Luk 17 | MfnSC | STEP | Igwu zan Jisɔs oben abuwinnam pɛ abɛ, “Idɨg rɛ mi issi anang ban atto ni kwukwu, udɨg ode gwan, nupyuw ɔnang ɔnang nwo kwu unussi anang ana atto.

Luke 17

Nkpewa re etsera ɔttara bɨna nang

1 Igwu zan Jisɔs oben abuwinnam pɛ abɛ, “Idɨg rɛ mi issi anang ban atto ni kwukwu, udɨg ode gwan, nupyuw ɔnang ɔnang nwo kwu unussi anang ana atto. 2 Nuzuw ɔnang ɔnang nwo odesɛ aba attaga ɛta se ekpo koga akpan-ɛ ki ikɨkora aba war-ɛ kɔ ɔraanga ɔyɔnga otse kwɛ mu ussi unwanwa wan ussi ipyuwa. 3 Atɨg abangama oyen.

“Odesɛ unwakka ussɔ ipyuwa, kpɛm-ɛ, odesɛ owag akpen, bɨna anang-ɛ. 4 Odesɛ ussi ipyuwa nden nsenaffa ɔnang-ɔ ki igwu, nden ndo nsenaffa, ɔmanga innam ukwu oben-ɔ abɛ, ‘Ndag mɨnssi,’ na abɨn anang-ɛ.”

5 Atɔmɔtɔm pɛ Jisɔs aben Jisɔs abɛ, “Si etsera sa amana ɛbar.” 6 Jisɔs ɔpɔna abɛ, “Odesɛ abanga akam etsera masɛ ɛmama tsa Mɔstad, abanga akema aben itsi nza tsi ididen abɛ, ‘Mag ka aranga ibɨng ata men ga kɔ ɔraanga diden,’ atsɛ ne tser ɛnang banga.

7 “Anyoma abɛ ɔnang wan ma abanga ɔkam otserɔtɔm kwɛ ɔnɔ ɔkpa ɛdam tsɛ, ɔmanga ɔnɔ ɛdam nɔ ɔkpa ono ker nvu rɛ. Sɨma oben-ɛ odesɛ ukwun ki imɨn abɛ, ‘kwu kwa anɨnga ɛyar atsi ɔttɔg?’ 8 Kɛ mo oben abɛ, ‘Si utsapfɛ anang-m, do ɛkpakpa atɨg-m, anang-m utsapfɛ, tarr ntsi nttara ngwo, pɛrɛ ɔma oyen ata atsi attara agwo?’ 9 Sɨma usɨma otserɔtɔm masɛ ussi ɔtɔm fa abɛ aben-ɛ abɛ ussi? 10 Ode otse gwan, odesɛ abangama assi ɔttɔg fɔ ɔban abɛ abanga assi, abanga aben abɛ, ‘Aba atserɔtɔm pa anana anbana, amana kɔ ɔtɔm fɔ ɔban abɛ amana anssi anssa.’”

Jisɔs ogweng anang zow pa akpokora amma bɛ

11 Sɛno osenga opfona Jɛrusɛlɛm, Jisɔs oseng ke elem sɛ Sameriya ɔttara ka Galili. 12 Sɛnɔ ɔnwa ko ofon, anang zow pa atto akpokora aba assɛ, aba akwu ator-ɛ, abe ga ke edeniwur, 13 aba agwon kɛ ɛrang abɛ, “Jisɔs, oyen, se mana ikwosisi.” 14 Okpe kwo ose bɛ, oben bɛ abɛ, “Asɔng ta akoga abangama oyen ga ka affɔnɛzza pu Ubɨnɔkpaabyi.” Sa abɛ na pfona aba kweng. 15 Oyog wan, ibe rɛ oko se abɛ ɛma ko okwenga, ɔmanga innam ɔnɔ ɔttag Ubɨnɔkpaabyi kɛ ɛrang. 16 Ukpuga ndwudwɨng ma ko oro pfu Jisɔs, usɨm-ɛ, ɔnang kwɛ Sameriya. 17 Jisɔs ɔbɔw, “Ode abɛma anang zow pa aba kweng? Anang mboga ɔrɔngwa zow mo? 18 Ɔnang ko ode kwɔ ɔmang innam ukwu kwɔ ɔttag Ubɨnɔkpaabyi unu ukuken nwa nuda?” 19 Jisɔs oben-ɛ abɛ, “Bɨna abe apfona, etsera tsɔ kɔ issa agweng.”

