Acts 17

Paulu na Silasi aa thza ku Tesalonika

1Paulu na Silasi a pitire mu Amfipolisi no mu Apolonia, no ku ka kuma mu Tesalonika omu mwekarire sinagoge thzo Majuda. 2Eci edi naa kwamanga, Paulu wa kengenine mu sinagoge, karo wa shimbire Masavata ahatu o ku ambaurangano mu Mañoro. 3Wa wa tongonwenine no ku wa monithsa ci Mesiya wa roerire ku nyanda no ku pinduka kwafu. Wa ambire ci: “Oyu Yesu ni mi tongwera yenthzi po yodiyo Mesiya.” 4Majuda amweya a rakwire no ku cipakerera na Paulu na Silasi, mofoci kengeyo no Magerike owangi awa a cipakire kwa Nyambi nambuyama owangi owakuru mu thsivaka.

5Unone Majuda amweya awa tenderire mbamba, ngou a kongire akwerume o mavangoka ku maurithsero. A kwamine thsipani no ku tateka ku tenda mukwangarakanyi mu mbongi. A cirerire ku nthzio thza mukwerume o dithzina dyo Jasoni o kwa ka thza o fotafota Paulu na Silasi ci a wa kwate no ku wa twara ku mbunga. 6Uno honi ou a ka kwangire ku ka wa wana, a purututire Jasoni nakwakutawa amweya ku wa twara kwaendithsi o mbongi, o kwa kuerera ci: “Awa akwerume na reta mikwangarakanyi mu kaye kokahe na keya kuno honi, 7Jasoni naa wa tambura ku nthzio thzenthzi. Awa anu awa wahe aa rwithsa mirao thza fumu shokuru Sesare, ▼

▼Fumu shokuru o Maroma.

inene aa amba ci kwaa di fumu yumweya, oyu nethsiwa Yesu.”

8Mbunga naendithsi o mbongi a shangumunine mukwangarakanyi ou a yuvire eyi. 9Ngou a ooterire Jasoni nakwakutawa amweya ku kura madi o mwima mbeci ku wa thsia ci a thze.

Paulu na Silasi mu Berea

10O uya othsiku, ko wanguwangu akwakutawa a fundurire Paulu na Silasi ci a thze ku Berea. Ou a ka kumine a ka thzire ku sinagoge thzo Majuda. 11Uno honi awa Majuda o mu Berea nedi anu o micima thzothziwa kupita waya o mu Tesalonika, inene a tamburire diywi dya Nyambi ko ku pakerako maano, no ku tatufa Mañoro diyuwa no diyuwa ku mona ci eyi a rongithsa Paulu ne yashemwa. 12Mweyo, Majuda owangi a tawire, nambuyama o Magerike owangi owakuru mu thsivaka nakwerume kengeyo a tawire.

13Majuda o ku Tesalonika ou a yuvire ci Paulu aa honga karo diywi dya Nyambi mu Berea, a thzireko ku ka hongaura mbunga no ku wa undunganya. 14Popo akwakutawa ngou a fundurire Paulu ci a thze ku kakuro, unone Silasi na Timoti a thsiarire mu Berea. 15Awa thsindekethzire Paulu a ka mu kumithsire mu Atene. Ou a hukire, Paulu wa wa raererire ci a ka tongwere Silasi na Timoti ci a ka keye ko wanguwangu nekare pofoci nenthzi.

Paulu mu Atene

16Paulu o ku taterera Silasi na Timoti mu Atene, mupepo wenthzi wa cinyengire nene ou a monine ci mbongi thza yarire anyambi wekupuro. 17Mweyo, wa cikanyekangire mu sinagoge no Majuda nAnukenge awa a cipakire kwa Nyambi, karo wa tendangire kengeyo diyuwa no diyuwa mu maurithsero nanu awa a waniwangiremo.

18Eshimodimukero imweya yo mwikwata yo Epikure no Sitoiki nawo a tatekire ku cikanyeka nenthzi. Amweya kukwo epurire ci: “Ine eyi a fota ku amba oyu thsiyavayavi?” Awa ci: “Aa monahara ci aa honga yanyambi o ku matunga ao.” Kuma ambire eyi pakuninga ci Paulu kuma a hongire yo Muthzimbu Ouwa wa Yesu no kupinduka kwafu. 19Ngou a mu shimbire no ku mu twara ku thsikwata ethsi thsi nethsiwa Areopagusi, a mwipurire ci: “Twaa fota ku dimukera nawa eyi erongithsa yoipe o rongithsa? 20Twaa yuva ci waa reta enu eyi twa kana ku yuva, mweyo twaa fota ku i dimukera ci yaa amba ine.” 21Anu wahe o mu Atene no matundakure awa tungiremo a ambaurangire no ku teerera thsikati thsothsihe kwirongithsa yoipe.

22Paulu ngou emanine mu kaci ko nthzango thzo Areopagusi no ku amba ci: “Amwe mwakwerume o mu Atene! Naa mona ci mwanu o ku shima nene ku rombera momuhe momuhe. 23Inene ou na ni thzi o thzinguruka no ku rondorora nawa enu eyi mu na romberanga, shime naa wana karo katara aka ka na ñoriwa ci: ‘Kwa nyambi shidimukiwa.’ Mweyo, eyi mu rombera i shidimukiwa, yodiyo eyi ni honga ku kwenu.

24“Nyambi oyu wa tendire kaye neyi i dimo yoihe, yodiyo Fumu o diwiru no kaye, ka a tunga mu matembere o ku umbiwa ko moko anu. 25Karo ka a kwameniwa ko moko anu, eci ko i di eyi a na piri, inene aye yodiyo na pa anu wahe mwoyo no mupuyo, nenu yoihe. 26Yodiyo wa retire ci pa munu yofoci pa tunde matunga oahe ku na tunga muno mu kaye, no ku paka ekati yo yo ku yoya no mainthza o o muve.

27“Nyambi wa tendire eyi ci anu a mu fote, karo ci nga a mu fafatere no ku mu wana, shaanga ikare ci ka a di kokure no munu yomuhe ku kwetu.
28“‘Inene Mu mwenthzi aye twaa yoya no ku endaura, karo ko tu di.’

“Karo yo i na ambiwa no mu maroko enu ci:
“‘Natwe twanenthzi.’

29“Mweyo, ko kwikara ana Nyambi, ka tu roerire ku anekera ci onyambi po waa cipitura eci gauda, nji silivera, nji diwe; thsikupuro thso kumbiwa koñurungu neanekera yo munu.

30“Ku kare Nyambi wa thsiererire kukana ku dimuka enu kwanu, uno honi pano aa raerera anu wahe mu kaye kokahe ci a cere evi yo. 31Inene naa hangura diyuwa edi a ku ratura anu wahe mu kaye kowawa, ko munu oyu naa hangura ku kwama kengeyo. Karo Nyambi naa mu monithsa kare kwanu ci naa mu hangura pa ku mu pindura kwafu.”

32Ou a yuvire Paulu o ku amba yo kupinduka kwafu, amweya kukwo a mu teururire, unone amweya a ambire ci: “Kenge twa ku fota ku yuva eyi erongithsa yoe karo.” 33Paulu ngou a wa thsiire. 34Unone anu amweya a cipakererire nenthzi no ku tawa. Amweya kukwo nedi Dionisiasi, o mu nthzango thzo Areopagusi, no mbuyama yumweya o dithzina dyo Damarisi, namweya kengeyo.