Luk 5 | MfnSC | STEP | Igwu zan masɛ Jisɔs nobe ma ka ammakpa po oppekpa kwa aba ajer Gɛnnɛsarɛt, anang abɛ na abuw-ɛ abɛna akɔm-ɛ itɔng kɔ ɔtɔnga kwu Ubɨnɔkpaabyi.

Luke 5

Jisɔs Ojer Abuwinnam Pɛ pa Ade Atseden

1 Igwu zan masɛ Jisɔs nobe ma ka ammakpa po oppekpa kwa aba ajer Gɛnnɛsarɛt, anang abɛ na abuw-ɛ abɛna akɔm-ɛ itɔng kɔ ɔtɔnga kwu Ubɨnɔkpaabyi. 2 Jisɔs ose ikpar iffa ga iranga-konga pa avaga-nten atsog, masɛ abɛna akpow adɨgkpe pya abɛ. 3 Jisɔs ubɨna utu uyiga kɔ ɔkpar kwɛ Saimɔn. Oben-ɛ abɛ twag ɔkpar ngwo kɔgba pfona go ottemkwɛ, Jisɔs ɔrragɛ ɛyar unɨnga ma kɔ ɔkpar okpew anang mbo.

4 Masɛ ke ekpewa nzo ukka, oben Saimɔn abɛ, “Twag ɔkpar ngwo kɛ ɛddɔ, war udɨgkpe nwo fasɛ avaga nten.”

5 Saimɔn oteg-ɛ abɛ, “Adere, abba kɔ ɔtɔm nva anssa kidam ma ki irɨng eten nanvaga. Masɛ kam abena amma nɨnzɔzɛ.”

6 Ibe ra abɛ kwa azɛ kɛ ɛddɔ, aba kwa avaga nten rɨ nsawɔsaw, udɨgkpe ittitso ɔjaag, aba jer ayog. 7 Aba jer ayog pɔ ɔkpar ngwoga aba kwa ator bɛ, aba kwa afu ma ki ikpar ndo iffa, aba atitso aruw ukwur nten ndo.

8 Saimɔn kwa abɛna tara jer-ɛ Pitɛ, ibe rɛ ose udɨg ngwa, ukpuga ndwudwɨng oben-ɛ abɛ, “Ɔvaar Jisɔs bɨna rɨg-m ukwurabɛ amma ululoma anang wɔ.” 9 Pitɛ ɔttara ka ayog-osenga pɛ okkon bɛ kɨ nten ra aba apfuw. 10 Otse ngwo wɔ ayog-osenga Jems ɔttara ka Jɔn uva pɛ Zɛbɛdi ayog ɔtɔm pɛ Saimɔn akwɛ okkon bɛ.

Jisɔs ukwu oben Saimɔn, “Ɔnang-ɔ ozor; otto mama zizan ɔma mana pfuw ayoganang.” 11 Aba atwar ikpar ra abɛ aba tsog kɛ ɛppa, aba bɨna arɨg ekpo pyidede aba abuw Jisɔs innam.

Jisɔs Ogweng Ɔnang kwo Okpokora Ɔmmɛ

12 Masɛ Jisɔs unɨng ko ofon gwan kwu Galili, udwunɨng wan kwa akpokora ibuw-ɛ ɛkpakpa ibɨng ukwu uyɨn, ibe rɛ ukwu ose Jisɔs, otto ɔtaga ititiga tsɛ ukuwa ki iseg utsɨn-ɛ abɛ, “Toto, Ɔvaar ode sɔma kɔdaga si-m ngweng.”

13 Jisɔs ɔtaga ɔbɔg ɔnan-ɛ abɛ, “Amma kamɔdaga, gweng.” Muma wɔ kwa akpokora ɛra.

14 Jisɔs oben-ɛ abɛ, “Nang ɔnang wan wan ateg ɔbanga egwenga nza tsɔ, sɔng ta kɔga ɔma oyen ga kɔ ɔffɔnɛzza kwu Ubɨnɔkpaabyi ataga ɛzza anang-ɛ otsekwɛ Mosis ɔtɔng ɔbanga ekpowa nza ɔnang kwidede osonga abɛ ɔma ka gwenga.”

