Act 28 | MhoSC | STEP | Ou twa ka kumine nawa pa dikambo, mbeci tu dimuke ci diya diongo dya ethsiwa Malita.

Acts 28

Paulu mu diongo dya Malita

1 Ou twa ka kumine nawa pa dikambo, mbeci tu dimuke ci diya diongo dya ethsiwa Malita. 2 Anu o muya mu diongo a tu tamburire no ku tu monithsa thsihemo thsothsikuru nene. Pakuninga ci mvura kuma a rokire, karo kuma kwomborire, a tu fakarerire mudiro.

3 Paulu wa ka koakoire yaara, ou a na i pakire pa dithziko, pa tundire diyoka edi dya cirire ku kupya, adyopo di mu humenena ku dyoko. 4 Anu o muya mu diongo ou a monine diyoka o ku di kunthzerera ku dyoko dyenthzi, a ambire mu kaciko ci: “Yoshemwa oyu munu thsikenyembwa. Shaanga ci na para ku meyu, pano nyambi shiwana mavwevwe ^{▼▼Nyambi o shiwana mavwevwe po yodiyo nyambi o mbuyama oyu a dimukire awo mwethso thsikati.} ka a mu tawethzire ku yoya.” 5 Paulu wa kukumwenine edyo diyoka mu mudiro, unone ka dya mu kururire. 6 Anu kuma anekerire ci kenge a tuumana nji ku wera pashi popo no ku fa, unone ou kwa pitire thsikati thsothsire kadi ya ku tendahara, a pirurire eanekera yo no ku amba ci Paulu po kanyambiana.

7 Muya mu diongo po pepi nopa twombokerire, kwekarire makanda a nduna odyo diongo o dithzina dyo Pabuliasi. Wa tu tamburire ko thsihemo mu mayuwa ahatu. 8 Tata wa Pabuliasi kuma a rarire podidi o ku kora nene dihokoma no ku tuhuka onyinga. Paulu wengenine mu nthzio thzenthzi ku ka mu romberera, wa ka mu kambekire moko no ku mu porithsa. 9 Munyima thzo ku tendahara eyi, akwakukora wahe amweya o muya mu diongo nawo a keyire no ku na porithsiwa. 10 A tu pire direma dyodikuru, karo o ku tu fota ku hunyuna a tu pire enu yoingi eyi ya fotaharire mu ruendo rwetu.

Paulu aa kuma mu Roma

11 Munyima thzo maonda ahatu, twa hunyunine no dingunde dyadyo, dyo ku diya dyo mbongi thza Alekisandiria, dyo thsidimukithso thso Anyambi o Marambi ^{▼▼Kasitore na Polukisi.}, edi dyekarire omo mu diongo kufu yomuhe. 12 Twa ka thsekerire mu mbongi thza Sirakusi omu twa ka onthzire mayuwa ahatu. 13 Ou twa tundire omo twa vuire no ku ka kuma mu Regio. Diyuwa edi dya randireko mupepo o ku mboera wa keyire, edi dya randireko karo twa ka kumine mu Puteoli. 14 Omo twa ka waninemo aenthzetu akwakutawa awa a tu rombire kwikarano thsunda. Ngou honi twa ka kumine mu Roma.

15 Akwakutawa o mu Roma a yuvire ci twaa keya, mweyo a keyire ku Maurithsero a Apiasi no ku Maturero Ahatu Enda ku na ciwana netu. Paulu ou a monine awa akwakutawa, wa kandererire kwa Nyambi, karo ya mu tanarithsire mucima.

16 Ou twa kumine mu Roma, Paulu wa tawethziwire kwikara yofoci no dishwarare dyo ku mu nyunga.

Paulu aa honga mu Roma

17 Munyima thzo mayuwa ahatu, Paulu wethsire aendithsi o Majuda. Ou a ciwanawanine, Paulu wa wa amberire ci: “Andengenu, shaanga ci ka nepithserire mbunga thzetu nji thsithsemwa thsakwathsañuruetu, nangiwire mu Yerusalema no ku piwa mu moko o Maroma. 18 A nipaurire awopo a fota ku ni rukurura, inene ka ni wanenine murandu o ku roera kwipaiwera. 19 Unone Majuda ou a kanine, na ciyuvire ci ni rombe ku retiwa kwa Fumu shokuru Sesare. Kadi cingwa ko i di eyi ni fota ku thzekithsa anuange. 20 Eyi ngeyi na ni mithsera ku na mi mona no ku amba nenu. Eyi a niangerire noa madyenge po yo ku tawa koyu a na kurupera Maisiraele.” ^{▼▼Paulu ou a ambire ci “Oyu a na kurupera Maisiraele,” Majuda a dimukire ci aa amba yo Mesiya oyu wa keyire.}

21 A mu tawire ci: “Kwithsa mañoro aa na tu mono aa na tundu ku Judea o ku amba yoe, karo kwithsa munu kwaenthzetu oyu naa tunduko ku na tu tongwera yoimango eyi no kwama. 22 Unone atwe twaa fota ku yuva eanekera yoe, inene kokuhe anu aa rwithsa ethsi thsipani.”

23 A ciyuvire diyuwa dyo ku ciwana na Paulu. Mwedyo diyuwa anu a keyire kongi oku a turerire Paulu. Ku tateka mathsikuthsiku ku twara kanguronguro wa tongononine no ku pa ombangi o Kutumina kwa Nyambi. Wa erekire ku wa rakwithsa ya Yesu ko ku cikwathsithsa Murao wa Mushe no mu mañoro Akwakukethza. 24 Amweya a rakwire eyi a ambire Paulu, unone amweya ka i tawire. 25 Majuda a kwangire ku ciyuva, a tatekire ku thza munyima thzo ku amba Paulu aa maywi ci: “Mupepo Oukenu wa amberire akwathsañuruenu yo shemwa ka mukwakukethza Isaya ci:
26 “‘O thze o ka tongwere awa anu ci:
“Ku yuva kenge mwa ku yuva,
unone ka mwa ku yuvithsithsa,
ku mona kenge mwa ku mona,
unone ka mwa ku monithsithsa.”
27 Inene awa anu po akwa mukanayuva,
a na civuku mu matwi,
no ku cithzimenena meho,
ci meho o a mona,
no matwi o a yuva,
ci ekara no maano,
o ku thsiurukera ku kwange,
ci ni wa porithse.’” ^d

28 Paulu wa shumunine ku amba ci: “Mweyo, mu dimuke ci oku kuyoyithsiwa na ku tundu kwa Nyambi na ku tumiwa noku kwAnukenge, karo kenge a ku teerera.” 29 [Paulu ou a manine ku amba eyo, Majuda a tundiremo o kwa ka thza o cikanyeka nene. ^{▼▼Ka thzi di mu mañoro o kutanga.}] 30 Paulu wekarire myaka thzidi mu nthzio thzo ku patara, wa tamburangire nawa anu wahe awa keyangire ku na mu mona. 31 Wa hongangire kondume yo Kutumina kwa Nyambi neyi ya Fumu Yesu Krisitu, ko kukana ku kwangithsiwa.