Acts 2

Kukeya ko Mupepo Oukenu

1Mu diyuwa dyo Pentekota, ▼

▼Diyuwa dyo ku kwanithsa mayuwa makumi mutanu ku tunda pa Paseka.

akwakutawa wahe a ciwanine mu ndau thzofoci. 2Popo kwa yuvaharire muvumo o ku cipitura eci o kakundukundu ou wa tundire ku wiru, wa na yarire mu nthzio omu ekarire. 3Ngou kwa monaharire madimi o kupitura eci o mudiro aa a nekarire peuru thzo munu no munu. 4Wahe a yarire Mupepo Oukenu no ku tateka ku amba mu mishovo thzathzo ethzi wa wa ambithsire Mupepo Oukenu.

5Kethsiya thsikati mu Yerusalema kwekarire Majuda awa remekire Nyambi, awa tundire mu matunga oahe o mu kaye. 6Ou a yuvire ou muvumo, mbunga thzothzikuru thza na ciwanawanenineko. Ya wa tanganithsire ou a na yuvire wahe mishovo thzo o kwa thzi amba akwakutawa.

7A komokire nene no ku amba ci: “Eyi ne ngepi i nekara? Awa anu awa ne kadi wahe AkwaGalilea nji? 8Unone kwaa keya ngepi ci munu no munu ku kwetu aa wa yuva o kwa amba mishovo thzetu? 9AkwaPatia, AkwaMede, AkwaElami, anu o ku Mesopotamia, ku Judea, ku Kapadosia, ku Pontasi no Asia. 10Amweya aa tunda ku Firigia, ku Pamfilia, ku Egepita no mandau a Libia aa a na cihata na Sirene, nenda o ku Roma, 11(Majuda nanukenge awa cipirurire kwikara Majuda), AkwaKirete nAkwaArabia. Twahe twaa wa yuva o kwa amba mu mishovo thzetu enu yoikuru eyi naa kwama Nyambi!” 12Wahe a komokire no ku cinjembukera, a cipaurire ci: “Eyi ne ya ngepi?”

13Unone amweya mu mbunga a wa teururire no ku amba ci: “Awo anu a na pende waine omupe.”

Maywi a Peturu ku mbunga

14Peturu ngou emanine naenthzenthzi tunganda to dikumi na kofoci, wa yerurire ku diywi no ku amba ku mbunga ci: “Amwe mwaenthzange Majuda namwe mwahe mu na tungu mu Yerusalema, mu ni teerere nawa karo mu dimukere eyi ni mi tongwera. 15Inene awa anu po ka pendire eci edi mu anekera amwe, mathsikuthsiku ano mbeci thsi kwane thsikati thso 9 thzo mathsikuthsiku. 16Uno honi, eyi po yodiyo eyi aa ambire mukwakukethza Joele yo kuninga ci:
17‘Nyambi aa amba ci, Mu mayuwa o mahurerero,
kenge mbo ni pa kongi Mupepo wange kwanu wahe.
Anenu wakwerumeana na mbuyamaana kenge mbokethza,
mishumba thzenu kenge mba mona emona,
akuru wakwerumenu kenge mba rota erota.
18Mwao mayuwa ao kenge mbo ni pa kongi Mupepo wange,
kwapikange wakwerume nambuyama,
mweyo, kenge mbokethza.
19Kenge mbo ni kwama ekomokithsa ku wiru mu diwiru,
nemonithso mu kaye pano pashi,
onyinga, mudiro no thsimemba thso mwithse kenge mbo ikarako.
20Diyuwa kenge mbo di nyora,
ngonda kenge mbo thzi kiha eci onyinga,
o ku di shime ku keya edyo diyuwa dyoshokuru dyo kutethzima dya Fumu.
21Munu yomuhe o kwithsa
pa dithzina dya Fumu, kenge mba a yoyithsiwa.’ ^b

22“Amwe mwaenthzange mwa kwa Isiraele, mu ni teerere! Yesu wa Nazareta po nedi munu oyu naa hangura Nyambi kekwama yoikuru nekomokithsa nemonithso eyi naa kwama Nyambi kenthzi mu kaci kenu, eci dyodi mu na i cidimukera. 23Oyu munu kuma mwa mu piwire kesheteka no ku dimuka cimo kwa Nyambi, amwe ko ku kwathsiwa kwanu a shiremeka murao na mu mwipaa ko ku mwamba pa mbinda. 24Unone Nyambi naa mu pindura kwafu no ku mu tundithserera ku dikando dyo kukora ko kufa, inene ka ya tawire ci kufa kwikare nokoro peuru thzenthzi. 25Inene Davida wa ambire keyi yenthzi ci:
‘Na monine Fumu pa rupara rwange thsikati thsothsihe.
Inene ku rudyo rwange a di ci nga na karupera.
26Mweyo, mucima wange u na nyanyuka nene,
no maywi ange a na roera,
nerama yange kenge ya ku turumwithsa mukurupero.
27Inene ko wa ku thsierera mwoyo wange mu ndau thzafu ▼

▼Dihere.

