Luke 21

Opokwa ɔnang ɛnanga

1Masɛ Jisɔs oker kɛ ɛrang, azuwadanang abɛ na anang ɛnanga ki ikwukwu tsɛ ɛnanga kɔ ɔtsɔm kwa atɨm. 2Ɛma okoro ose opokwa kpokpora kwɔ ɔnang apɛni va affa. 3Oben bɛ abɛ, “Nteg banga udɨg ɔkka, opokwa kpokpora nwa wɔ ɔnang ɔyɔnga ayog mboga ibɨng. 4Anang mbaga areng ku zuwada kwa abɛ aba anang; opokwa nwa ko okpor pfɛ ɔtag ibɨng ɔnang.”

Jisɔs ɔtɔnga illɨga tsɔ ɔtsɔm kwa atɨm

5Abuwinnam ban pɛ Jisɔs abɛ na atɔnga ɔbanga azuwada pɛ nta ra aba atɨm assi ɛnya kɔ ɔtsɔm kwa atɨm kwu Ubɨnɔkpaabyi ɔttara kɛ ɛnanga sa aba assi anang Ubɨnɔkpaabyi. Jisɔs oben, 6“Mbyama ibɨng pya abanga ase ma, ibe arɛ ikwuma, ɛta zan mi irɨg sɛ mɛ ɛnana ko oyog, abɛ na annun ibɨng azɛ ki iseg.”

7Aba abɔw, “Okpewnnwer, bigi ibe dɔ ri idɨg nda arɛ mi iyɨn? Mbang vɔ ode ɛkɔga abɛ idɨg nda arɛ nami iyɨn?”

8Jisɔs ɔpɔna: “Abanga addo akker aba anang banga alɛg. Anang pa asawɔsaw abɛ na kwu ke etse tsam, aba aben abɛ, ‘Amma ɛma wɔ,’ ɔttara ‘Ibe kifora.’ Nang bɛ innam abuw. 9Ibe rɛ awang idɨg rɨ nkpong ɔttara kɨ nrɨma, akwɛ ɔnang banga udɨg ɔyag, idɨg nda arɛ niyɨn pɛrɛ, ekponginnam sang mama.”

10Ɛma okwo oteg bɛ abɛ, “Ifon ni irɨm ifon abubɛ, ɛvaar ni irɨma ɛvaar atsitsɛ. 11Oseg fɔ ɔsawɔsaw nɛ ɛkpar etto kɛ ɛtanga, okwo ɔttara ki ikamana pyuwa ki iwang ki iwang ɔttara idɨg ri izorozora ɔttara ɛkɔga abɛ na ase kɛ ɛrang.

12“Pɛrɛ idɨg nda ibɨng arɛ iyɨn, abɛ na atittso apfuw banga kɛ ɛffa, abɛ anang banga irem, abɛ atag banga ake ka adappa ɔttara aba ake banga ngbakɔw, abɛna atɨm banga apfona ka avaar ɔttara anang pa atɨm ɔyagbɨn seg ra abanga ukwur ka kam ke etse. 13Mama wɔ ode ɛwang tsɛ ma ateg ɔtɔnga zuwa ɔbanga amabɛ. 14Nang ettem tsɔ udɨg ayag tsekwɛ ma apɔna, pɛrɛ ibe ndo ikwu. 15Nɨnang banga itɔnga ɔttara esonga tsɛ abanga ma atɨma pa ayogikwan pɔ aba annama ake affɨm ɔttara akkar banga ɛmma. 16Anang pɔ, aba atte ɔttara ka aba akka, uvakka pa adwunɨng, pu uppanɨng, ɔttara ayogudɨkko pɔ, abɛ na atag banga anang anang pa atɨm iseg, aba afɔ ayog ban. 17Ɔnang kwidede nɔ ɔkwɔn-ɔ ukwur amma. 18Isɨsar dan ri ibɨn ke etso tsɔ rɛ mi idɨm kede. 19Dobe, na nang-ɔnanga.

