Acts 18

Paulu aa thza ku Korinte

1Munyima thzeyi Paulu wa tundire mu Atene no ku thza ku Korinte. 2Wa ka wanineko Mujuda o dithzina dyo Akwila, o ku Pontasi, o ku naa kumakuma ku ka tunda ku Itali na munu wenthzi Purisila, inene fumu shokuru Kilaude kuma a raererire ci Majuda wahe a tunde mu Roma. Paulu wa thzire ku ka wa mona. 3Pakuninga ci naye kuma a kwamangire matende eci awo, wekarireno ku kwamena pofoci. 4Dyo Savata no Savata wa ambaurangire mu sinagoge, ku ereka ku rakwithsa Majuda no Magerike.

5Silasi na Timoti ou a kumine ku ka tunda ku Masedonia, Paulu wa pakerire nene maano pohuma ku ku honga, ku pa ombangi ku Majuda ci Yesu po yodiyo Mesiya. 6Unone ou a mu rwithsire no ku mu shwahura, wa kukumunine evata ▼

▼Ku monithsa ku wa kana.

yenthzi no ku wa ambera ci: “Onyinga wenu wikare pa mitwi thzenu! Ame ka ni di no murandu. Ku tunda pano kenge ni thzanga kwAnukenge.”

7Paulu ngou a tundire mu sinagoge no ku thza ku nthzio thzo munu o dithzina dyo Titiasi Jusitasi, oyu wa romberangire Nyambi. Nthzio thzenthzi kuma thza cihatire no sinagoge. 8Kirisipo, muendithsi o sinagoge, wa tawire kwa Fumu, mofoci kengeyo no mwanda wenthzi ouhe. Nanu amweya owangi o mu Korinte awa yuvire Paulu a tawire no ku korovethziwa.

9Diyuwa dimweya othsiku Fumu wa amberire Paulu mu thsimona ci: “Wa yapa, unone o twarerere ku rongithsa, karo wa tutwara. 10Inene noe ni di, karo kwithsa oyu wa ku ku rwithsa nji ku ku kurura, inene ni di nanuange owangi muno mu mbongi.” 11Paulu ngou ekarire mwaka no maonda mutanu na thzofoci, o ku rongithsanga diywi dya Nyambi mu kaciko.

12Uno honi Galio o ku di nguvuru o mu Akaya, Majuda a cikwatire ku rwithsa Paulu no ku mu reta pa diratwero. 13Ngou a ambire ci: “Oyu mukwerume oyu aa karaethza anu ku rombera Nyambi komu u na kanithsera murao.”

14Unone Paulu ou a fotire ku amba, Galio wa amberire Majuda ci: “Nga thsiamba thso ku ninga ci nepithsa nji okeremi, apo nga ni na tambura kooko thzenu. 15Uno honi pakuninga ci ya mangudi o maywi no mathzina no murao wenu mwathsinda, mu i rature yoyamwe. Ame ka ni ratura enu yo kenge.” 16Ngou a wa cithzire mu kuta. 17Wahe a kwatire Sositene muendithsi o sinagoge, no ku mu furera pa kuta, unone Galio ka a i twarire mucima.

Paulu aa huka ku Antioke o mu Siria

18Paulu wekarire mayuwa oangi mu Korinte. Ngou a vumenenine akwakutawa no ku hunyuna ku thza ku Siria, kuma a mu thsindekethzire a Purisila na Akwila. Oku shime ku thza wa cikerithsire huki thzenthzi mu Sengeria inene kuma a cangire. 19A ka kumine mu mbongi thza Efese, oku a ka thsiire Purisila na Akwila. Wa thzire mu sinagoge no ku ka cishikaura no Majuda. 20Ou a mu rombire ci ekareno mayuwa oangi, wa kanine. 21Unone o ku funduka wa wa kumbwethzire ci: “Kenge na ku ka huka ngeci Nyambi waa ku i shime.” Ngou a hunyunine ku tunda mu Efese. 22Ou a ka thsekerire mu Sesarea, wa ka kambamine ku thza ku Yerusalema ku ka vumenena akwakutawa no ku urumuka ku thza ku Antioke.

Paulu mu Efese no mu Korinte

23Munyima thzo kwikara mayuwa oangi mu Antioke, Paulu wa tundiremo no ku thza mu mandau oangi a Galatia na Firigia o ku ka thza o tanarithsa akwakutawa wahe. 24Mwethso thsikati, mukwerume o Mujuda o dithzina dyo Apolosi, oyu werekiwerire mu Alekisandiria, wa keyire ku Efese. Nedi munu o mu ñurungu mu kuamba, karo wa dimukire nene Mañoro. 25Kuma naa rongithsanga dikuñwa dya Fumu, karo ko ku pakerako maano wa rongithsangire nawa amweya ya Yesu, shaanga ci kuma a dimukire pohuma yo korovethzo thza Johani. 26Wa tatekire ku rongithsanga mu sinagoge kondume. Unone a Purisila na Akwila ou a mu yuvire, a mwithserire ku mbadi no ku ka mu tongonwena nawa yo dikuñwa dya Nyambi.

27Apolosi ou a fotire ku thza ku Akaya, akwakutawa a mu koropithsire no ku mu pa diñoro edi dya thzire kwakwakutawa ci a ka mu tambure nawa. Ou a ka kumine, wa ka kwathsire nene awa tawire ko thsihemo thsa Nyambi, 28inene wa kanenangire Majuda kokoro pa kaci ko mbunga, ko Mañoro wa wa monithsire ci Yesu po yodiyo Krisitu.