Act 26 | MhoSC | STEP | Agiripa ngou a amberire Paulu ci: “O na piwa thsikati thso ku citawera othsinda.” Paulu wemekire dyoko dyenthzi no ku tateka ku amba kenge ci:

Acts 26

Paulu aa citawera pa meho a Agiripa

1 Agiripa ngou a amberire Paulu ci: “O na piwa thsikati thso ku citawera othsinda.” Paulu wemekire dyoko dyenthzi no ku tateka ku amba kenge ci: 2 “Fumu Agiripa, naa mona ci ni di no thsiyauthzi rero kwimana pa meho oe ku ciambera mwinu yoihe eyi a ni thzekithsa aendithsi o Majuda. 3 Thsikurupo pakuninga ci o na dimuka nawa ethsemwa no makanyi o Majuda. Mweyo, naa ku romba ci o kwate mucima o ni teerere nawa.

4 “Majuda wahe a na dimuka mikarero thzange ku tunda ku wanuke wange. Mu ditunga dyetu na kurerire no mu Yerusalema. 5 Na ni dimuka thsikati thsothsire, ngeci a na i shimi aa twethsa ku pa ombangi ci no yumweya o mu thsikwata thsAfarithsi ethsi na thsi tanarithsanga nene thsitawo thsetu. 6 Pano honi aa ni thzekithsera yo ku tawa no ku kurupera thsikumbwethzo thsa Nyambi ethsi a kumbwethzire kwakwathsañuruetu. 7 Mikuta thzetu thzo dikumi na thzidi thza Isiraele thzaa kurupera ku mona ethsi thsikumbwethzo o ku thsi citombora, uno a rombera nene Nyambi mutenya nothsiku. Fumu Agiripa, ou okurupero odiyo ou a ni thzekithsera awa Majuda! 8 Ine eyi i mi karupera amwe mwa Majuda ku tawa ci Nyambi aa twethsa ku pindura afu?

9 “Name na tawire shemwa ci naa roera ku tenda momuhe omu ni na twethsera ku rwithsa dithzina dya Yesu wa Nazareta. 10 Eyo yodiyo na tendire mu Yerusalema. Ko ku ni pa okoro akuru o mapurisita, na pakire mu kamenga akwakutawa owangi, karo ou a ratweriwire kufa na tawire kengeyo. 11 Rorungi o ku ni thzanga ku masinagoge ku ka wa pa humbithso no ku wa ootera ci a yengwere Yesu. Na wa nyandithsire nene kuninga ci mane shime naa wa shupweranga no ku mambongi o ku matunga ao.

Paulu aa tongaura edi a tawire kwa Fumu

(Ete 9.1-19; 22.6-16)

12 “Diyuwa dimweya na thzire ku Damaseka ku endera eyo kokoro no thsitumiwa thsakuru o mapurisita. 13 Pa kaci ko mutenya, Fumu wange, o ku ni di mu dikuñwa kengeyo popo mumunyi o kwethsa nene kupita diyuwa wa tundire ku wiru ku ni paka mukaci nowa na endireno. 14 Twahe twa wererire pashi, ngou na yuvire diywi edi dya ni amberire mu Thsiheveru ci: ‘Saule, Saule, ine eyi o ni nyandithsera? Kwithsa eyi nga i kwathsa owe ku rwithsa eshima yange. ^{▼▼Waa cikurura othsinda ko ku raha ku mushengera eci puru oyu nyakura ku thsitondo thsa ñathsire wenthzi thso kushongonoka.}’

15 “Na ambire ci: ‘Yowe odye, Fumu?’ Edyo diywi dya tawire ci: ‘Yame no Yesu oyu o nyandithsa. 16 Uno honi o katuke o wimane kedyato yoe, inene ni na hokoka ku koe ku na ku hangura ci o wikare mupikange no mbangi wange keyi o na mono neyi na ku ku monithsa ku rupara. 17 Kenge na ku ku amwena kwanu oe a Isiraele no ku kwAnukenge oku ni ku tuma pano, 18 ku ka yanthzurura meho o, ci nga a thsiuruke ku tunda mu mirema ku thza mu mwethzi, no ku wa tundithsa kukoro wa Satana a thze kwa Nyambi. Wangu honi a ku tambure otetero wevi no ku wana ndau mu kaci kanua Nyambi awa a kenithsiwa ko thsitawo thso ku kwange.’

Paulu aa ambaura yekwama yenthzi

19 “Mweyo, Fumu Agiripa, na ni hengeka nene ethsi thsimona thsa tundire ku wiru. 20 Ngou na tangire ku rongithsa mu Damaseka, mu Yerusalema no mu Judea yomuhe mbeci honi kwAnukenge, ci a cere no ku thsiurukera kwa Nyambi no ku tenda etenda yo ku monithsa kucera kwo. 21 Eyi yodiyo a ni kwaterire Majuda mu Tembere no ku fota ku nipaa. 22 Unone Nyambi naa ni nyungu shime ku na kuma mu diyuwa dyo rero, pano ni nemana muno ku pa ombangi kwanu wahe, owaonye nowa owakuru. Kwithsa yayo eyi ni na amba shime eyi aa ambire akwakukethza na Mushe ci kenge ya ku tendahara. 23 Ayo yo ku amba ci Mesiya kenge a ku nyandithsiwa karo kenge a kwikara o kutanga ku pinduka kwafu, no ku raura muthzimbu o mwethzi ku Majuda no ku kwAnukenge.”

24 Paulu o ku ciambera kengeyo, Fesitusi wa mu yukukerire ci: “Waa thzaruka Paulu! Kucirongithsa nene koe kwaa ku thzarukithsa!”

25 Paulu wa tawire ci: “Shokuru Fesitusi, ka ni thzarukire. Eyi ni amba po ya shemwa karo ya maano. 26 Inene Fumu Agiripa na dimuka eyi enu ngeyi ni ambera kondume. Naa rakwa ci eyi etandahara yoihe na i mu kumena, inene ka na i tendiwera ku mukunda. 27 Fumu Agiripa, ene waa tawa yakwakukethza nji? Ni na dimuka ci waa i tawa.” 28 Agiripa ngou a amberire Paulu ci: “Ene owe ne waa anekera ci kenge nga o ni thsiurura mu thsikati thsothsipu ci nikare Mukrisitu nji?” 29 Paulu wa ambire ci: “Yaa twethsa kwikara thsikati thsothsipu nji thsothsire, naa rombera kwa Nyambi ci kadi owe pohuma unone wahe awa a ni teerera rero nga ekare eci ame, ku tundithsako pohuma aa madyenge.”

30 Ngou fumu, nguvuru, Berenisi nowa ekarireno emanine no ku thza. 31 Ou a punine, a tatekire ku i ciambithsana ci: “Oyu munu kwithsa ethsi na epithsa thso ku roera kwipaiwera nji ku pakiwera mu kamenga.”

32 Agiripa wa amberire Fesitusi ci: “Oyu munu nga ka na a cirombera ku thza kwa Sesare nga aa punithsiwa.”