Acts 21

Paulu aa thza ku Yerusalema

1Ou twa cithsiireno twa hunyunine ku thzererera ku Koso. Diyuwa edi dya randireko twa thzire ku Rodesi, ou twa tundiremo twa thzire ku Patara. 2Ou twa ka waninemo dingunde edi dya yavukire ku thza ku Fenisia, twa yomaminemo no ku hunyuna. 3Ou twa monine diongo dya Sipera, twa di huthsire ku rumoho ku tamba ku Siria. Twa ka thsekerire mu diya dya Tire inene modiyo dya ka rongorwerire dingunde etenga eyi dya rongire.

4Ou twa ka waninemo erongwa eyi yekariremo, twekarire nayo mayuwa mutanu na edi. Ko ku wa tangerera Mupepo Oukenu, a amberire Paulu ci a thza ku Yerusalema. 5Mayuwa etu ou a pwire, twa fundukire no ku shumuna ruendo rwetu. Wahe, nanuwo nano a tu thsindekethzire ku tu tundithsa mu mbongi. Ou twa ka kumine ku diya twa ka tongamine no ku rombera. 6Ou twa manine ku civumenena twa yomamine mu dingunde, awo a hukire ku diumbo.

7Ou twa tundire mu Tire twa ka kumine mu Pitolemaisi, omu twa ka vumenenine akwakutawa no kwikarano diyuwa dyofoci. 8Diyuwa edi dya randireko, twa fundukire no ku ka kuma mu Sesarea. Twa ka kumenine mu mwanda wa Filipu o ngambi, yumweya po waya o mutanu na aidi a hanguriwire mu Yerusalema. 9Wekarire nana wambuyama ane wathzike awa okethzangire.

10Munyima thzo kwikaramo mayuwa oangi, mukwakukethza o dithzina dyo Agabusi wa keyire ku tunda ku Judea. 11Wa keyire ku kwetu no ku na shimba mwiya wa Paulu no ku u cangithsa ku moko enthzi no ku mauru enthzi no ku amba ci: “Mupepo Oukenu wa amba ci: ‘Dyodino ni na cianga no uno mwiya, no Majuda mu Yerusalema dya ku kanga thsinda thso uno mwiya no ku mu pa mu moko Anukenge.’”

12Ou twa yuvire eyo, atwe nanu omo twa adikanenine Paulu ci a thza ku Yerusalema.

13Unone Paulu wa tawire ci: “Ine eyi mu direra no ku ni yatura mucima? Ni na ciroithsera kadi kwangiwa pohuma, unone no ku ka fera mu Yerusalema mukaci ko dithzina dya Fumu Yesu.” 14Pakuninga ci ka a tawire ku thsiururiwa, twa i thsiire no ku amba ci: “Eshima ya Fumu i tendahare.”

15Munyima thzoa mayuwa twa ciroithserire no ku kambama ku thza ku Yerusalema. 16Imweya kwirongwa yo mu Sesarea ya thzire netu no ku ka tu twara ku nthzio thza Manasoni oku twa ka turerire. Nedi mukwerume o ku Sipera, yumweya werongwa yo kutanga.

Paulu aa hungerithsa Jakovo

17Ou twa ka kumine mu Yerusalema, akwakutawa a ka tu tamburire ko thsinyanyu.

18Diyuwa edi dya randireko Paulu wa thzire netu ku ka mona Jakovo, karo akuru o kereke wahe pekarire. 19Paulu wa wa vumenenine no ku pa muthzimbu ko ku yara keyi naa kwama Nyambi kwAnukenge mukaci kekwama yenthzi.

20Ou a yuvire eyi, a shangarire Nyambi. Ngou a amberire Paulu ci: “O na mono muenthzetu, mungi o ku kuma kupi o Majuda awa na tawa, karo wahe aa shima nene murao wa Mushe. 21Kuma na tongweriwa ci owe waa rongithsa Majuda wahe awa a na tungu mu kaci kAnukenge ci a thsie ku hengeka murao wa Mushe, karo ci a twaranga ano ku mukanda nji ku shupwera thsithsemwa thsetu thso Thsijuda. 22Pano honi ne ine tu na roera ku tenda? Yoshemwa kenge a yuva ci o na kumu.

