Luk 23 | MfnSC | STEP | Muma wɔ atsoanang pi Izɨrɛl aba atɨm-ɛ apfona ga Pailet.

Luke 23

1 Muma wɔ atsoanang pi Izɨrɛl aba atɨm-ɛ apfona ga Pailet. 2 Aba attitso abbal-ɛ idɨg abɛ, “Ka ansa mbɛ ono oben abɛ ɔwag anang pa amana nttem, oror abɛ amana anang Siza atasi annang ɔttara ojer amma oyen Krais Ɔvaar.” 3 Pailet ɔbɔw-ɛ abɛ, “Ɔma wɔ ade ɔvaar kwa Aju sa?” Jisɔs ɔpɔn-ɛ, “Ɔma wɔ atɔng.” 4 Pailet oben avaar pa affɔnɛzza ɔttara ka anang sawada abɛ, “Amma udɨg pyuwa udwunɨng nwa abɛ nɨnsa.” 5 Abɛ akara aben, “Udwunɨng nwa ono oror udɨg ma Judiya ibɨng kɨ nkpewa rɛ, uttitso ga Galili tarr ko owem mama.”

6 Ibe rɛ Pailet ɔwang, ɔbɔw bɛ abɛ, “Udwunɨng nwa ubɨn Galili?” 7 Ibe rɛ Pailet ɔwang abɛ Jisɔs unɨng kɔ ɔwang kwɛ Hɛrɔd utum, ɔtɔm-ɛ opfona ga Hɛrɔd ukwurabɛ Hɛrɔd unɨng ma ka Jɛrusɛlɛm ki ibe ndo. 8 Ibe rɛ Hɛrɔd ose Jisɔs, okwɛ olew-ɛ tɔng, ukwurabɛ eden ki iwura sɛ no oror abɛ ussɛ. Ki idɨg rɛ kɔ ɔwanga, ono oben bɛ ugbu ussi ukkukkona dɨg ɛma osɛ. 9 Hɛrɔd ɔbɔw-ɛ idɨg ri isawɔsaw. Jisɔs fɨnɔ ɔpɔna. 10 Avaar pa affɔnɛzza ɔttara pa akpewinyɨna tsɛ Mosis pa aba abe ma, aba attitso abbal-ɛ idɨg. 11 Hɛrɔd ɔttara ka asɔza pɛ aba assɛ idɨg azaga, aba ayig-ɛ. Aba akɛ anɔma ɔkka, aba atɔm-ɛ ɔmanga innam ga Pailet. 12 Hɛrɔd ɔttara Pailet aba awag ade ayogudikko ki igwu nzo, wɛrɛ aba na akwan ayog kan. 13 Pailet ojer avaar pa affɔnɛzza ɔttara atsonang pi Izɨrɛl ɔttara ka anang, 14 oteg bɛ abɛ, “Abanga atɨma ɔnang nwa atsena amma abɛ ono oben anang abɛ anang udɨg ɔkka assi, amma kɛ nkera ma ki ititiga tsa abanga, udɨg gwan-gwan kwa akwu upyuw-ɛ nɨsa ki idɨg ndo ra abanga aben. 15 Ɔttara Hɛrɔd udɨg pyuwa nusa, akwɛ ma kwɔ ɔtɔm-ɛ otsen mana, udɨg ko ode kwu ussi kwɔ ɔban abɛ oppe. 16 Mɨn nkpɨn-ɛ ntsiwang ntte ɔbɔg opfona.” 17 [Ɔbanma kwa abɛ areng ɔgbakɔw nang wan anang bɛ ke Elowa tse ezzega tsidede.]

