Act 23 | MhoSC | STEP | Paulu wa kengererire ko thsithzui Nthzango thzothzihe no ku amba ci: “Andengenu, na ni yoyo ko mumoneno ouwa pa meho a Nyambi shime ku na kuma mu diyuwa dyo rero.”

Acts 23

1 Paulu wa kengererire ko thsithzui Nthzango thzothzihe no ku amba ci: “Andengenu, na ni yoyo ko mumoneno ouwa pa meho a Nyambi shime ku na kuma mu diyuwa dyo rero.” 2 Mupurisita shokuru Ananiasi ngou a tuminine awa emanine ku mbadi thza Paulu ci a mu fure ku kanwa. 3 Unone Paulu wa ambire ci: “Nyambi kenge a fura owe o mukwamahetaheta! Eyi o nekarera apo po ku ni ratura ko murao, unone waa cora murao ko ku tumina ci ni furiwe.”

4 Awa emanine po pepi na Paulu a mu amberire ci: “Ine owe yo ku shwahwera kengeyo mupurisita shokuru wa Nyambi?” 5 Paulu ngou a wa tawire ci: “Andengenu, ka ni i dimukire ci oyu munu po yodiyo mupurisita shokuru, inene ku na ñoriwa ci: ‘Katere o ambe thsothsimango kwa muendithsi o mbunga thzenu.’”

6 Paulu ou a dimukire ci amweya omo mu Nthzango po nedi Asaduki amweya Afarithsi, wa kuererire ci: “Andengenu, name no Mufarithsi, mwanahoka wAfarithsi. Naa thzekithsiwa mukaci kokurupero o kupinduka kwafu.” 7 Ou a manine ku amba kengeyo, kwa katukire dikanyi mukaci kAfarithsi nAsaduki, Nthzango athzopo thzi citepa. 8 (Inene Asaduki awo a amba ci kwithsa kupinduka kwafu, karo kwithsa tungeru nji mipepo. Unone Afarithsi awo aa tawa eyo yoihe.)

9 Muyoyo wa kurire nene, unone arongithsi amweya o murao kwAfarithsi a katukire no ku kanyeka nene ci: “Ka a di no murandu oyu munu. Pamweya ngwa mupepo nji kangeru ka na amba nenthzi ne?” 10 Mukwangarakanyi wa kurire nene ku ninga ci mane muendithsi shokuru o mashwarare wa yapire ci Paulu kenge a papuriwa. Ngou a tuminine mashwarare ci a ka u wa nyange no ku mu reta ku thsirombo.

11 Othsiku ou wa randireko, Fumu wemanine ku mbadi thza Paulu no ku amba ci: “O tanare mucima! Inene dyodi no pa ombangi keyi yange mu Yerusalema, dyo na roera ku ka pa ombangi keyi yange mu Roma.”

Kayongo ko kwipaa Paulu

12 Anaci mathsiku, Majuda amweya a ciyongorire no ku cithziera ci kwithsa ku dya nji ku nwa shime o ku a nepaa Paulu. 13 Awa ekarire omo mu kayongo a pitererire makumi ane. 14 A thzire kwakuru o mapurisita naendithsi o mbunga no ku ka amba ci: “Tu na cithziera ci kwithsa ku dya nji ku nwa shime o ku tu nepaa Paulu. 15 Mweyo, amwe no Nthzango mu rombe mukuru o mashwarare ci a rete Paulu kuno ko ku monithsa eci mwaa fota ku na fotithsithsa nawa thsiamba thsenthzi. Atwe tu na ciroithsera ku mwipaa o ku shime ku na kuma kuno.”

16 Uno honi mwepwa Paulu wa yuvire aka kayongo, ngou a cirerire ku thsirombo thso mashwarare ku ka tongwera Paulu. 17 Paulu ngou ethsire yumweya kwaendithsi o mashwarare o Maroma no ku na mu ambera ci: “O tware oyu mushumba kwa muendithsi shokuru o mashwarare, ko i di eyi a fota ku ka mu tongwera.”

