Acts 27

Paulu aa twariwa ku Roma

1Ou a manine ku ciyuva ci twaa roera ku thza ku Itali no dingunde, Paulu nenthzinda imweya a pakiwire mu moko a muendithsi o mashwarare o Maroma o dithzina dyo Juliasi, muendithsi o thsipani thso mashwarare ethsi thsi nethsiwa Agusitu. 2Twa yomamine mu dingunde edi dya tundire ku diya dya Adiramiti edi dya roerire ku thza o kura mu maya o ditunga dya Asia, atwepo tu hunyuna. Arisitako, Mumasedonia o ku Tesalonika wekarire netu.

3Diyuwa edi dya randireko twa ka thsekerire mu Sidoni. Juliasi wa monithsire thsihemo thsothsikuru kwa Paulu, wa mu tawethzire ku thza kwambushenthzi ci nga a ka mu peko eyi ya fotaharire. 4Twa thsekurire omo no ku pitera ku wiko wa Sipera inene kuma twa ramathsire mupepo. 5Twa reerire diwate po pepi no kakuro ka Silisia na Pamfilia, no ku ka thsekera mu Mira, mbongi thzo mu Lisia. 6Omo modiyo a ka wanine muendithsi o mashwarare o Maroma dingunde edi dya tundire ku Alekisandiria ku thza ku Itali, ngou a tu yomekiremo.

7Twa vuire nawanawa mayuwa oangi no ku ka kuma kokaru pepi na Kinido. Ou wa tu kwangithsire mupepo ku henyako, twa vuerire ku mbadi thzo diongo dya Kirete, ku ka piterera huku thza Salumone. 8Twa endire kengeyo kokaru ku mbadi thzo diwate shime ku ka kuma mu ndau ethzi thzi nethsiwa Diya Dyonawa, pepi no mbongi thza Lasea.

9Twa shimbire thsikati thsothsire nene omo, ku vua mu diwate kwa thzire o yapithsa inene nedi o ku na di piti Diyuwa dyOtetero. ▼

▼Diyuwa dyo kucikanga no nthzara.

Paulu ngou a ambire ci:

10“Andengenu, naa mona ci runo ruendo ku tunda pano kenge ru karupa ngeci o tu shumune. Dingunde netenga kenge twa ku i yawa, mane no myoyo thzetu kengeyo.” 11Unone oya muendithsi o mashwarare o Maroma ka a rakwire eyi a ambire Paulu, aye kuma a tawire pohuma eyi a ambire thsitumi o dingunde no thsinda wadyo. 12Pakuninga ci edyo diya kadi diwa kwikaramo pa kufu, ongi wo awa ekarire mu dingunde a ciyuvire ci ku hunyuniwe, ko ku kurupera ku ka kuma mu Fenekisi no ku kekaramo kufu yomuhe. Fenekisi po nedi diya dyo mu Kirete edi dya tanekerire ku mboera o mutoko no ku wiko o mutoko.

Dyungu mu diwate

13Ou kwa pepire mupepo oupu ku tunda mu mboera, anu a anekerire ci ku di nawa. A yerurire dinjanga no ku vuera ku mbadi thzo rupimingi rwa Kirete, pepi no dikambo. 14Unone mu thsikati thsothsipu mupepo o dyungu ou u nethsiwa o ku wiko o ku muvo, ▼

▼Mu Thsigerike po: Eurakilo.

wa vukukire ku tunderera pa diongo. 15Wa na furire pa dingunde, karo pakuninga ci twa kwangire kwingena pa dyungu, twa i cihupwerire atwepo tu ka thza o puka.

16Ou twa ka pitire ku mbadi thzo kaongoana ka Kauda, twa ka twethsire kokaru ku kokera mu dingunde katoana ko ku dingunde. 17Ngou a thzingerire nene miothzi dingunde ku di tanarithsa. Kuma yapire ku pukera ku diheke dya Sitisi, ▼

▼Ku nganga thza Afurika.

ngou a huwire dimbatu dyodikuru dyo dingunde, no ku thsia dingunde ci di cipukere ku mupepo.

18Mupepo o dyungu wa twarererire ku pepa, mweyo diyuwa edi dya randireko a tatekire ku konthzaera etenga imweya mu meyu. 19Mu diyuwa dyo muthsihatu a konthzerire mu diwate ekwamithsa imweya yo dingunde ko moko o. 20Twa shimbire mayuwa oangi tu mono diyuwa nji matungwethzi, karo mupepo wa twarererire kengeyo ku ngundunga. Ku hura twa cihupwerire okurupero o kuninga ci kenge twa ku yoya.