15 Muma wɔ kwa anang akara awanga ibɨng, anang pa sawɔsaw aba kwu sa aba awang-ɛ ɔttara ogweng bɛ kɨ mmada ra abɛ. 16 Jisɔs otse kwɛ ɛmmana tse ede, unubɨna opfona ki iwang ra anang anade ɔtɔ zɔm atɨm.

Jisɔs Ogweng Ɔnang kwo Oppe Ikpogadan

17 Igwu zan masɛ Jisɔs nokpewa anang, Afarisi ɔttara ka akpewa inyɨna rɛ Mosis aba anɨnga ɛyar muma, aba abɨn ki ifon ki ifon ka Galili, Judiya ɔttara ko ofon kwɛ Jɛrusɛlɛm. Nsam rɔ Ɔvaar inɨnga Jisɔs abɛ, abɛ ussi ɔnang ogweng. 18 Adwunɨng ban aba adɨr ɔnang kwo oppe ikpoga dan ku uwurkpa, aba ayɔr aba atɨma abɛ anwa kɔ ɔtsɔm aba tsog-ɛ ko oro pfɛ Jisɔs. 19 Masɛ aba ana eden nasa ukwurabɛ ayoganang aba sawɔsaw, aba avura kɔ ɔtsɔm kɛ ɛrang, aba agwonga kwɛ aba rag-ɛ ɔmana ma ku uwurkpa abera ma ko otemkwɛ kwa ayoganang, ma ko oro pfɛ Jisɔs.

20 Ibe rɛ Jisɔs ukwu ose etsera tsa abɛ, oteg-ɛ abɛ, “Oyokdikow kɨ nbɨna nnang-ɔ ilom rɔ.”

21 Afarisi ɔttara akpewinyɨna tsɛ Mosis aba atitso atan kɨ nttem ra abɛ, “Bɔg ɔnang wɔma kwo okker ɛma oyen dambɛ ɛma ode Ubɨnɔkpaabyi? Bɔg ɔnang wɔ mokke ubɨna ilom ɔnang ɔnang unu Ubɨnɔkpaabyi nuda?”

22 Jisɔs osonga idɨg rɛ abɛ natan kɨ nttem ɔbɔw bɛ abɛ, “Ode yan kwa abanga natan idɨg nda kɨ nttem ra abanga? 23 Ngwan gwɔ ɔmamɔmam kwɛ ma ben, ‘Nbɨna nnang-ɔ ki ilom rɔ’ ɔttara ‘Bɨna be senga’? 24 Nubenbɛ nsi banga asonga abɛ Unwa kwu Udwunɨng ɔkam ɛffa ma ɔyagbɨn tsɛ mu ubɨna ɔnang ilom.” Jisɔs oteg udwunɨng nwo kwo oppe ikpogadan abɛ, “Nteg-ɔ, bɨna be, taga uwurkpa kwɔ pfona ko oter.” 25 Ibe nuluga ubɨna obe ko oro pfa abɛ ibɨng, udɨra uwurkpa kwɛ kwu nuyuma opfona ko oter ɔttag Ubɨnɔkpaabyi. 26 Ɔnang kwidede akwɛ okkon-ɛ aba ɔttag Ubɨnɔkpaabyi, ozora ɔkwɔ ussi abɛ, aba aben abɛ, “Amana ki ikkikkona idɨg ansa tsemma.”

Jisɔs Ojer Levi

27 Ibe rɛ Jisɔs ukwu ubɨna ma kɔ ɔtsɔm uyɨn ki iyan ukwu ose ɔbɔwatasi kwo kpen Lɛvi ko okpokoro kwa atasi bɔwa. Jisɔs oteg-ɛ abɛ, “Buw-m innam.” 28 Muma wɔ Lɛvi ubɨna obe, ubɨna urig ekpo pyidede ubuw-ɛ innam.

