Luk 18 | MfnSC | STEP | Jisɔs ɔtta abuwinnam pɛ otse abɛ ɔgɔg abɛ, abɛ ana azɔm atɨm okpe kwidede abɛ nang ɔbɔg atte.

Luke 18

Jisɔs oteg otse kwɛ opokwa ɔttara ɔkpariponga

1 Jisɔs ɔtta abuwinnam pɛ otse abɛ ɔgɔg abɛ, abɛ ana azɔm atɨm okpe kwidede abɛ nang ɔbɔg atte. 2 Oben bɛ abɛ, “Ko ofon gwan, ɔkam ɔkparaponga wan kwɔ ɔnɔ Ubɨnɔkpaabyi kɔ ɔraw ɔttara ɔnang ko kpow. 3 Ɔkam opokwa ma ko ofon ngwo, kwu unu utsɨn-ɛ okpe kwidede abɛ, ‘Kan-m si iponga ram obengana ɔnang-m’.

4 “Ko okpe kwa akwɛ kuwura ɔkparaponga nwo udɨg nu ussa, eden zan okwo oben abɛ, ‘Nkwɔna nnu Ubɨnɔkpaabyi kɨ raw ɔttara anang kɨ nkpow, 5 masɛ opokwa nwa kam udɨg ɔyaga ki idam, nɨnkpar iponga rɛ obengana, fasɛ ɔnang mu okwo wem sɛ munu ukwu okpe kwidede.’”

6 Ɔvaar Jisɔs oben abɛ, “Kɔm otse kwɛ ɔkparaponga pyuwa oben. 7 Ubɨnɔkpaabyi udɨg ɔkka mu ussi ɔnang anang pɛ po oreng pana agama ajer-ɛ ki irɨng ɔttara kɛ ɛya? Sɨma ulɨg okpe pɛrɛ ɔkkan bɛ? 8 Nteg banga, nɔ ɔkkan bɛ ɛwɛrɛwɛrɛ. Udɨg udabɛ, okpe kwu Unwa kwu Udwunɨng ukwu, sumu ose etsera ma kɔ ɔyagbɨn?”

Jisɔs ɔtta otse kwɛ Farisi ɔttara ɔbɔwɔatasi

9 Jisɔs ɔkara ɔtta otse ngwa ɔnang anang pa ana ase abɛma oyen abɛ idɨg ra abɛma assi itorotor ko oro pfu Ubɨnɔkpaabyi, aba manga akpɛm ayog. 10 “Adwunɨng affebɨng aba aseng ayɨn ga kɔ ɔtsɔm kwa atɨm kwu Ubɨnɔkpaabyi aba ta azɔm atɨm, oyog wan Farisi, nwaga ɔbɔwatasi 11 Oyog kwu Farisi ubɨna obe ɔzɔm abɛ, ‘Nsɨm ɔma Ubɨnɔkpaabyi abɛ amma masɛ anang banga nɨda pa aba na twug anang, aba assi idɨg ri inanitora ɔttara ayɨma uppanɨng pa anang abubɛ otsekwɛ ɔbɔwatasi nwama. 12 Ɔttɔg kɨntsi ngwu nffa kɛ ɛshagwu nttara nnang wan kwa zow kɔ ɔttɔg fidede pfɨnkam.’

13 “Ɔbɔwatasi so obe ge eden ni iwur, ititiga nɔ maga ogbo oker kɛ ɛrang ɔnɔ manga ɔtaga ɔbɔg uvɨn kɛ ettem ^{▼▼Ɔtaga ɔbɔg uvɨn kɛ ettem Mama wɔ ɔkɔg abɛ ɔnang unɨng ikwɔsisi ɔttara otte ilom ɔbɔg.} oben abɛ, ‘Ubɨnɔkpaabyi kam ikwosisi amabɛ, amma ululoma.’

14 “Nteg banga, okpe kwa aba apfon ko oter, ɔbɔwatasi wɔ kwu Ubɨnɔkpaabyi ɔtag abɛ ode ɔnang ɔkka, farisi sang. Ukwurabɛ ɔnang kwidede kwu udɨr ɛma oyen abɛ na rag-ɛ atsog ki iseg, ɔnang kwɔ ɔrag ɛma oyen abɛ na dɨr-ɛ kɛ ɛrang.”

Jisɔs ɔwɔw uvava itta

15 Anang ban atɨma uvava pi ikikar atsena Jisɔs abɛ ɔnan bɛ ɔbɔg ɔwɔw bɛ itta. Abuwinnam aba ase bɛ, aba akkpɛm bɛ. 16 Jisɔs ɔtwar uvava mbo oke kɛ ɛkwɔ, oben abɛ, “Atte uvava ɔbɔg aba akwu ator-m, anang bɛ eden akpa, ukwurabɛ Ɛvaar tsu Ubɨnɔkpaabyi ede sa anang otse kwa abɛ. 17 Nteg banga udɨg ɔkka, ɔnang kwidede kwɔ ɔnɔ Ɛvaar tsu Ubɨnɔkpaabyi nɔ ɔtaga masɛ unwanwa, kɛ ɛtanga mokke ɔnwa.”

Otsonang ɔbɔw Jisɔs ɔbanga akpen pa ana itɨma akam

18 Otsonang ɔbɔw Jisɔs, “Okpewnnwɛr zuwa, mɨnssi yan pɛrɛ nkama akpen pa ana itɨma na kama?”

19 Jisɔs ɔpɔn-ɛ, “Bugudɨg kwɔ kwa ajer-m izuwa? Ɔnang ko ode kwu uzuwuzuw unu Ubɨnɔkpaabyi nuda. 20 Ɔma asong nnyɨna ma: ‘Nang ukwanɨng kwɔ ɔnang abɛ ayɨm, nang ɔnang afɔ, nang uruw affu, nang ntɛnsɛ kwɔ ɔnang abe sa akwɛ ono otsengwo nuda, Kpowa atte ɔttara ka akka.’”

