Act 19 | MhoSC | STEP | Apolosi o ku di mu mbongi thza Korinte, Paulu wa cinakanine pa kaci ko ditunga, shime ku ka kuma mu Efese. Omo wa ka waninemo erongwa imweya.

Acts 19

Paulu aa rongithsa mu Efese

1 Apolosi o ku di mu mbongi thza Korinte, Paulu wa cinakanine pa kaci ko ditunga, shime ku ka kuma mu Efese. Omo wa ka waninemo erongwa imweya. 2 Wa ka ipurire ci: “Ene mwa tamburire Mupepo Oukenu ou mwa tawire?” Ya tawire ci: “Dyombo, ka twa i yuva no ku i yuva ci ko wekara Mupepo Oukenu.”

3 Paulu ngou epurire eyo erongwa ci: “Korovethzo mwine honi ne mwa tamburire?” Ya tawire ci: “Korovethzo thza Johani.”

4 Paulu wa ambire ci: “Korovethzo thza Johani po nedi thzo ku cera evi. Kuma a tongwerire anu ci a ku tawe koyu wa keyire munyima thzenthzi, aye Yesu.” 5 Popa ya yuvire eyi, ya korovethziwire mu dithzina dya Fumu Yesu. 6 Paulu ou a i kambekire moko, Mupepo Oukenu wa keyire peuru thzayo, ayopo i tateka ku amba madimi ao no kukethza. 7 Kuma yekarire akwerume o ku twethsa ku kwana dikumi naidi yoihe.

8 Paulu wengenangire mu sinagoge, karo wa shimbire maonda ahatu o ku rongithsanga kondume, ku cishikaura no ku wa karaethza yo Kutumina kwa Nyambi. 9 Unone amweya ekarire no mukanayuva, a kanine ku tawa karo a ambire yoimango pa meho o mbunga keyi yo Dikuñwa dya Yesu. Paulu ngou a wa thsiire no ku thza nerongwa ku dicirongithsero dya Tirano, omu a ka cishikwerangire nanu diyuwa no diyuwa. 10 Wa tendire kengeyo myaka thzidi, ci nga anu wahe o mu Asia a yuve diywi dya Fumu, Majuda mofoci kengeyo nAnukenge. ^{▼▼Magerike nji ci anu awa di ci kadi Majuda.}

Ana Sikeva

11 Nyambi wa pire Paulu okoro o ku kwama ekomokithsa yoikuru, 12 mane shaanga tutauro nji eto eyi ya kunyunine Paulu ya twariwangire kwakwakukora, karo ekora yo ya porithsiwire, no mathzimu a tundangire ku kwo.

13 Majuda amweya wanyambaethzi awa na tundithsanga mathzimu a erekire kwithsa pa dithzina dya Fumu Yesu o kwa ambanga ci: “Naa mi raerera mu dithzina dya Yesu oyu a na honganga Paulu, mu tunde!” 14 Awa a tendangire eyo po nedi ana Sikeva o mutanu naidi, oyu wekarire mupurisita shokuru o Majuda. 15 Unone diyuwa dimweya mupepo oumango wa wa tawire ci: “Yesu ni na mu dimuka, no Paulu ni na mu dimuka, uno honi amwe ne yamwe mwadye?” 16 Oya mukwerume wekarire no mupepo oumango ngou a wa reerire no ku wa othza wahe. Wa wa furire nene ku ninga ci mane a pumathzokire mu nthzio thsisheshe o kwa na kuruka.

17 Eyi ya dimukiwire kwanu wahe awa a tungire mu Efese, Majuda no Magerike. Wowa wa wengenenine wahe karo dithzina dya Fumu Yesu dya remekiwire. 18 Karo ongi wo awa a tawire a keyire ku na citawera no ku tongora eyi na tendanga. 19 Owangi awa a tendangire masheno a retire mavuka o o masheno, no ku na a tumekerera pa meho anu. Ou a tarire taro thzo madi ao mavuka, thza kumine mu madi o ku kwana ^{▼▼Dimadi dyofoci dyo muwayawaya o silivera ku di kwamena po shime diyuwa mutumbi.}50,000 o muwayawaya o silivera. 20 Mukaci keyo, diywi dya Fumu dya shumunine ku yuka no ku tanara.

