Acts 15

Mukopano o mu Yerusalema

1Paulu na Banabasi o kwa di mu Antioke, kwa keyire anu awa tundire ku Judea no ku na tateka ku rongithsa akwakutawa ci: “Tumba mu yoyithsiwa, shime ci mu thze ku mukanda eci edi ku na ñoriwa mu murao wa Mushe.” 2Paulu na Banabasi ngou a wa kanenine no ku cikanyekano nene. Paulu na Banabasi nanu amweya ngou a hanguriwire ku kambama ku thza ku Yerusalema ku ka cimona no tunganda nakuru o kereke mukaci kethzi ngudi. 3Mweyo, ko ku tumiwa ku kereke, a pitire mu Fenisia no mu Samaria o kwa thza o tongaura ko ku yara yAnukenge edi a thsiurukerire kwa Nyambi, karo ya reterire thsinyanyu thsothsikuru akwakutawa wahe.

4Ou a ka kumine mu Yerusalema, a ka tamburiwire ku kereke, no ku tunganda, nakuru o kereke. Paulu na Banabasi a ka tongaurire enu yoihe eyi a wa kwamithsire Nyambi. 5Unone akwakutawa amweya o mu thsikwata thsAfarithsi a katukire no ku amba ci: “Kwaa roera ci Anukenge awa a na tawa a thze ku mukanda no ku tuminiwa ci a hengeke murao wa Mushe.”

6Tunganda nakuru o kereke a ciwanine pofoci ku yongora eyi. 7Munyima thzo ku ciyongora thsikati thsothsire, Peturu wa katukire no ku amba kukwo ci: “Andengenu, namwe mu na dimuka ci Nyambi wa ni hangurire ku kare mu kaci kenu ci ko kanwa kange, Anukenge a yuve Muthzimbu Ouwa no ku tawa. 8No Nyambi, aye oyu na dimuka micima thzanu naa pa ombangi ci naa wa tambura pa ku wa pa Mupepo Oukenu eci dyodi a tendire ku kwetu. 9Ka na a monithsa thsiano mu kaci ketu nawo, inene Nyambi naa kenithsa micima thzo ko thsitawo. 10Pano honi ne, ine eyi mu fota ku erekera Nyambi ko ku paka njoko pa mathsingo erongwa, njoko ethzi a kanine ku twethsa ku shimba akwathsañuruetu nji atwe? 11Dyombo! Uno honi twaa tawa ci twaa yoyithsiwa ko thsihemo thsa Fumu Yesu, eci edi a yoyithsiwa nawo.”

12Mbunga thzothzihe thza tutwarire ku teerera kwa Paulu na Banabasi o kwa wa tongawera emonithso nekomokithsa eyi a tendire Nyambi kwAnukenge ko ku wa cikwathsithsa.

13Ou a manine ku tongaura, Jakovo wa tawire ci: “Andengenu, mu ni teerere! 14Simoni ▼

▼Karo aethsiwa ci Peturu.

na mi tongwera Nyambi edi a tatekire ku vanda kwAnukenge, ku hangura mbunga mu kaciko kwikara anuenthzi. 15Eyi yaa citombora no maywi akwakukethza, eci edi i na ñoriwa ci:
16“Munyima thzeyi kenge na ku ka huka,
no ku na umba nawa nthzio thza Davida thziya na thzi u,
Na ku na thzi pindure,
no ku thzi huthsera,
17ci mathsiarethzi wahe a ku fote Fumu,
mofoci kengeyo nAnukenge awa a nethsiwa ko dithzina dyange,
kwaa amba Fumu,
18oyu wa dimukithsire eyi enu ku kare.

19“Mweyo, naa anekera ci twa cakanithsa Anukenge awa a na thsiurukera kwa Nyambi. 20Unone tu wa ñorere pohuma ci a thsie ku dyanga edya yo ku tupwera ekupuro, a tunde ku ruthziho, a dyanga nyama o thsiyama thso ku fa ku kathsinga nji ku dya difura. 21Inene murao wa Mushe wandiwire kare o ku u hongiwa mu mambongi oahe no ku variwa mu masinagoge diyuwa no diyuwa dyo Savata.”