18 Ngou a mu shimbire no ku mu twara kwa mukuru o mashwarare no ku ka amba ci: “Paulu o thsinthzinda yo na nithsi no ku ni romba ci ni rete oyu mushumba ku koe, inene ko i di eyi a fota ku ku tongwera.”

19 Muendithsi shokuru o mashwarare wa kwatire oya mushumba ku dyoko no ku thza nenthzi ku mukunda no ku ka mwipura ci: “Ine eyi o fota ku ni tongwera?” 20 Aye wa ambire ci: “Majuda amweya a na ciyuvu ci peunthza a ku ku rombe ci wa ku tware Paulu ku Nthzango ku monithsa eci aa fota ku ka kenga nawa thsiamba thsenthzi. 21 Unone wa ku rakwa yo, inene anu o ku piterera makumi ane kukwo a nondamena ku mwipaa. A na cithziera ci ka ku dya nji ku nwa shime o kwa na mwipaa. Awo a na ciroithsera, aa taterera pohuma ci o tawe.”

22 Oyo muendithsi shokuru o mashwarare ngou a thsiire oyo mushumba ci a thze, no ku mu ambera ci: “Katere o i tongwere munu ci ko i di eyi o na ni tongwera.”

Paulu aa tuturweriwa ku Sesarea

23 Muendithsi shokuru o mashwarare ngou ethsire aidi kwaendithsi enthzi o mashwarare o Maroma. Wa wa amberire ci: “Mu pake pofoci mashwarare o makumi o makumi edi (200), nakwatukambe o makumi mutanu na edi (70) no makumi o makumi edi (200) o mashwarare o makothzi. Mu ciroithsere mu katuke ko thsikati thso 9 thzothsiku mu thze ku mbongi thza Sesarea. 24 Mu roithse no tukambe apa a enda Paulu ci a ka kumithsiwe nawa kwa nguvuru Felekisi.” 25 Ngou a ñorire diñoro edi dya ambire kenge ci:

26 “Yame no Kilaude Lisiasi, ku koe owe shokuru nguvuru Felekisi, naa ku vumenena. 27 Oyu munu kuma na mu kwata Majuda awopo a fota no ku mwipaa. Ou na ni yuvu ci Muroma, ngou na ni thziko no mashwarare ange ku ka mu amwena. 28 Ko ku fota ku dimuka eyi naa thzekithsiwa, na ni mu twara mu Nthzango thzo. 29 Na ni wana ci aa thzekithsiwera yeamba yo dikanyi dyo murao wo o Thsijuda, uno honi eyi naa thzekithsiwa ka i roerire ku paiwera munu nji ku i pakiwera mu kamenga. 30 Ou na ni dimukithsiwa yo kayongo ko ku mwipaa, na ni mu tumithsa ko wanguwangu ku koe. Na ni tumina awa a mu thzekithsa ci a ku na kumithse ku koe eamba yo.”

31 Mashwarare a tendire eyi a tuminiwire, a shimbire Paulu othsiku no ku mu twara ku mbongi ethzi thzi nethsiwa ci Antipatiri. 32 Diyuwa edi dya randireko, mashwarare aa a endire no mauru a hukire ku thsirombo, akwatukambe awo a twarire Paulu ku Sesarea. 33 Ou a ka kumine mu Sesarea, a ka pire diñoro nguvuru Felekisi no ku kumithsa Paulu ku kwenthzi. 34 Wa varire edyo diñoro no kwipura Paulu ci aa tunda mu ditunga dipi. Ou a yuvire ci wa ku Silisia, 35 wa mu amberire ci: “Kenge na ku kenga thsiamba thsoe awa a na ku thzekithsa ou a ku na kuma.” Ngou a tuminine ci Paulu a nyungiwe kengeyo o ku di mu marombe a Heroda.