21 Munyima thzeyi, Mupepo Oukenu wa anekerithsire Paulu ku thza ku Yerusalema ko ku pitera mu Masedonia na Akaya. Wa ambire ci: “Ou na ku ka kumako, naa roera ku ka hungera no ku Roma.” 22 Ngou a tumine aidi kwanduthzienthzi, Timoti na Erasito ku Masedonia, aye wa thsiarire thsikati thsothsipu mu Asia.

Mukwangarakanyi mu Efese

23 Kethsiya thsikati kwa katukire mukwangarakanyi oukuru mu Efese keyi yo Dikuñwa dya Yesu. 24 Inene mukwakufura efu yo silivera yumweya o dithzina dyo Demetiriusi, oyu wa kwamangire mayambero a nyambi o mbuyama Atemisi, ^{▼▼Karo aethsiwa ci Diana.} wa fumithsire nene akwakufura. 25 Ngou a wanekire awa akwakufura nakwakufura amweya mweyi ekwama no ku amba ci:

“Andengenu, mu na dimuka ci rufumo rwetu po rwaa tunda peyi ekwama. 26 Karo mwaa mona no ku yuva oyu Paulu edi a rakwithsa no ku pambanithsa anu owangi ci anyambi o ku kwama ko moko po kadi anyambi shemwa, kadi muno mu Efese pohuma, unone no mu Asia yomuhe. 27 Po u di okaru, kadi pohuma ino ekwama yetu kwipa dithzina, unone no tembere thza nyambi shokuru o mbuyama Atemisi kwithsa oyu wa ku thzi vara, naye ka a ku remekiwa, aye oyu na romberiwa mu ditunga dyodihe dya Asia no mu kaye kokahe.”

28 Ou a yuvire eyi a anthzipire nene no ku tateka ku yoomoka ci: “Atemisi o Maefese po mukuru mu thsivaka!” 29 Kwekarire mukwangarakanyi mu mbongi thzothzihe. Anu a cirerire ku dipepero o kwa ka thza o purututa Gayusi na Arisitako awa a endire na Paulu ku tunda ku Masedonia. 30 Paulu wa fotire ku thzako oko ku mbunga, unone erongwa ya mu kanithsire. 31 Manduna amweya o mu ditunga dya Asia, awa ekarire ambusha Paulu, a mu tumithserire maywi o ku mu adikanena ci a thza no ku kengena mu dipepero.

32 Uno honi mbunga kuma thzekarire mu mapurwapurwa. Awa ku kumba eyi, awaya ku kumba iya, mane ongi wo ka dimukire ci ine eyi a ciwanawanenine. 33 Majuda mu mbunga a thsindekerire Alekisanda ku rupara ro mbunga no ku mu ambera ci a tongonone eyi ya tendaharire. Wa tutwarithsire anu ko dyoko ci a ambe ku mbunga. 34 Unone mbunga ou thza dimukire ci nedi Mujuda, wahe a kumbakumbire mu thsikati thso ku twethsa ku kwana etunde idi ci: “Atemisi o Maefese po mukuru mu thsivaka!”

35 Ku hura muñori o mbongi wa tutwarithsire mbunga no ku amba ci: “Amwe mwakwa Efese, ene kwaa di oyu na kana ku dimuka ci mbongi thza Efese po thzodiyo munyungi o tembere thza Atemisi shokuru, no diwe dyoshokenu edi dya wire ku wiru? 36 Pakuninga ci eyi kadi ya ku tawa ku hamuriwa, mwaa roera ku tutwara no kukana ku yokwerera ku tenda thsimweya. 37 Inene awa akwerume mu na reta kuno kethzire mu tembere nji ku yengwera nyambi wetu o mbuyama.

38 “Mweyo ngeci Demetiriusi naenthzenthzi akwakufura a di no kooko, makuta ko a di no manduna mwa di, aa twethsa ku cithzekithsa. 39 Uno honi ngeci ko i di imweya eyi mu na foto ku kumithsa, eyo kenge ya ku kengiwa mu kongano thzo murao. 40 Edi i di, tu di shemwa mukaru o ku twethsa ku thzekithsiwera yo mukwangarakanyi rero, inene kwithsa shemwa eyi nga tu amba ci yo i na reta ou mukwangarakanyi.”

41 Ou a manine ku amba eyi wa amberire mbunga ci thzi cishandoke.