20“Ibe rɛ ase Jɛrusɛlɛm sa asɔza araw abawa, asonga abɛ illiga tsɛ kefora. 21Tte anang pa anɨng ka Judiya araw apfona ga ka akpetso dɨm, ayog pa anɨng ko ofon aba ayɨn ki iyan, ayog pa anɨng ku urɨg aba anang anwa ko ofon. 22Mama wɔ ode Ibe ri irem dɔwa tsekwɛ wɛrɛ aba akkɛr fasɛ idɨg ndo iyɨn. 23Nzɔn ode kwu upanɨng pa atɨm ɔfar ɔttara pa abɛ na anang uva ɛba, anang mba na ase irem ri ititam ma ki iseg nda ɔttara idwudwag ru Ubɨnɔkpaabyi ni etto ɛjag bɛ. 24Asɔza na afɔ anang ɔttara aba pfuw anang masɛ agbakɔw nang apfona ki ifon ɔdwag. Ifon rɛ ɛna Izrɨrɛl nida nɛ ɛbar Jɛrusɛlɛm kɨ nfɔg tar ibe ra abɛ igba.

25“Ikkikkona dɨg ninɨng ku ududon, ko offe ɔttara kɨ ndɨdor. Anang ki ifon rɔ ɔyagbɨn no ozor bɛ ɔttara ɔyag bɛ udɨg ukwur ɛkɔr tsa assi ɔttara ko obogidi mi itɨma ikwu. 26Ayoganang nɔ ɔwar bɛ ukwur ozora ki idɨg pyuwa ra abɛ ma awanga rɛ mi iyɨn ma kɔ ɔyagbɨn, ekpo pyɛ ɛrang apyɛ ne nyeng-onyeng. 27Ki ibe ndo abɛ na ase Unwa kwu Udwunɨng nukwu ga ka akkpang pɛ ɛrang kɛ ɛffa ɔttara ka azuwada pi ititam. 28Ibe rɛ idɨg nda arɛ mi ittitso iyɨn, bɨna bobe agge etso, ukwurabɛ ibe ki ifora tsɛ ɛnnanga tsɔ mi ikwu.”

29Ɔtta bɛ otse, “Ker itsi nza tsi fig ɔttara kɨ ntsi ndo ibɨng. 30Ibe ra apyɛ efon atɔng ɔma oyen na ase, asonga abɛ issigwu ke effora. 31Ibe ndo ɔma na se idɨg nda arɛ niyɨn, ɔma na asonga abɛ Ɛvaar tsu Ubɨnɔkpaabyi ke effora.

32“Nnɨteg banga udɨg ɔkka, anang pa arɨg mazizan abɛ ibɨng ma ppe pɛrɛ idɨg nda arɛ iyɨn ibɨng. 33Ɛrang ɔttara ki iseg arɛ nɛ ɛkam itɨma, ɔtɔnga kwam ntɨma mɔ ɔkama.

34“Ker-o, anang ettem tsɔ atag ake ke elowa ɔttara adwug buma ɔttara idɨg furfur ra akpen fasɛ inang banga ipfuw dambɛ ɔmma gwɔ. 35Atse mi ikwu ekewa ɔnang kwidede ma ki iseg. 36Do ɛkpakpa ɔttara zɔm atɨm fasɛ abanga akama ɛffa tsa abanga ma annanga ki idɨg nda rɛ mi iyɨn ɔttara sa addo abɛ pɛrɛ Unwa kwu Udwunɨng.”

37Igwu sidede Jisɔs uyɨn no to okpewa ga kɔ ɔtsɔm kwa atɨm kwu Ubɨnɔkpaabyi, sɛ ɛtsɔga ikwu, ɛma oseng nutu uwung ga ko okpetso kwa aba ajer Okpetso kwo Olif. 38Anang mbo ibɨng aba akwu ke ekpewa irɨng-irɨng aba awang-ɛ ma kɔ ɔtsɔm kwa atɨm kwu Ubɨnɔkpaabyi.