Acts 22

1“Amwe mwaenthzange namwe mwatata, mu teerere nawa uno ni ciambera pa meho enu.” 2Ou a mu yuvire o ku amba Thsiheveru a tutwarire kuru. Paulu ngou a ambire ci:

3“Ame po no Mujuda, kuma nerekiwerire mu Tarese o mu Silisia, unone na na kurerire muno mu Yerusalema. Gamaliele yo wa ni rongithsire, karo na fundithsiwire nawa murao wakwathsañuruetu. Na shimine nene ya Nyambi eci edi mu di amwe mwahe rerodino. 4Na nyandithsire anu awa a na shupwera edi Dikuñwa mane no ku wepaithsa, kwanga no ku paka mu kamenga akwerume nambuyama kengeyo. 5Mupurisita shokuru no Nthzango thzakuru thzothzihe aa twethsa ku pa ombangi ci eyi ni amba ya shemwa. Na tamburire mañoro kukwo ku twara kwaenthzetu Majuda o mu Damaseka. Na thzireko ku reta awa anu ku Yerusalema o kwa nangiwa ci na pakiwe mu kamenga.

Paulu aa tongaura edi a tawire kwa Fumu

(Ete 9.1-19; 26.12-18)

6“O ku ni di mu dikuñwa, karo o ku ni kokera ku Damaseka, mutenya diyuwa o ku di kokera pa kaci ko mutwi, popo mwethzi oukuru nene ou wa tundererire ku wiru wa munekire apa nekarire. 7Na wererire pashi no ku yuva diywi edi dya ni amberire ci: ‘Saule, Saule, ine eyi o ni nyandithsera?’

8“Nepurire ci: ‘Yowe odye, Fumu?’

“Wa tawire ci: ‘Yame no Yesu wa Nazareta oyu o nyandithsa.’ 9Awa na endireno a monine oo mwethzi, unone ka yuvithsithsire diywi dyoyu wa ambire nange.

10“Ngou na ambire ci: ‘Ine ni na roera ku tenda, Fumu?’

“Fumu ngou a ni amberire ci: ‘O katuke o thze mu Damaseka, modiyo o ka tongweriwa yoihe eyi o na piwa ku kwama.’

11“Pakuninga ci ka na twethsire ku mona mukaci ko kutethzima ko o mwethzi, awa na endireno a ni kwatererire ku dyoko ku ni twara mu Damaseka.

12“Mukwerume o dithzina dyo Ananiasi wa keyire ku na ni mona. Nedi munu oyu wa cipakire ku ku hengeka murao, karo wa remekiwire ku Majuda wahe awa a tungire mu Damaseka. 13Wa keyire no ku nemana ku nyonga thzange no ku ni ambera ci: ‘Saule muenthzange, o mone karo!’ Popo na twethsire ku mu mona.

14“Ngou a ni amberire ci: ‘Nyambi wakwathsañuruetu o na ku hangura ci o dimuke eshima yenthzi no ku mona O Muwawa, karo ci o yuve diywi dyo ku tunderera mu kanwa kenthzi. 15Inene kenge wa kwikara mbangi wenthzi kwanu wahe keyi o na mono no ku yuva. 16Pano honi ne ine eyi o taterera? O wimane o korovethziwe, o yoiwe kwivi yoe yoihe, ko kwithsa pa dithzina dyenthzi.’

17“Ou na hukire ku Yerusalema, diyuwa dimweya o ku ni rombera mu Tembere na monine thsimwithso. 18Na monine Fumu o ku ni ambera ci: ‘Yokorore o tunde mu Yerusalema popano, inene awa a dimo ka ku tambura ombangi woe keyi yange.’

19“Na tawire ci: ‘Fumu, awa anu a na dimuka shemwa ci shime naa thzanga mu sinagoge no sinagoge ku ka paka mu kamenga no ku fura awa a na tawa ku koe. 20Karo uya wa viithsiwire onyinga wa mbangi woe Setefani, nemanine pa mbadi ku i tawethza no ku nyunga ekoveyo yo peuru yo waya a mwipaire.’

21“Fumu ngou a ni amberire ci: ‘O thze, inene kenge ni ku tuma kokure, kwAnukenge.’”

22Mbunga thza mu teererire shime ku na kuma pedyo diywi. Ngou a yoomokire wahe ci: “Oyo munu o kengeyo a tundithsiwe pa kaye! Ka a roerire ku yoya!” 23O kwa yoomoka kengeyo no ku cishupaura ekoveyo yo no ku tuthsaera muve mu wiru, 24muendithsi shokuru o mashwarare wa tuminine ci Paulu a twariwe pa thsirombo. Wa ambire ci a furiwe no kwipauriwa ci ku wanine ci ine eyi a mu yoomokerire anu kengeyo. 25Uno honi o kwa na mana ku mwanga ci a furiwe, Paulu wa amberire muendithsi o mashwarare o Maroma oyu wemanine apo ci: “Ene murao ne waa tawethza ku fura Muroma o ku shime ku waniwa no murandu nji?”

26Oyo muendithsi o mashwarare o Maroma ou a yuvire kengeyo, wa thzire kwa muendithsi shokuru o mashwarare no ku ka mwipura ci: “Ine eyi o fota ku tenda? Oyu munu po Muroma.”

27Muendithsi shokuru ngou a thzire kwa Paulu no ku ka mwipura ci: “O ni tongwere, ene o Muroma nji?”

Aye wa tawire ci: “Ii, no Muroma.”

28Oyo muendithsi shokuru wa ambire ci: “Na patarire madi oangi ci nikare no Muroma.” Uno honi Paulu wa tawire ci: “Ame po no Muroma ko kwerekiwa.”

29Popo anu awa a fotire kwipaura Paulu a hukire munyima. Muendithsi shokuru wa yapire ou a dimukire ci Paulu po Muroma, pakuninga ci wa tuminine ci angiwe no ku furiwa.

Paulu mu Nthzango

30Uno honi diyuwa edi dya randireko, muendithsi shokuru wa fotire nene ci a dimukere shemwa ethsi thsa retithsire ci Majuda a thzekithse Paulu. Wa mu puturire no ku tumina ci akuru o mapurisita no Nthzango thzothzihe a ciwane. Ngou a retire Paulu no ku na mwimeka pa rupara rwo.