21 Ɔnang nwo ɔpɔn-ɛ, “Nnyɨna nda ibɨng kɨntsoga sɨntitso ki idɨgkow tsam.”

22 Okpe kwɛ Jisɔs ɔwang otsengwo, oben-ɛ, “Urɨg ɔttɔg van fɛma assi, sɔng ta akpe ekpo pyɔ ibɨng ataga akpog mbo anang akpukpora, ma akama uzuwada giga kɛ ɛrang, odesɛ kassa otsengwo kwu kwa abuw-m innam.”

23 Okpe kwɔ ɔnang nwo ɔwang otsengwo utitso unɨnga ikwosi ukwurabɛ ɔkam uzuwada tɔng. 24 Jisɔs ose ɔnang nwo su unɨng ikwosisi, oben abɛ, “Akwɛ nɔkarɔkar pɛrɛ uzuwadanang ɔnwa kɛ Ɛvaar tsu Ubɨnɔkpaabyi. 25 Akwɛ nɔ mamɔmam abɛ eten tsɛ ɛtɔga ekpo ɛnwa ke ezze tsɔ ɔnya ɔyɔnga abɛ uzuwadanang ɔnwa kɛ Ɛvaar tsu Ubɨnɔkpaabyi.”

26 Anang pa aba awang kwɛ aba abɔw, “Anɛwɔ kwɛ mɔ ɔnnanga?”

27 Jisɔs ɔpɔna, “Ɔttɔg fo oyoganang ɔnamoke ussi Ubɨnɔkpaabyi nokoke ussi.”

28 Pitɛ oben abɛ, “Abba ke ekpo pya amana ibɨng nbɨna anrɨg ambuw-ɔ innam.”

29 Jisɔs oben bɛ abɛ, “Nteg banga udɨg ɔkka, ɔnang ko ode kwu ubɨn urɨg ɔtsɔm, ukwa, uvɔkka, otte, ɔkka ɔttara ku uva ukwur Ɛvaar tsu Ubɨnɔkpaabyi, 30 kwɛ aba nɛkɛma anang ɔyɔnga ekpo pyɛ wɛrɛ ɔkam ma ka akpen mba, ɔttara kɔ ɔyagbɨn kwɛ mu ukwu na akam akpen pa ana itɨma na kama.”

Jisɔs ɔtɔnga ɔbanga obo kwɛ oyen adɛgɛ

31 Jisɔs ɔtaga atɔmɔtɔm mbo zowanffa mɨntsen otsog ɔwang gwan, oteg bɛ abɛ, “Akɔm itɔng, amana ana ta Jɛrusɛlɛm, idɨg ndo ra ategnkkawa pu Ubɨnɔkpaabyi akkɛr ɔbanga Unwa kwu Udwunɨng arɛ iyɨn. 32 Abɛ ma atag-ɛ anang anang pa aba ana Izɨrɛl nabɨna, aba ammɛ ara, aba reng-ɛ nkpar, aba ashɛ attabɨng. 33 Abɛ ma akpɨn-ɛ ntsɨwang, aba afɔ-ɛ. Sɔ ɔgba ngwu nttan nɔ ɔshɔw ko obo.”

34 Atɔmɔtɔm akwɛ bɛ no ogwonga udɨg kwɛ Jisɔs ɔtɔng, akwɛ bɛ no ogwonga, ukwurabɛ otse kwi idɨg ndo iyɨn Ubɨnɔkpaabyi uduw pyɛ uduw.

Jisɔs ogweng oshemekpo kwɔ ɔkpatsen

35 Sɛ Jisɔs namo owem Jɛrikko, ɔkpatsen unɨng ɛyar ma ke eden ɔkanɔkan ono shem ekpo. 36 Ibe rɛ ɔwang ɔssaw fɛ no oseng, ɔkpatsen nwo ɔbɔw udɨg kwa kwɛ nu yɨn. 37 Aba teg-ɛ, “Jisɔs kwɛ Nazarɛt wɔ no oseng ma.”

38 Ɛma ogwon kɛ ɛrang, “Jisɔs Unwa kwɛ Devid ^{▼▼Unwa kwɛ Devid Mama wɔ ode etse ɔdwagɔdwag tsɛ Krais. Ategnkkawa pe etseden ka abena abɛ Krais mu ubɨna ke effona tse Devid. Jer Luk 1:32 ɔttara 4:31.}, sem ikwosisi!”

39 Anang pa ana asenga ga ko oro pfɛ Jisɔs aba akpɛm-ɛ abɛ umyi zɨm. Muma wɔ kwɛ ɛma ɔgama kidam, “Unwa kwɛ Devid sem ikwosisi.”

40 Jisɔs obe, oben bɛ abɛ aba atag-ɛ ukwu. Okpe kwɛ kɛ offora, ɔbɔw-ɛ, 41 “Aben abɛ nssi mbang nnang-ɔ?” Ɛma ɔpɔna abɛ, “Ɔvaar, nrow mbɛ nse iyan.”

42 Jisɔs oben-ɛ abɛ, “Se iyan, etsera tsɔ kɔ issa agweng.” 43 Muma zizan, ose iyan, utitso ɔtwan Jisɔs abɛ ɔnɔ ɔttag Ubɨnɔkpaabyi. Okpe kwa anang mbo ibɨng aba ase, aba attara aba attag Ubɨnɔkpaabyi.