Jisɔs ɔjag otsekwɛ ɛvaar tsu Ubɨnɔkpaabyi mi ikwu

20 Igwu zan Afarisi ban aba abɔw Jisɔs ibe rɛ Ɛvaar tsu Ubɨnɔkpaabyi mi ikwu. Jisɔs ɔpɔn bɛ abɛ, “Ikwada sɛ Ɛvaar tsu Ubɨnɔkpaabyi nida masɛ ɔttɔg pfɛ abanga ma atɨma atsen ase. 21 Makke aben abɛ, ‘Ker tsɛ ma’ pɛrɛ aben abɛ, ‘Ker tsɛ ga,’ ukwurabɛ ɛvaar tsu Ubɨnɔkpaabyi inɨng mama abangama abubɛ.”

22 Oben abuwinnam pɛ abɛ, “Ibe arɛ ikwuma rɛ abangama aror abɛ abanga ase igwu zan tsa atsɛ ede igwu tsu Unwa kwu Udwunɨng, abanga tsɛ masɛ. 23 Anang na aben abɛ, ‘Kɛrɛ giga, kɛrɛ mama,’ nang abubɛ atwan. 24 Otse kwa aman-man ɔnɔ ɔna ikpa dan rɛ ɛrang, oyen ikpa ndoga ibɨng, otse ngwo kwɔ Unwa kwu Udwunɨng mode ki igwu tsɛ. 25 Udɨg gwan ode abɛ, no otseden ɔdɔw irem ki idɨg ri isawɔsaw ɔttara anang pa tsemma na afɨm-ɛ.

26 “Otse kwa akwɛ ode ki ibe rɛ Nowa, akwɛ mo ode otsengwo kɨngwu rɛ Unwa kwu Udwunɨng. 27 Aba atsi, aba gwo, aba ataga ayog kɔ ɔbada tar ki igwu tsu Nowa ɔnwa ga kɔ ɔkpar kɛ ɛntanga, ɔlar ɔnwa ɔfɔ bɛ ibɨng.

28 “Ode otse ngwo ki ibe rɛ Lɔt, abɛ na tsi aba gwo, aba adew aba akpe, aba akpa ndam aba mɨn itsɔm. 29 Ki igwu tsɨ Lɔt ɔraw ga Sodom, ɛrang etew ekpon ɔttara ka ata pye ɛborobor ki idam ɛfɔ bɛ ibɨng.

30 “Otse ngwo kwɛ mode ki igwu tsu Unwa kwu Udwunɨng mu ukwu. 31 Ki igwu nzo, ɔnang kwu unɨng kɔ ɔtsɔm kɛ ɛrang ^{▼▼Apakɔnga ri itsɔm ra anang pi Izɨrɛl ide ɛkpɛkpa, ɔttara anang ana ata ayima akwoga ɔwɔng ɛkpakpa idɨr bɛ.} ɔnang ɔrag abɛ ɛma mɔ ɔtɔ ɔtaga ekpo pyɛ kɔ ɔtsɔm, ko otse ngwo gwan, ɔnang kwu unɨng ki imɨn ɔnang ɔmang opfona ko oter. 32 Abanga azɨma ukwa kwu Lɔt. 33 Ɔnang kwo ɔyɔr abɛ ema mɔ ɔkkana akpen nu udɨm pɛ udɨm, ɔnang kwu udɨm akpen pɛ nɔ nangɔnanga. 34 Nteg banga, anang affa na yɨm ki iwakpa zan, abɛ na tag ɔnang wan, nwaga okponga. 35 Uppanɨng affa na kog ekpo ɔwang gwan abɛ na tag oyog wan urɨg wan. 36 [Anang affa na nɨng ki imɨn, abɛ ataga ɔnang wan arɨg wan].” ^{▼▼Anwɛr kpa pyɛ ɛtam-ɔtam byan pya abɛ atɨm mbɔg akkɛr ka Grik 17: 36 kode, kwo oben abɛ, “Adwunɨng affa aba anɨng ki imɨn, wan abɛ na atag-ɛ arɨg oyɔg.”}

37 Abuwinnam aba abɔw-ɛ, “Maan, Ɔvaar?” Jisɔs ɔpɔna, “Ɔwang kwidede kwa ase upfura, adɛr nagba ma.”