Luke 19

Jisɔs ɔkkana Zakiyɔs

1Jisɔs ɔnwa ka Jɛrikko oseng. 2Ɔnang wan unɨng muma kwo okpen Zakiyɔs, ode otsonang kwa abɔwatasi, ode ɔnang kwɔ ɔkam akpog. 3Ono oror abɛ ose ɔnang kwɛ Jisɔs ode, fɨnu ukka masɛ anang akpa-ɛ eden ukwurabɛ ode ikuma. 4Ɔraw ɛwar opfona go oro utu uvura ki itsi tsɛ Sikamo fasɛ use Jisɔs masɛ mo oseng ke eden nzo. 5Ibe rɛ Jisɔs oto owem ma kɔ ɔwang ngwo, okker kɛ ɛrang oben-ɛ abɛ, “Zakiyɔs, raga ɛwɛrɛwɛrɛ, nɨ nta ko oter kwɔ tsemma.” 6Ma-o, Zakiyɔs ɔraga ɛwɛrɛwɛrɛ, utɨm otemlew olow-ɛ. 7Anang mbo ibɨng pa ase kwɛ aba mɔn abɛ, “Ɛma utu uduw ululoma ko oter kwɛ.” 8Zakiyɔs ubɨna obe oteg Jisɔs abɛ, “Ɔvaar, mɨntaga iwaga dan re eyena kpo pyam anang akpukpora; ɔttara odesɛ kɔ ɔnang ntwuga kɔ ɔttɔg pfidede, nɨmang nnang-ɛ nden nnebɨng.” 9Jisɔs oben-ɛ abɛ, “Tsemma, ɛnnanga ke ewema kɔ ɔtsɔm ngwa, ukwurabɛ ɔnang nwama ogbo ode unwa kwe Ebraham. 10Unwa kwu Udwunɨng ukwu abɛ okwo oror ɔttara ɔkkana anang pa abɛ ka adɨma.”

Otse kwa appɔn zow

11Sa abɛ na akɔm idɨg ndo, okponga ɔtta bɛ otse ukwurabɛ ko fora kɛ Jɛrusɛlɛm, ɔttara aba atan abɛ Ɛvaar tsu Ubɨnɔkpaabyi ɛnam iyɨn ki iyan muma zizan. 12Ɛma oben abɛ, “Ɔnang ɔkka ubɨna ɔta ɛkama zan abɛ aba adaw-ɛ ɛvaar utɨma tsɛ ukwuna. 13Ojer atserɔtɔm pɛ zow otsog ɔwang gwan, ɔnang bɛ appɔn ▼

▼Uppɔn wan: akpog pa abɛ na anang ɔtɔm nang kɨ ngwu araw asen.

zow. Oben bɛ abɛ, ‘Aseng ɛsha tarr nkwɨna.’

14“Anang pɛ ɛkama tsɛ, bɛ nɔ daga, aba atɔm anang aba abuw-ɛ innam aba aben abɛ, ‘Amana ɔnang nwa na rora abɛ ɔdaw mana ɛvaar.’

15“Ɔnang nwo ukwɨna sɛ abɛ kɛ ɛvaar nzo adawa. Okwo ojer atserɔtɔm pɔ ɔnang bɛ akpog mbo fasɛ osonga uru kwa abɛ kassa.

16“Otseden ukwu, oteg-ɛ abɛ, ‘Adere, uppɔn wan kwɔ ka appɔn zow ussa.’

17“Ɛma oben-ɛ abɛ, ‘Kassa obenga, otserɔtɔm zuwa, masɛ kɔ ɔttɔg fi ikikar akkera obengana, ɔma, ker nkama zow.’

18“Otserɔtɔm ɔdwag ukwu, oben abɛ, ‘Adere, uppɔn wan kwɔ ka appɔn asen ussa.’

19“Ɛma oben-ɛ abɛ, ‘Ɔma na adaw ifon isen.’

20“Otserɔtɔm wan ukwu okwo oben abɛ, ‘Adere, ker uppɔn wan kwɔ kwu ndaw kɛ ɛvarakpa ntsog; 21Ozor-m abɛ masɛ ɔma ade ɔnang kwa akar udɨg, ana ataga pfɔ ɔna pfɔ nuda ɔttara assi itɔga kɔ ɔwang kwa ana ɛdam na kpa.’

22“Ɛma oben-ɛ abɛ, ‘Ɔma otserɔtɔm pyuwa, ɛmma tsɔ oyen kɔ ikpa. Ɔma asong ibɨng abɛ amma nkar udɨg, amma nɨ taga pfɛ ɔna pfam nuda, nssi itɔga kɔ ɔwang kwɛ nnɛ ɛdam nɨnkpa. 23Bugudɨg kwɔ kwa ana akpog pam nata aka kɔ ɔwang kwɛ mu uyɨn uru ɔnang-m? Sɛ wɛrɛ nkwɨn akpog mbo ku uru akama.’

24“Okwo oben anang pa abe muma abɛ, ‘ataga uppɔn wan nwo atara ɔnang nwo kwɔ ɔkam appɔn zow.’

25“Aba aben abɛ, ‘Ɛma ɔkam appɔn zow.’