29 Lɛvi ukwu ussi ɔrawa kwi ititam ɔnangɛ Jisɔs ka kɛ kɔ ɔtsɔm, ayog abɔwatasi pa asawɔsaw ɔttara ka anang aba atsi ɔrawa nwo abubɛ. 30 Afarisi ɔttara akpewinyɨna tsɛ Mosis pa atar ki ikpakana ra abɛ, aba azɛ ɛkɔr anang abuwinnam pa Jisɔs, “Bugudig gwɔ kwa abangama ma kwa atsi utsapfɛ, agwo assi ɔttara abɔwatasi ɔttara anang pyuwa abɛ?”

31 Jisɔs ɔpɔn bɛ abɛ, “Ɔnang kwɔ ɔnɛkɛnɔma ussi-ntsakpa kono oror, ɔnang kwɔ ɔmmɛma ɛma wɔ noror ussi-ntsakpa. 32 Amma nɨnkwa nkwu njer anang pa awuruwur, amma nkwu ka anang pyuwa fasɛ aba tte npyuwa ra abɛ ɔbɔg.”

Aba Abɔw Jisɔs ɔbanga okwonɨnga

33 Anang ban aba aben Jisɔs abɛ, “Abuwinnam pɛ Jɔn opyenga-assi abɛ na kɔng okwo nɨnga aba azɔm atɨm ɔttara ka abuwinnam pa Afarisi, ode yan kwa abuwinnam pɔ abɛ na senga atsi aba agwo?”

34 Jisɔs ɔpɔn bɛ, “Abangama sɨma atsog ayogudikko pa ɔnang kwɔ ɔtag ukwanɨng okwo ɔkam bɛ sɛ ɛma unɨng muma abubɛ? 35 Ibe arɛ ikwuma rɔ oyog kwu ussi ɔbada abɛ matagɛ urig bɛ, kɨngwu do abɛ sɨma anɨng okwo.”

36 Jisɔs oteg bɛ abɛ, “Ɔnang kode kwɛ mɔ ɔkpar ivara ɔwarɛ ɔtaga ɔbɔra ivara rarɛ ki itama, odesɛ aba assi otse ngwo, abɛ ki ivara ndo ɔwarɛ ajaga, ivara ndo ɔwarɛ ni ibana ma ki ivara rarɛ ki itama. 37 Ɔnang kode kwɔ nɔ oke atwug ɔwappɛ kɨ nkpa rɨ nvu tenkpa tsɛ kɛ ɛtama, odesɛ aba ake atwug ɔwappɛ kɨ ntenkpa tsɛ kɛ ɛtama, ni dwudwu, ^{▼▼Dwudwu: Nvu tɛnkpa ndo ni idwudwu: assi pa atsidwug abɛ na kpa pye tar apyɛ ɛwag atwug. Sɛnɛ awag atwug ma ɛnɛ ɛmamma etenkpa tsɔ ɔttɔg fa aba ke pyɛ. Odesɛ ɔttɔg fa aba ke pyɛ kɔ ɔtama ɔttara kigwa, ɔttɔg nvo okema ɔmam. Jisɔs ɔnɔ ɔkɔga abɛ idɨg rɛ rɛ ono okpewa anang ɛkam kɨ nkpewa ra Afarisi pyɛ kɛ ɛtama. Ɛtampyɛ ɔttara ka ɔwapyɛ apyɛ meke ɛyaw ɔwang gwan.} atwug na tɔngɔtɔng nvu tenkpa ndo nilugulug. 38 Mma, atwug ɔwappɛ abɛ na ake kɨ nvu tenkpa ɔwarɛ. 39 Ɔnang kode kwɛ ka atwug ɔtampɛ ugwa pɛ mokoro ror atwug ɔwapɛ, no oben abɛ, ‘Atwug ɔtampɛ ba azuw ayɔnga.’”