Acts 14

Paulu na Banabasi mu Ikoniamu

1Mofoci no mu Ikoniamu, Paulu na Banabasi a kengenine mu sinagoge thzo Majuda. A ka rongithsire kokoro ku ninga ci Majuda no Magerike ▼

▼Munu o ku ninga ci kadi Mujuda.

owangi a tawire. 2Unone Majuda awa kanine ku tawa a shovongorire Anukenge no ku firikanya maano o ku wa shemaethza ci a rwithse akwakutawa. 3Mweyo, Paulu na Banabasi ekariremo, o kwa rongithsa ya Fumu kondume. Fumu wa pire ombangi o muthzimbu wenthzi o thsihemo ko ku wa twethsithsa ku kwama emonithso nekomokithsa. 4Unone anu omo mu mbongi kuma a citepire, amweya emanenine Majuda, amweya tunganda. 5Uno honi Majuda amweya nAnukenge amweya, naendithsi wo ou a fotire ku wa nyandithsa no ku wa povaura no mawe, 6a i dimukire awopo a cirera ku Lisitira na Debe, mambongi o mu Likaonia, no mandau aa a na hatako. 7Oko karo a ka shumunine ku honga Muthzimbu Ouwa.

Paulu na Banabasi mu Lisitira na Debe

8Mu Lisitira kwekarire mukwerume o thsikunga oyu wekarire, ka a twethsire ku enda. Wekarire thsikunga ku tunda ku kwerekiwa kwenthzi karo wa diyerire ku enda. 9Kuma a teererire eyi a rongithsire Paulu. Paulu ko ku mu tanekera thsithzui no ku mona ci wekarire no thsitawo thso kuninga ci aa twethsa ku porithsiwa, 10wa mu amberire ko diywi dyodikuru ci: “O wimane kedyato yoe!” Oyo munu wa reire no ku tateka ku endaura.

11Mbunga ou thza monine eyi a tendire Paulu, thza yoomokire mu mushovo o Thsilikaonia ci: “Anyambi a na shuruka ku keya ku kwetu ko thsikupuro thsonu!” 12Banabasi a mu tire Zeusi, Paulu a mu tire Heremesi pakuninga ci nedi yodiyo mukwa ku amba. 13Tembere thza nyambi oyu nethsiwa Zeusi kuma thzekarerire po pepi no mbongi. Mupurisita wethzo tembere wa retire mapoho no makata o matemo ku mengeneno o mbongi inene aye no mbunga kuma fotire ku kwamena Banabasi na Paulu eyambero.

14Unone oto tunganda, a Banabasi na Paulu, ou a i yuvire a yaturire ekoveyo yo no ku cirera mu mbunga o kwa ka thza o kumba ci: 15“Amwe mwanu, ine eyi mu tendera eyi? Natwe twanu eci amwe. Kuma tu na mi retera pohuma Muthzimbu Ouwa ci mu tunde kweyi enu yo mbango mu thsiurukere kwa Nyambi oyu yoya, oyu wa kwamine diwiru no kaye no diwate neyi i dimo yoihe. 16Ku mayuwa o ku kare Nyambi wa thsiererire anu ci a yoye komu a foterire. 17Unone ka a wa thsiererire kengeyo ko kukana ku wa monithsa ombangi keyi yenthzi, inene wa kwamine yoiwa ko ku mi pa mvura ku tunderera ku wiru, no ku mi pa njimo nawa ko thsikati ethsi thsi na roera, no ku mi pa edya yoingi no thsinyanyu mu micima thzenu.” 18Uno honi shaanga koa maywi, ya wa karuperire ku kwangithsa ethzo mbunga ku wa tendera thsiyambero.

19Unone Majuda amweya awa tundire ku Antioke no ku Ikoniamu ou a twethsire ku shemaethza mbunga. A povaurire Paulu no mawe no ku mu koka ku mu tundithsa mu mbongi ko ku anekera ci o na fu. 20Unone erongwa ou ya ciwanawanine no ku mu paka mu kaci, wa pindukire no kwingena mu mbongi. Diyuwa edi dya randireko, wa thzire na Banabasi ku Debe.

Paulu na Banabasi aa huka ku Antioke o mu Siria

21Paulu na Banabasi ou a manine ku honga Muthzimbu Ouwa mu mbongi thza Debe no ku wana erongwa yoingi, a hukire ku Lisitira no ku Ikoniamu no ku Antioke o mu Pisidia. 22Aka tanarithsire micima thzakwakutawa no ku wa ambera ci a tanare mu thsitawo thso. A wa amberire ci: “Twaa roera kwingena mu makando oangi ci twa kwingene mu Kutumina kwa Nyambi.” 23A Paulu na Banabasi a hangurire akuru o kereke mu kereke no kereke ko ku rombera no kucikanga no nthzara, no ku wa paka mu moko a Fumu oyu a tawire ku kwenthzi. 24Ngou a pitire mu Pisidia ku thza ku Pamfilia. 25Ou a manine ku rongithsa diywi mu Pega, a urumukire ku thza ku Atalia.

26Ou a tundire omo a hukire no dingunde ku Antioke o mu Siria, kuya pakiwire mu thsihemo thsa Nyambi mukaci kekwama iya a ka kwamine. 27Ou a ka kumine mu Antioke a ka wanekire akwakutawa pofoci, no ku wa tongawera enu yoihe eyi a ka wa kwamithsire Nyambi nedi naa ka yanthzurwera Nyambi Anukenge thsero thzo thsitawo. 28Ekariremo thsikati thsothsire nerongwa.