26“‘Nteg banga, ɔnang kwidede kwɔ kam abɛ na tɛr-ɛ ɔttara, ɔnang kwɔ ɔnanɔ kama, pfɔ ɔkamɔkama abɛ na atagɔtaga. 27Ayogikwan mbo pɛ nna bɛ nɨndaga, ataga abɛ akwu abanga afɔ bɛ ma kɛ ɛkwɔ tsam.’”

Jisɔs ukwu ka Jɛrusɛlɛm masɛ Ɔvaar

28Sɛ ki idɨg nda ɔtɔnga, Jisɔs utɨma osenga opfona ikpa rɛ Jɛrusɛlɛm. 29Okpe kwo oto fora Bɛtfej ɔttara Betani, ko Okpetso kwo Olif, ɔtɔm abuwinnam pɛ affa aba atseden aseng. 30“Asɔng ma ko ofon kwu unɨng ma ko oro, sa abanga anwa, abanga na se eten nwa sɛ ɛnɛ tɔga ekpo sa aba dawɔdaw, tsɛ ɔnang ɔnɔ ɔtɔgɔ ɔnana, abanga atsar tsɛ atɨma akwu. 31Odesɛ ɔnang ɔbɔw banga, ‘Bugudɨg kwɔ kwa abanga na tsar tsɛ?’ Abangama pɔn-ɛ abɛ, ‘Ɔvaar oror abɛ utɨma tsɛ.’”

32Aba sɔng apfona aba ta ase tsɛ otse kwɔ ɔtɔng. 33Sa abɛ na atsar tsɛ, oyen abɔw bɛ, “Bugudɨg gwɔ kwa abanga na tsar aten nzo?”

34Abɛma aben abɛ, “Ɔvaar oror abɛ utɨma tsɛ.”

35Abɛ kwa taga eten nzo atsena Jisɔs. Abɛ kwa ataga ekpo pyɛ ɛkpakpa pya abɛ aba ammama azɛ ma ke eten nzo, aba dɨra Jisɔs anana kɛ ɛrang. 36Sɛ ɔnan ma ke eten nzo ono pfona, anang ataga ekpo pyɛ ɛkpakpa pya abɛ aba ammama azɛ ki iseg.

37Sɛ ko fora sa abɛma araga Okpetso kwo Olif, abuwinnam mbo sawada attitso na alow aba attara attag Ubɨnɔkpaabyi kɛ ɛrang ki idɨg ri ididen rɛ kussa:
38“Ɛllɛ ede sɔ Ɔvaar kwu ukwu ke etse tsu Ubɨnɔkpaabyi!”
“Ɛmɛm inɨng ga kɛ ɛrang ɔttara abarada ade pu Ubɨnɔkpaabyi!”

39Afarisi ban pa tar ma kɔ ɔsaw nvo aba ben Jisɔs abɛ, “Okpewnnwɛr, kpɛm abuwinnam pɔ aba myi tɔng.”

40Ɛma ɔpɔn bɛ abɛ, “Odesɛ anang mbama aba myi, nta ndama nɛ egwon kɛ ɛrang.”

41Sa abɛ ta fora Jɛrusɛlɛm ose ofon, uttitso ɔgama ukwur ofon ngwo. 42Oben abɛ, “Odesɛ wɛrɛ ɔma asong idɨg rɛ mi itɨma ɛmɛm ikwu tsemma! Mama zizan idɨg ndo abɛ karɛ aduwa abɛ anang rɛ ase ka atsen. 43Okpe akwɛ ukwuma kwa ayogikwan pɔ ma ake itsɨngkɨma abaw-ɔ, aba araw abaw-ɔ, aba akpam-ɔ ake ko ottemkwɛ ki ikpa ridede. 44Abɛ na dɨr-ɔ azɛ ki iseg, ɔma ɔttara ku uva pa anɨng abɔ, abɛ ɛta zan ma arɨg tsɛ mɛ ɛnana ko oyog ukwurabɛ na asonga okpe kwu Ubɨnɔkpaabyi ukwu ɔkwɔ ɔkkan-ɔ.”

Jisɔs unɨng kɔ ɔtsɔm kwa atɨm

45Okpe kwɛ Jisɔs ɔnwa ga kɔ ɔtsɔm kwa atɨm kwu Ubɨnɔkpaabyi, ukuw anang pa na akpe ekpo. 46Oben bɛ abɛ, “Abɛ akkɛr abɛ, ‘Ɔtsɔm kwam mo ode ɔtsɔm kwa atɨm’; abanga ka kwɛ ataga awag ɔwang kwa aruruwa na tsuwa.”

47Igwu sidede unu unɨnga ma kɔ ɔtsɔm kwa atɨm kwu Ubɨnɔkpaabyi no okpew bɛ. Avaar pa affɔnɛzza, akpewinyɨna tsɛ Mosis ɔttara atsonang pi ifon aba aror eden otse kwa abɛ ma affɛ. 48Abɛ eden sa abɛ ma atɨma na sa, ukwurabɛ anang ibɨng aba na kɔm-ɛ itɔng ki idɨg rɛ nɔ ɔtonga.