Acts 24

Paulu aa thzekithsiwa mu kuta thza Felekisi

1Munyima thzo mayuwa mutanu, Ananiasi mupurisita shokuru wa urumukire ku thza ku mbongi thza Sesarea nakuru amweya o Majuda no mukwa ku wemanena wo mwiamba o dithzina dyo Tetulo. A ka kumithsire eamba yo na Paulu kwa nguvuru. 2Paulu ou ethsiwerire mu kaci, Tetulo wa tatekire ku kumithsa eamba kwa Felekisi ci:

“Shokuru Felekisi, na twikara ko thsiyaro thsikati thsothsire mu kutumina koe, kumona koe yo ku rupara na ku reta epiruka muno mu ditunga dyetu. 3Mu makuñwa oahe karo kokuhe, shokuru Felekisi, twaa tambura eyi kokanderero oukuru. 4Uno honi ko kukana ku ku manena thsikati, naa ku romba ci ko thsihemo thsoe o tu teerereko kamanana.

5“Na tu wana ci oyu munu po thsishupi, aa reta mikwangarakanyi mu kaci ko Majuda mu kaye kokahe. Yodiyo mukuru o thsikwata ethsi thsi nethsiwa ci Manazareni. 6Karo shime aa fota ku thsireka Tembere, uno honi atwepo tu mu kwata. [Shime twaa fota ku mu ratura ko murao wetu o Thsijuda, 7unone Lisiasi muendithsi o mashwarare ayepo wingenena eamba pa kaci no ku u tu nyanga kokoro, 8no ku tumina ci awa a na mu thzekithsa a keye kuno ku koe. ▼

▼Ka thzi di mu mañoro o kutanga.

] O u cipawere othsinda kenge o wana ci eyi tu amba ya shemwa.”

9Majuda nawo ngou a cipakererire na mukwa ku wemanena ku tanarithsa ci eyi a ambire po ya shemwa.

10Nguvuru ngou a rapethzire Paulu ci a ambe. Paulu wa tawire ci: “Ko ku dimuka ci no shimbi myaka thzothzingi o ku ratura muno mu ditunga, ni na nyanyuka ku citawera pa meho oe. 11Waa twethsa ku fotithsithsa no ku wana ci ka na ku piti mayuwa o dikumi na edi ku tunda apa na ni thzera ku Yerusalema ku ka rombera. 12Awa a ni thzekithsa ka na ni wana o ku ni cikanyeka no munu nji ku reta mukwangarakanyi mu mbunga nji mu Tembere nji mu masinagoge nji ku ngana mu mbongi. 13Karo tumba twethsa ku monithsa ci eyi a ni thzekithsa ya shemwa.

14“Uno honi, eyi ni citawera pa meho oe po eyi, naa romberanga Nyambi wakwathsañuruetu ko ku shupwera Dikuñwa, edi ethsa awa ci thsipani. Naa tawa yoihe eyi i na citombora no murao wa Mushe neyi a ñorire akwakukethza. 15Name nawo, twaa kurupera kwa Nyambi ci anu wahe owawawa nowa o dipethso kenge a ku pinduka kwafu. 16Mweyo, naa kwama momuhe omu ni na twethsera ci mumoneno wange wikare ouwa pa meho a Nyambi nanu.

17“Munyima thzo myaka thzothzingi, na hukire ku Yerusalema ku twara ekwathsa kwahepwe o mu ditunga dyange, no ku ka kwamena Nyambi eyambero. 18O ku ni kwama eyo, a ni wanine o ku ni na kenithsiwa mu Tembere. Ka kwekarire mbunga nji ku reta mukwangarakanyi. 19Uno honi kwa di Majuda amweya o ku ditunga dya Asia awa ekarirepo, a na roera ku keya kuno pa meho oe ku na kumithsa eamba ngeci ko i di eyi a na ni thzekithsa. 20Nji awa a di pano a ambe ngeci shime aa ni wanena murandu ou nemanine pa meho o Nthzango, 21shime thsinu thsofoci ethsi na kuererire o ku ni nemana mu kaciko ci: ‘Ethsi mu ni thzekithsera rero po yo ku tawa ci ko ku di kupinduka kwafu.’”

22Uno honi Felekisi ko ku dimuka nawa yedyo Dikuñwa, wemekire eamba no ku amba ci: “Lisiasi muendithsi shokuru o mashwarare ou a ku na kuma mbeci na ku rature eamba yenu.” 23Ngou a raererire muendithsi o mashwarare o Maroma ci a nyunge Paulu, unone a mu pe kwikara ko ku rukuruka kamanana no ku tawethza ambushenthzi ku na mu kwathsa eyi i na fotahara.

24Munyima thzo mayuwa oapu, Felekisi na munuwenthzi o Mujuda o dithzina dyo Dirusila a keyire no ku tuma munu ku kethsa Paulu. Wa mu teererire o ku ambaura yo thsitawo kwa Krisitu Yesu. 25Paulu o ku ambaura yowawa, kucinyunga neyi yo raturo ethzi thzi keya, Felekisi wa yapire nene, ngou a ambire ci: “O thze honi ku na kwana pano! Ou na ku wana thsikati kenge na ku kwithsa karo.” 26Karo Felekisi kuma a kuruperire ci ngwa Paulu kenge nga a mu pa madi o kweta, mweyo, wa mwithsangire rorungi no ku na ambaura nenthzi.

27Ou kwa pitire myaka thzidi, Posiasi Fesitusi wa shwanine Felekisi. Uno honi ko ku fota ku roerithsa Majuda, Felekisi wa thsiire Paulu mu kamenga.