21Anu a shimbire thsikati thsothsire kwithsa ku dya, Paulu wemanine pa rupara rwo no ku amba ci: “Andengenu, kuma na mu roera ku ni yuva iya na ni amba ci twa tunda mu Kirete, eyi na ipa neyi na i yawiwa nga ka na i dikara. 22Pano honi naa mi romba ci mu tanare micima, kwithsa shaanga yofoci ku kwenu oyu wa ku fa shime dingunde pohuma dyo dya kwipa. 23Inene uya othsiku u na pu ni na mono kangeru ka Nyambi oyu ni kwamena no ku rombera aka ka na nemana ku nyonga thzange, 24no ku ni ambera ci: ‘Wa yapa Paulu, o na roera ku kemana pa rupara rwa Fumu shokuru Sesare! Karo ko thsihemo thsenthzi Nyambi, na ku pa myoyo thzowa o endano wahe.’ 25Mweyo, andengenu, mu tanare micima, inene naa kurupera Nyambi ci kenge a tenda dyodi a na ni ambera. 26Uno honi kenge tu pukera pa diongo dimweya.”

Dyungu dyaa pukithsera dingunde pa diongo

27Pa kaci kothsiku o mu dikumi na ane o ku tu pukithsiwa kengeyo ku dyungu mu diwate dya Adiria, avui o dingunde a anekerire ci ngwa aa kokera pa dikambo. 28Ngou a shurumunine muothzi o dinjanga no ku wana ci nedi othzungi o ku kwana mauru o 120. Munyima thzo thsikati thsothsipu a erekire karo no ku wana ci nedi othzungi o ku kwana mauru o 90. 29Kuma yapithsire ci dingunde dyetu kenge di cirenga pa mawe. Ngou a pakire manjanga ane mu meyu o ku dihuto dyo kunyima no ku rombera ci nga di ve diyuwa.

30Avui o dingunde a fotire kwomboroka mu dingunde, a shurumwenine katoana mu meyu, ku monithsa eci aa fota ku ka shurumuna manjanga o ku dihuto dyo ku rupara. 31Unone Paulu wa amberire muendithsi o mashwarare o Maroma no mashwarare kengeyo ci: “Ngeci awa avui o dingunde kekaramo muno mu dingunde, mwahe kenge mu fa.” 32Mashwarare ngou a tetire miothzi thzako katoana no ku ka thsia ci ka thze o puka no meyu.

33O ku di fota ku va diyuwa, Paulu wa adikanenine anu wahe ci a dye. Wa ambire ci: “Na mu shimbi mathsunda edi o ku mu cithzekera kwithsa no ku dya. 34Pano naa mi romba ci mu dye ci mu wane okoro mu yoye. Inene kwithsa shaanga dihuki dyofoci edi di thzuruka ku mitwi thzenu.” 35Ou a manine ku amba eyo, wa shimbire dikende no ku kanderera kwa Nyambi o kwa na mu tanekera wahe. Wa di kuyurire no ku tateka ku dya. 36Wahe a tanarire micima, awopo a dya nawo. 37Twahe atwe twekarire omo mu dingunde po twakwa 276. 38Ou a dire wahe kwikuta, a konthzaerire mathsaka o vuroto mu meyu ku rethzupithsa dingunde.

39Ou dya vire diyuwa avui o dingunde ka dimukire edyo ditunga, a monine pohuma diko dyo dikambo dyo ruheke, a anekerire ku thsekeramo nga ayopo i tawa. 40Ngou a tetaurire manjanga no ku a thsia mu diwate, karo a puturire mapepe o ku thsiururithsa dingunde. Ngou emekire dimbatu dyo ku rupara ci mupepo u pukithsere dingunde ku dikambo. 41Unone dingunde dya cirengire pa diheke. Dihuto dyo ku rupara dyo dingunde dya kakaterirepo no ku kwanga ku tundapo, maci thzadyo thza cothzauriwire epinthzipinthzi ku mañithsingi aa a cipumaurirepo.

42Mashwarare a cekire kwipaa enthzinda ci katere i yoe no kwomba. 43Unone muendithsi o mashwarare o Maroma wa wa kanithsire ku kwama kengeyo inene kuma a fotire ku yoyithsa Paulu. Ngou a tuminine ci anu wahe o ku twethsa ku yoa a tange ku reera mu meyu ku thza pa dikambo. 44Awa thsiarerire a thzire pa dikambo ko ku kwaterera pepara nji epinthzi yo diya dingunde. Kengeyo dyodiyo a ka kumine nawa waheno pa dikambo.