Nthzango thzaa ñorera Anukenge wakwakutawa

22Tunganda nakuru no kereke thzothzihe thzo mu Yerusalema ngou a hangurire anu mu kaciko no ku wa tuma na Paulu na Banabasi ku Antioke. Kwa hanguriwire Judasi oyu wethsiwire Basabasi, no Silasi, akwerume awa ekarire aendithsi mu kaci kakwakutawa. 23A piwire diñoro edi dya ñoriwire kenge ci:
“Ku tunderera ku kwetu atwe twa tunganda nakuru o kereke, atwe twaenthzenu, twaa ñorera amwe mwAnukenge wakwakutawa o mu Antioke, Siria no mu Silisia, twaa mi vumenena. 24Pakuninga ci na tu na yuvu ci anu amweya na tundu kuno ku kwetu no ku na mi cakanithsa no ku mi pithsa ku micima kerongithsa yo eyi na tu kana ku wa raa, 25na tu ciyuvu ku hangura akwerume no ku wa tuma oko ku kwenu nashimiwa etu a Banabasi na Paulu. 26Awo po akwerume awa na shuvu myoyo thzo mukaci ko dithzina dya Fumu wetu Yesu Krisitu. 27Mweyo, tu na tumu Judasi na Silasi ci na mi tongwere ko tunwa two eyi tu na ñoro.
28“Inene Mupepo Oukenu natwe kengeyo na tu mono ci ka tu roerire ku mi shimbithsa mupango ouremu shime ku hengeka eyi: 29‘Mwa dya edya yo ku tupwera ekupuro, mwa dya difura nji eyama yo ku fa ku kathsinga, karo mu tunde ku ruthziho. Ngeci amwepo mu cihenga kweyo kenge mwa ku tenda nawa. Mu yoyepo nawa.’”

30Mweyo, ou a funduriwire, a urumukire ku thza ku Antioke, oku a ka wanekire akwakutawa no ku wa pa edyo diñoro. 31Ou a manine ku di vara, anu a nyanyukire mukaci ko maywi etanarithsa yadyo.

32A Judasi na Silasi ko kwikara akwakukethza, a ambaurire yoingi ku kwo, ku tanarithsa no ku koropithsa akwakutawa. 33Munyima thzo mayuwa oapu, akwakutawa a wa fundurire ko thsiyaro ku huka kowa a wa tumine. 34[Unone Silasi aye wa fotire ci a thsiare. ▼

▼Ka thzi di mu mañoro kutanga.

] 35Paulu na Banabasi a thsiarire mu Antioke. Awo namweya owangi, a rongithsangire no ku honga diywi dya Fumu.

Paulu na Banabasi aa cihanda

36Munyima thzo mayuwa oapu, Paulu wa amberire Banabasi ci: “Tu huke tu ka hungerithse akwakutawa mu mambongi oahe muya na tu thzi o rongithsa diywi dya Fumu, tu ka mone edi a di.” 37Banabasi wa fotire ci a thze na Johani oyu nethsiwa Mareka. 38Unone Paulu wa monine ci ka ya roerire ku thza no munu oyu wa ka wa thsiire mu Pamfilia, oyu wa kanine ku ka shumunano mwikwama eyi a ka kwamine. 39Kwa katukire dikanyi dyodikuru ku ninga ci mane a cihandire. Banabasi wa shimbire Johani Mareka no ku thza ku Sipera no dingunde. 40Unone Paulu aye wa hangurire Silasi no ku thza, o kwa na pakiwa kwakwakutawa mu thsihemo thsa Fumu. 41Wa thzire o hungerithsa matunga a Siria na Silisia, o ku thza o tanarithsa makereke.