23“Mweyo, o tende eyi tu ku tongwera. Kwa di pano akwerume ane awa na cethzera pa meho a Nyambi. 24O wa shimbe o thzeno ku Tembere, o kengeneno mu thsidika thso kukenithsiwa, karo o ka wa patarere mwikwama yoihe, ci huki thzo thzi ka keriwe. Apo honi anu wahe kenge a tawa ci eyi na yuvu keyi yoe po ya kwithsa, unone ci owe waa hengeka murao wa Mushe.

25“Eciko Anukenge wakwakutawa po na tu wa ñorera eanekera yetu ci a thsie ku dya edya yo ku tupwera ekupuro, no difura nji nyama weyama yo ku fa ku kathsinga, no ruthziho.” 26Ou dya vire, Paulu wa shimbire awo akwerume ane no ku ka cikenithsano. Wa thzire ku Tembere ku ka dimukithsa yo mayuwa aa kwa ku pwa kucikenithsa no thsikati thso ku pa thsiyambero thso munu no munu.

Paulu aa kwatiwa

27Ao mayuwa o mutanu na edi o ku a di po pepi no ku pwa, Majuda amweya awa a tundire ku Asia a monine Paulu mu Tembere. A shangumunine mbunga thzothzihe awopo a mu kwata. 28A kumbire nene ku amba ci: “Amwe mwa Maisiraele mu tu kwathse! Oyu po yodiyo oyu na rongithsanga anu wahe kokuhe erongithsa yo ku rwithsa mbunga thza Isiraele no murao wa Mushe no Tembere. Kadi eyo pohuma, unone karo naa reta Anukenge ▼

▼Magerike nanu awa a di ci kadi Majuda.

mu Tembere no ku thsireka ethzi Ndau thzo Shokenu.” 29A ambire kengeyo inene pa kutanga diya diyuwa shime aa mona Tirofimo o ku Efese o ku endaura na Paulu mu mbongi, awopo a anekera ci Paulu ngwa shime aa mu twara mu Tembere.

30Mbongi thzothzihe thzekarire shakashaka, anu a tundererire kokuhekokuhe o kwa keya o cira. A na kwatire Paulu no ku mu purututa ku mu tundithsa mu Tembere, popo mathsero a yanthzeriwire. 31O kwa fota ku mwipaa kengeyo, muthzimbu wa ka kumine kwa mukuru o mashwarare o Maroma ci mukwangaranyi u nengena mu Yerusalema yomuhe. 32Popo wa shimbire mashwarare naendithsi amweya o mashwarare o Maroma no ku cirerako oko ku mbunga. Mbunga ou thza monine mukuru o mashwarare no mashwarare enthzi, a thsiire ku fura Paulu.

33Mukuru o mashwarare wa kwatire Paulu no ku tumina ci angiwe no madyenge edi. Ngou epurire honi ci nedi edye karo ci ine a tendire. 34Amweya mu mbunga a kumbire eyi, amweya iya. Pakuninga ci muendithsi o mashwarare shokuru wa kwangire ku wana oshemwa mukaci ko mukwangarakanyi, wa tuminine mashwarare ci a tware Paulu ku thsirombo. 35Paulu ou a ka kumine pa tuyako, mukwangarakanyi wa kurire nene ku ninga ci mane Paulu shime ou a mu yerurire mashwarare.

36Mbunga ethzi thza wa shupwerire thza thzire o kumba ci: “O mwipae oyo! O mwipae oyo!”

Paulu aa ciambera ku Majuda

37Mashwarare o kwa fota kwingenithsa Paulu pa thsirombo, wa rombire muendithsi shokuru o mashwarare ci: “Ene naa tawethziwa ku amba thsimweya ku koe nji?”

Aye wa tawire ci: “O na dimuka Thsigerike nji? 38Ene kadi yowe oya Muegepita oya wa retire mukwangarakanyi no ku thza nekeremi yo 4,000 mu dikunguthsitu?”

39Paulu wa tawire ci: “Ame po no Mujuda o ku Tarese mu Silisia, no mukwa mbongi ethzi thzi pupaana. Naa adikana ci ni ambe ku mbunga.”

40Mukuru o mashwarare wa mu tawethzire, Paulu ngou emanine pa tuyako no ku tutwarithsa anu ko dyoko. Ou a tutwarire, wa ambireno mu Thsiheveru.