utsetso kwam ofor yan?’

6“Ɔpɔn-ɛ abɛ, ‘Akparakpa nnɔna nffa ra ana po olif.’

“Okerekpo nwo oben-ɛ abɛ, ‘Nɨnga ɛyar ɛwɛrɛwɛrɛ, awag akkɛr abɛ ode apkarakpa ɛnɔna.’

7“Ɔbɔw ɔnang ɔdwag, ‘Ɔma atsi ofor yan?’

“Ɛma opɔn-ɛ abɛ, ‘Abbo araw asen pyi igwanyang.’

“Oteg-ɛ, ‘Wag akkɛr ode abbo araw anebɨng pyi igwanyang.’

8“Uzuwadanang ɔttag ɔtɔmnang pyuwa nwo ki idongini rɛ ukwurabɛ anang pɔ ɔyagbɨn nwa aba adong otse kwa abɛ na asenga ayog abɛ ayonga anang pa anɨng ke esonga. 9Nteg banga, tɨma uzuwada kwɔ ɔyagbɨn assi eyogudikko anang abangama oyen fasɛ odesɛ kɛra, Ubɨnɔkpaabyi ɔtag banga anwa ka akpen pa ana itɨma na kama.

10“Odesɛ akkema atɨma ɔttɔg fi ikikar, nakkokke atɨma ekpo pyi ididen. Odesɛ ana atwɨg anang ki idɨg va, na atwɨg anang ki idɨg ri ididen. 11Odesɛ abanga no otse na asonga kwa abangama asenga atɨma uzuwada kwɔ ɔyagbɨn nwa obengana, abɛ ma assiyan pɛrɛ abɛ atte ɔbɔg ku uzuwada ɔkkakwɛ aba anang banga akker-o? 12Odesɛ ɔma ana ekpo byɔ ɔnang ɔdwag nakka akker obengana, anɛwɔ mɔ ɔnang-ɔ ekpo pyɔ oyen-o?

13“Otserɔtɔm kode kwɛ mɔ ussi ɔtɔm ɔnang atsetso affa ko okpe gwan; nɔ ɔkwan oyog wan, oyog nwoga ɔdag-ɛ; no okpow oyog wan ɔmanga ɔsɛg oyog nwoga. Abanga Ubɨnɔkpaabyi makka ɔkpowa ɔttara ka akpog eden zan.”

14Afarisi pa aba adag akpog aba awanga idɨg ndo aba amma Jisɔs ara 15Jisɔs oben bɛ abɛ, “Abangama na aror abɛ anang ana se banga abɛ abangama ade anang ɔkka ka atsen pa anang, Ubɨnɔkpaabyi osong nttem ra abanga ma. Ɔttɔg fɔ ɔyagbɨn ɔtag abɛ ɔttɔg ɔkka vɔ, apfɛ ɔttɔg nuda ki ititiga tsu Ubɨnɔkpaabyi.”

Nkpewa rɨnjag muma

16“Pɛrɛ Jɔn Opyenga-assi ukwu, inyɨna tsɛ Mosis ɔttara anwɛr pa ategnkkawa pu Ubɨnɔkpaabyi byɔ ini itɨm banga. So oto ko okpe kwe Jɔn Opyenga-assi ɛkkawa zuwa tsɛ Ɛvaar tsu Ubɨnɔkpaabyi, aba anang ka ateg anang, ɔnang kwidede ɔnɔ ɔyɔr abɛ ɔnwa kɛ ɛffa. 17Akwɛ mɔ ɔkar abɛ ɛrang ɔttara ki iseg idɨm ɔyɔnga abɛ ɔttɔg nwa kwi Inyɨna tsu Ubɨnɔkpaabyi idɨm.

18“Ɔnang kwidede kwu ukuw ukwa kwɛ ɔtaga ukwanɨng ɔdwag, abɛ na vag-ɛ kɔ ɔtta, ɔnang kwidede kwɔ ɔtag ukwanɨng kwa aba akuw-ɛ kɔ ɔbada, abɛ na avag-ɛ kɔ ɔtta.

Uzuwadanang ɔttara Lazarɔs

19“Ɔkam uzuwadanang wan kwɔ no oke ekpo pyi izuw-uzuw ɔttara utsi utsapfɛ ɔkkapfɛ igwu tsidede. 20Ma kɛ ɛkamma tsɛ, ɔkam ukpukpora wan kwo okpen Lazarɔs kwɔ ɔkam awag ɛkpakpa ibɨng. 21Ono oben abɛ udwunga utsatɔg pfɛ unu ubɨna ko okpokoro kwu uzuwadanang nwo otto ki iseg; npfa nnɨnkwu ɛttag awag pyu ukpukpora nwo.

22“Ukpukpora nwo okwo oppe, atɔmɔtɔm pu Ubɨnɔkpaabyi akwu akwa adɨr-ɛ apfona ga ikpa re Ebraham. Uzuwadanang nwo okwu kwo oppe. Aba annɔng-ɛ. 23Gɨga ke ekpon su unɨng ki irem, ɔmag atsen ose Ebraham ga ke edeniwur ɔttara Lazarɔs unɨnga ɔjag-ɛ. 24Uzuwadanang nwo ojer kɛ ɛrang, ‘Adere Ebraham, se-m ikwosisi ɔttara tɔm Lazarɔs olag ɛnɔna-tso ka assi udɨr-m ɛdag ukwurabɛ nnɨng ki irem gaga ka akpondag.’

25“Ebraham ɔpɔn-ɛ abɛ, ‘Unwa, zɨma abɛ ko okpe kwa atɨma anɨng ka akpen ku uzuwada kwɔ ataga, Lazarɔs ɔmanga ɔtaga idɨg pyuwa, mazizan ko olew ɔkama, ɔma manga adɔw irem. 26Ɔttara, ɔkam eppe se ekew mana, ɔnang kwo oben abɛ ozega ukwu giga mokke, ɔnang kwo oben abɛ ubɨna ga abanga ukwu gaga mokke.’

27“Uzuwadanang nwo oben abɛ, ‘Toto adere, tɔm Lazarɔs ɔta ga kɔ ɔtsɔm kwo otte kwam. 28Ukwurabɛ nkam uvɔkka pi idwunɨng asen, nror mbɛ ɔta ɔnang bɛ ikamana fasɛ abɛ ananga akwu ma kɔ ɔwang kwi irem.’

29“Ebraham ɔpɔn-ɛ abɛ, ‘Abɛma akam inyɨna tsɛ Mosis ɔttara ka anwɛr pa ategnkkawa pu Ubɨnɔkpaabyi, abɛ tor otse kwa aba akkɛr pyɛ.’

30“Uzuwadanang nwo ɔpɔna abɛ, ‘Mma, adere Ebraham, odesɛ ɔnang ubɨn gaga kɔ ɔwang kwo obo oto okew bɛ, abɛ na atte ipyuwa ɔbɔg.’

31“Ebraham oben abɛ, ‘Odesɛ abɛ na inyɨna tsɛ Mosis ɔttara ka anwɛr pa ategnkkawa pu Ubɨnɔkpaabyi nawanga, ɔnang ɔkwɔna ubɨna ɔshɔwa ko obo, abɛ itɔng kɛma akɔm pɛrɛ abɛ atsera.’”