Acts 20

Paulu aa thza ku Masedonia no ku Gerike

1Mukwangarakanyi ou wa pwire, Paulu wethsire erongwa. Ou a manine ku i tanarithsa micima, wa i vumenenine no ku thza ku Masedonia. 2Ou a ka manine ku hungerithsa mandau oahe o mu Masedonia no ku ka tanarithsa micima akwakutawa, ku hura wa ka kumine mu ditunga dya Gerike, 3oku a kekarire maonda ahatu. Pakuninga ci Majuda amweya kuma a cekire ku mu rwithsa o ku ninga ci a thsekure a thze ku Siria, wa anekerire ku huka thzo ku pita mu Masedonia.

4Wa thzire na Sopatera o ku Berea mwana Pirusi, no Arisitako na Sekundo o ku Tesalonika, no Gayusi o ku Debe, na Timoti, no Tikike na Tirofimo o ku Asia. 5Awo a citangethzire no ku ka tu taterera mu Toroasi. 6Unone munyima thzo Thsidika thso Makende o kupira Mamene, twa thsekurire mu Filipi no ku ka ciwanano mu Toroasi munyima thzo mayuwa mutanu, omu twa kekarire mayuwa mutanu na edi.

Paulu aa hungera mu Toroasi ro mahurerero

7Mu diyuwa dyo kutanga mu sunda, ou twa ciwanawanine pofoci ku Murarero wa Fumu, Paulu wa ambaurire kukwo thsikati thsothsire, shime ku ka kuma pa kaci kothsiku, pakuninga ci kuma a anekerire ku funduka diyuwa edi dya randireko. 8Omo mu koroi twa ciwanawanenine kwekarire tumbarambara totungi. 9Mushumba o dithzina dyo Yutiko, oyu wekarire mu njaneno Paulu o ku rongithsa wa nyongerire no ku thza pa turo. Wa koromokire ku koroi thzo muthsihatu no ku wera pashi. Wa ka yeruriwirepo o ku na fu. 10Paulu wa shirukire, wa ka mu kotamenine no ku mu paka mu moko enthzi, no ku amba ci: “Mwa cithzekera ka a fire, mu yumi!” 11Paulu ngou a hukire ku koroi. Ou a manine ku kuyaura dikende dyo Murarero wa Fumu no ku dya, wa ambaurireno thsikati thsothsire shime ku vithsa diyuwa, no ku funduka. 12Anu a twarire oya mushumba ku diumbo o ku yoya, karo a karurukire nene.

Paulu aa ciwana nakuru o kereke o mu Efese

13Twa citangethzire ku thza ku dingunde no ku hunyuna ku thza ku Asoso, oku twa ka yomekerire Paulu, inene dyaa i pakire ci a thzeko no mauru. 14Ou a ka tu wanine ku Asoso, twa ka mu yomekire mu dingunde no ku hunyuna ku thza ku Mitilene. 15Twa thsekuriremo no ku ka kuma oshungashunga no diongo dya Kiosi diyuwa edi dya randireko. Mu diyuwa edi dya randireko karo twa reire ku thza mu diongo dya Samosi, karo mwedi dya randire edyo, twa ka kumine mu Mileta. 16Paulu kuma a anekerire ku piterera Efese ci katere a shimbe thsikati thsothsire mu Asia, inene kuma a yokorwerire ku ka kuma ku Yerusalema mu diyuwa dyo Pentekota, nga ayopo i tawa.

17Unone ou twa ka kumine mu Mileta, Paulu wa ka raire akuru o kereke mu Efese ci na ciwane nenthzi mu Mileta. 18Ou a na kumine, wa wa amberire ci: “Mu na dimuka edi na yoyire mu kaci kenu thsikati thsothsihe ku tunda diyuwa dyo kutanga ku na dyata muno mu ditunga dya Asia. 19Na kwamenangire Fumu ko kucihuthsa kushi nene no mihothzi neereka eyi ya ni keyerire mukaci ko tuyongo to Majuda. 20Ka na thsiire ku mi rawera ngara thsinu thso ku twethsa ku mi kwathsa, na mi rongithsangire pa mbunga no mu manthzio enu. 21Na pire ombangi ku Majuda no Magerike ci aa roera ku cera evi yo no ku thsiurukera kwa Nyambi no ku tawa kwa Fumu wetu Yesu.

22“Mu mone! Pano honi naa thza ku Yerusalema ko ku ni ootera Mupepo Oukenu, ame ka ni dimuka eyi ya ku ka tendahara ku kwange. 23Naa dimuka pohuma ci Mupepo Oukenu waa ni dimukithsa ci mu mbongi no mbongi kupakiwa mu kamenga no makando i na ni taterera. 24Unone ame ka ni varire mwoyo wange ci ukuru mu thsivaka ku kwange, efota yange po ku mana pohuma ekwama eyi naa ni pa Fumu Yesu, ayo ekwama yo ku pa ombangi o Muthzimbu Ouwa o thsihemo thsa Nyambi.

25“Pano honi ni na dimuka ci kwithsa ku kwenu amwe na ni thzi o honga yo Kutumina kwa Nyambi oyu mba a ni mona karo. 26Mweyo, naa mi tongwera rero ci ame ka ni di no murandu kunyinga wenu mwahe. 27Inene ka na thsiire ku mi rawera eanekera ya Nyambi yoihe.

28“Mu cinyunge no ku nyunga mutanga ou na mu hangweriwa ko Mupepo Oukenu kwikara atangereri. Mu vavarere kereke thza Nyambi, ethzi a ciurerire konyinga wenthzi shemwa. 29Ni na dimuka ci munyima thzange kenge kwa ku keya winthzi o ku yapithsa karo ka wa ku na yuvera mutanga ñeke. 30No mu kaci kenu namo kenge kwa ku tunda anu awa ku tengurura oshemwa ku pambanithsa akwakutawa ci a wa shupwere. 31Mweyo mu mamere! Mu vuruke ci mu myaka thzihatu ethzi nekarire nenu ka na thsiire ku nomenithsa munu no munu ku kwenu othsiku no mutenya ko mihothzi.

32“Pano honi naa mi paka kwa Nyambi no ku diywi dyo thsihemo thsenthzi, adyo dyo ku twethsa ku miumba no ku mi pa etambura mu kaci kowa wahe awa a kenithsiwa. 33Ka na cikumbwethzire silivera nji gauda nji evata yo munu. 34Amwe mwathsinda mu na dimuka ci aa moko ange a tu reterire eyi ya fotaharire ku kwetu ame naenthzange. 35Mwinu yoihe eyi na kwamine na mi monithsire ci ko ku kwama nene kenge, twaa roera ku kwathsa awa a na faratera, mu vuruke maywi a Fumu Yesu aa a ambire aye thsinda ci: ‘Mo thsi di thsiyauthzi nene mu kupa ku pita mu kupiwa.’”

36Paulu ou a manine ku amba eyi wa tongamine no ku romberano wahe. 37Wahe a dirire no ku mu kumbatera no ku mu yamwa. 38Eyi ya wa yuvithsire nene mathsiwa po maywi aa a ambire o kuninga ci mbera ka mu mono karo. Ngou a mu thsindekethzire ku dingunde.