18 Abɛma ibɨng aba agwon kɛ ɛrang, “Fɔ ɔnang nwa, reng Barrabas nang mana.” 19 Barrabas aba ake kɨ ngbakkɔw ukwurabɛ ɔze ɛkor ko ofon ɔttara kɛ ɛnang fa. 20 Pailet ɔkɔrɔ ɔtɔnga abubɛ ukwurabe oror abɛ oreng Jisɔs. 21 Aba agwon, “Mɨn-ɛ kɛ ɛkpaga, mɨn-ɛ kɛ ɛkpaga!” 22 Ma no ode nden nttan rɔ ɔbɔw bɛ, “Bag ilom dɔ rɔ ɔnang nwa ussi? Amma udɨg nɨssa kwɔ ɔnang nwa mo oppe, mɨnkpɨn-ɛ ntsiwang, nreng-ɛ.” 23 Abɛma ibɨng aba abɨna agwon kɛ ɛrang abɛ umɨn-ɛ kɛ ɛkpaga. Ɔtɔnga kwa abɛ akwɛ ɔyɔng-ɛ 24 Pailet otsera ɔnang bɛ. 25 Oreng ɔgbakkɔw nang nwo kwɔ ɔzɛ ɛkɔr ɔttara ɔffa ɔnang kwa aba aror abɛ oreng, ɔtaga Jisɔs ɔnang bɛ otse kwa aba aror.

Aba ammɨn Jisɔs kɛ ɛkpaga tso obo

26 Masɛ asɔza atɨm-ɛ abɛ aseng, aba apfuw Saimɔn kwu ubɨn Sirin sɛno oben abɛ ɔnwa ko ofon abɛ otor-ɛ ɔtɔga ɛkpaga nzo kɛ ɛffa ubuw Jisɔs innam. 27 Anang pa asawɔsaw aba abuw-ɛ innam, upanɨng atar muma abɛ na gama ikwosisi arɨrɛ. 28 Jisɔs ɔwag oker upanɨng mbo, oteg bɛ abɛ, “Upanɨng pɛ Jɛrusɛlɛm, abanga adag ka gama ukwur amma, abanga agama ke etso tsa abangama oyen ɔttara ku uva pa abanga. 29 Igwu atsɛ ikwuma sa abanga ma aben abɛ, ‘Uzuw ɔnang azidɨm ɔttara ku upanɨng pa ana ifar ataga atɨma, abba pa abɛ ana ataga azawa. 30 Muma wɔ kwa
“‘abɛ ma aben akpetso dɨm abɛ, “Atto jag mana”
ɔttara aben akpetso va abɛ, “Abuw mana.”’

31 Odesɛ aba assi idɨg nda si itsi ɛtɛgɛ ekkerokker, abɛ ma assi yan ibe rɛ itsi ki ippa?”

32 Anang affa pa ade aluloma aba atɨm bɛ attara Jisɔs aba ata afɔ bɛ. 33 Ibe rɛ aba awem kɔ ɔwang kwo okpen Otsokpa aba mɨn-ɛ kɛ ɛkpaga ɔttara ka aluloma mbo, wan ku udɨm bɔg, nwaga ku ukwa bɔg. 34 Jisɔs oben abɛ, “Adere, bɨna nang bɛ, abɛ ka asong udɨg kwa abɛ na assi.” Aba atɨm ɔssɛ akew anɔma pyɛ ^{▼▼Aba atɨm ɔssɛ akew anɔma pyɛ Ngwa wɛrɛ abɛ ka atɔnga kɨ nnwɛr kwɨ Mmang 22:18.}. 35 Anang abe ɔkanɔkan na akker, atsonang na sɛg-ɛ, aba aben abɛ, “Ɛma nɔ ɔkana anang, ɔgbɔ ɔkana ɛma oyen kadɛ, odesɛ ɛma wɔ ode Krais kwu Ubɨnɔkpaabyi oreng.”