,
nji ku tawethza o Mukenu woe ci orere mu thsidi.
28No ni dimukithsa makuñwa o mwoyo,
kenge wa ku ni yarithsa thsinyanyu pa kwikara nange.’” ^d

29Peturu wa shumunine ku amba ci: “Andengenu, naa roera ku mi tongwera yoshemwa ya mukwathsañuru wetu Davida. Wa fire no ku vumbekiwa, thsidi thsenthzi, thsothsi no rerodino. 30Pakuninga ci nedi mukwakukethza karo ko ku dimuka ci Nyambi wa cethzerire ngoro ku kwenthzi ci kenge a ku paka yumweya kwanahokenthzi pa ngunja thzenthzi, 31Davida wa monine yo ku rupara no ku amba keyi yo kupinduka kwafu kwa Krisitu ci:
“‘ka a thsiereriwire mu ndau thzafu,
nji ku tawethza erama yenthzi kworera mu thsidi.’

32“Nyambi naa mu pindura kwafu oyu Yesu, atwe twahe twa mambangi weyi enu eyi. 33Ko ku thzinekiwa ku dyoko dyo rudyo dya Nyambi, naa ka tambura kwa Tata Mupepo Oukenu oyu wa kumbwethziwire karo naa u tu pingurwera eci edi mu cimonena no ku ciyuvera. 34Inene Davida aye ka a thzire ku wiru, unone wa ambire ci:
“‘Fumu wa amberire Fumu wange ci:
“O wikare ku rudyo rwange,
35shime ku ka kuma apa na ku tendera akwethzimbo yoe,
thsipura apa a ku dyaterera mauru oe.”’ ^e

36“Mweyo, anu o mu Isiraele wahe a dimuke shemwa ci oyu Yesu na mwamba pa mbinda, Nyambi naa mu paka kwikara Fumu no Mesiya.”

37Anu ou a yuvire eyi, ya wa kiñine ku micima, ngou a amberire Peturu no tunganda tumweya ci: “Andengenu, ine tu na roera ku tenda?” 38Peturu wa tawire ci: “Munu no munu ku kwenu a cere evi yenthzi no ku korovethziwa mu dithzina dya Yesu Krisitu ci mu wane otetero wevi yenu, wangu mwa ku tambure thsipa thso Mupepo Oukenu. 39Ethsi thsikumbwethzo po thsenu nanenu, nanu wahe awa di kokure, wahe awa ethsa Fumu Nyambi wetu.”

40Ko maywi amweya oangi, Peturu wa wa nomenithsire no ku wa tanarithsa ci: “Mu ciyoyithse mwathsinda kwanu o rerodino wetenda yoimango!” 41Mweyo, awa tawire maywi enthzi a korovethziwire. Diya diyuwa anu o ku kwana makumi o dikumi dyo makumi ahatu (3,000) a vungithsiwire ku taro thzakwakutawa.

Thsiciwano thsakwakutawa

42Wahe a tanarithsire erongithsa yo tunganda, thsiciwano, murarero wa Fumu nerombero.

43Wowa oukuru wengenenine anu wahe mukaci kekomokithsa nemonithso yoingi eyi twa kwamine tunganda. 44Akwakutawa wahe kuma ekarire thsipani thsofoci karo a cierangire yoihe eyi ekarangire nayo. 45Kuma urithsangire rufumo neyi ekarangire nayo yoihe no ku era ao madi kwanu wahe awa pirire. 46Diyuwa no diyuwa a ciwanangire pofoci mu Tembere. A dyerangire murarero wa Fumu mu manthzio o, karo a dyerangire pofoci edya yo ko thsinyanyu no micima thzothziwa. 47A shangarangire Nyambi, karo a wa nyanyukerire anu wahe. Fumu wa vungithsire ku taro thzowa a yoyithsiwangire diyuwa no diyuwa.