36 Asɔza aba akwu, aba asɛg-ɛ, aba anang-ɛ atwug pa amang-ɔmang, 37 aba aben-ɛ abɛ, “Odesɛ ɔma ade ɔvaar kwa Aju, kana ɔma oyen.” 38 Aba akkɛr ma kɛ ɛkpaga kɛ ɛrang abɛ, “Mama Wɔ ode Ɔvaar kwa Aju.” 39 Ululoma wan kwa aba attara ammɨn kɛ ɛkpaga ɔsɛg Jisɔs abɛ, “Ɔma sang ade Krais? Kana ɔma oyen ɔttara ka abba.” 40 Oyog nwoga okpɛm-ɛ, “Ɔma Ubɨnɔkpaabyi karaw? Otsekwɛ ɛma ose irem sang kwɔ ɔma na asse ma? 41 Abba na dɔw irem ki idɨg ra anssi, ɔnang nwa udɨg pyuwa nussa.” 42 Oben Jisɔs abɛ, “Zɨm-m ibe ra ma anwa kɛ ɛvaar tsɔ.” 43 Jisɔs oben-ɛ abɛ, “Tsemma ɔma na anɨng amabɛ gɛ ɛrang.”

Jisɔs oppe

44 Ibe rɛ Ɔnam owem nkkarankka zowaffa, ugwutwar ubuwa ma ki iseg ndo ibɨng tar owen nkkarankka nttan kɛ ɛya, 45 ukwurabɛ ududon afum ekpon nanga. Ivara ^{▼▼Ivara Ivara ri ididen ibuw ma ke ezze tsɔ ɔwang kwu uwur kidan ma kɔ Ɔtsɔm kwa Atɨm. Ɔffɔnɛzza kwi ididen mɨntsen wɔ ono oyong ivara ndo ɔnwa ga kɔ ɔwang kwu uwur kidan.} ra aba akkpa kɔ ɔtsɔm kwa atɨm itar akpoga affa. 46 Jisɔs ojer kɛ ɛrang, “Adere, ntaga ɔkpakpa kwam nke kɨ mbɔg rɔ.” Okponga ma ubuwa ɛmma.

47 Masɛ ɔnangttama kwa asɔza ose idɨg rɛ ini iyɨn, otsona Ubɨnɔkpaabyi, “Ku udɨg ɔkka udwunɨng nwa akpen pɛ aba ade kpɛrɛdɛ.” 48 Masɛ anang mbo ibɨng pa aba akwu, aba akwa asse otsekwɛ idɨg mi iyɨn, aba ammanga ikwosisi arɨrɛ apfona. 49 Ayognang ibɨng pa asong-ɛ ɔttara ku upanɨng pa aba atwan abɛ soto ga Galili, aba abe ke eden iwur abɛ na akker.

Aba annɔnga Jisɔs

50 Mama, udwunɨng wan kwo okpen Josɛf ɔkpariponga wan kwa anang pi Izɨrɛl, uzuw ɔmanatse, idɨg rɛ unussi gbang. 51 Ɛma fɨno otsera ka ayog akpariponga abubɛ ki iponga ra abɛ akpar, ɛma ubɨn Judiya ofon kwo okpen Arimataya, ɛma unutɨg ibe rɛ Ɛvaar tsu Ubɨnɔkpaabyi mi ikwu. 52 Udwunɨng nwa oto okewa Pailet, ɔbɔw upfura kpakpa tsɛ Jisɔs. 53 Ɛma ɔtaga upfura kpakpa tsɛ Jisɔs ɔraga otsog ki iseg, ɔtag-ɛ ɔtwan ki ivara iwurɛ, ɔtag-ɛ oke ke appekwur tsa aba atɨm ka atakpa ɛtanga, aba ɔnang muma ataga annɔnga, aba atag-ɛ ake muma. 54 Ode igwu tsa abɛ na addo ɛkpakpa atsog ki igwu tsɛ ɛwongkwoga, ɛwɔngkwoga gwu ke effora. 55 Upanɨng pa abɛ abuw Jisɔs innam pa abɨn Galili, aba abuw Josɛf innam aba ta ase eppekwur ɔttara otsekwɛ aba arɨr ɛkpakpa tsɛ Jisɔs. 56 Aba apfona ko oter, aba akwu kwa addo ekpo pe elew irɨg ɔttara ka ana, aba akwoga ɔwɔng kɛ ɛwɔngkwoga gwu otsekwɛ inyɨna ɛtɔng.