Acts 5

Ananiasi na Safira

1Uno honi mukwerume o dithzina dyo Ananiasi, na munuwenthzi Safira, nawo a urithsire dikanda dyo. 2Ko kuciyuva na munuwenthzi, wa cipakerireko amweya ko aya madi a wanine, amweya waa twarire ku tunganda.

3Peturu ngou a amberire Ananiasi ci: “Ananiasi! Ine eyi o na tawethzera Satana ku endithsa mucima woe kwangera Mupepo Oukenu ko ku cipakera amweya ku madi aa no urithsa pa dikanda dyoe? 4O ku di shime ku urithsiwa edyo dikanda ne kadi nedi dyoe nji? Karo ou na di pu ku urithsiwa ne, ao madi ne kadi nedi oe nji? Thsine ethsi na thsi reta ci o anekere enu yo kengeyo mu mucima woe? Ko wangerire anu, unone Nyambi o nangera.”

5Ananiasi ou a yuvire eyi, wa wererire pashi no ku fa. Wowa oukuru wengenenine wahe awa yuvire eyi ya tendaharire. 6Mishumba ngou thza keyire no ku na mu peta no ku mu twara ku ka mu vumbeka.

7Ou kwa pitire etunde ihatu, munu wa Ananiasi wa keyire ko kukana ku dimuka ethsi thsa tendaharire. 8Peturu wa mwipurire ci: “O ni tongwere, ene aa ne odiyo madi aa na mu urithsa na munuwoe pa dikanda nji?”

Wa tawire ci: “Ii, po a hura oahe.”

9Unone Peturu wa mu amberire ci: “Ngepi edi na mu ciyuvu ku ereka Mupepo wa Fumu? O mone! Anu awa na ka vumbeka munuwoe pa thsero a di, kenge a ku shimba nowe!”

10Popo wa wererire ku mauru a Peturu no ku fa. Awo mishumba a ka vumbekire munuwenthzi ou a ka hukire a na mu wanine o ku na fu, a mu shimbire no ku ka mu vumbeka ku mbadi thza munuwenthzi. 11Wowa oukuru wengenenine kereke thzothzihe namweya wahe awa yuvire eyi ya tendaharire.

Emonithso nekomokithsa yo tunganda

12Tunganda twa kwamine emonithso nekomokithsa yoingi mukaci kanu. Akwakutawa kuma a ciwanangire pofoci mu Makeke a Solomoni. 13Kwithsa munu wao oyu wa keshukire ku civandakanano, shaanga i ninge ci a remekiwire nene kwanu. 14Shaanga ikare kengeyo, mungi wanu, akwerume nambuyama a tawire kwa Fumu Yesu no ku vungithsiwa ku taro thzo. 15Mukaci kekwama eyi twa kwamine tunganda, akwakukora a shimbiwangire ku wa twara ku makurukuñwa no ku wa paka pa madidi no pa tunaha ci Peturu ou a pita ngwa muthzimbimbi wenthzi kenge u thsikapo amweya. 16Anu owangi awa tundire mu maumbo o pepi na Yerusalema, a retangire ethzi wo nowa a nyandithsangire mathzimu, karo wahe a porithsiwire.

Kunyandithsiwa ko tunganda

17Mupurisita shokuru wa katukire, nowa ekarire nenthzi wahe awo akwa thsipani thso Masaduki, a tenderire nene mbamba tunganda. 18A kwatire tunganda no ku tu paka mu kamenga ko mbunga. 19Unone othsiku kangeru ka Fumu ka na yanthzururire mathsero o kamenga no ku punithsa tunganda, no ku wa ambera ci: 20“Mu thze mu kemane mu Tembere, mu ka tongwere anu maywi oahe o mwoyo oupe.”

21Tunganda ou twa yuvire eyi, popa dya vire diyuwa mathsikuthsiku shemwa twa kengenine mu Tembere no ku tateka ku rongithsa.

Mupurisita shokuru naenthzenthzi ou a kumine, a wanekire Nthzango, akuru wanu a Isiraele wahe, no ku tuma anu ku ka shimba tunganda mu kamenga. 22Unone tupathso ou twa ka kumine ka twa ka waninemo munu mu kamenga. Ngou twa ka hukire ku na tongora ku Nthzango ci: 23“Ou tu na ka kuma ku kamenga, twaa ka wana ci ekwaro yoihe i na yanthzeriwa no ku patiwa nawa, nakwakunyunga o kwa nemana pa mathsero, unone ou tu na ka yanthzurura ka tu ka waninemo munu.”

24Ou a i yuvire thsitumi wakwakunyunga Tembere nakuru o mapurisita ya wa tanganithsire no ku komoka eyi ya tendaharire ku tunganda. 25Ngou kwa keyire munu no ku na wa tongwera ci: “Mu teerere! Waya akwerume na mu paka mu kamenga a nemana mu Tembere ku rongithsa anu!”

26Thsitumi wakwakunyunga Tembere wa thzire nanuenthzi ku ka shimba tunganda, unone ka ka tu shimbire kokoro inene kuma a yapire ku povauriwa no mawe kwanu. 27Ou a na kumithsire tunganda, a twimekire pa meho o Nthzango. Mupurisita shokuru ngou epurire oto tunganda ci: 28“Na tu mi nomenithsa nene amwe ci mwa ku rongithsa karo mu dithzina dyoyu munu oyu. Uno honi mu na yarithsa Yerusalema yomuhe erongithsa yenu, karo mwaa fota ci kufa kwenthzi kwa ku tu rumbere.”

29Unone Peturu naenthzenthzi tunganda a ambire ci: “Twaa roera ku yuvera Nyambi kadi anu. 30Nyambi wakwathsañuruetu naa pindura kwafu oyu Yesu na mwipaa amwe ko ku mwamba pa mbinda. 31Nyambi wa mu pindwerire ku rudyo rwenthzi ci ekare Muendithsi no Muyoyithsi, a pe ana Isiraele ndau thzo ku cera no ku teteriwa evi yo. 32Atwe po twa mambangi weyi enu, mofoci kengeyo no Mupepo Oukenu oyu naa pa Nyambi kowa a na mu yuvera.”

33Ou a yuvire eyi, Nthzango thza anthzipire nene no ku fota kwipaa tunganda. 34Unone mu kaciko, kwekarire Mufarithsi o dithzina dyo Gamaliele, murongithsi o murao oyu wa remekiwire nene kwanu wahe. Wemanine mu Nthzango no ku raerera ci tunganda tu punithsiwe pora thsikati thsothsipu. 35Wa amberire Nthzango ci: “Amwe mwakwerume a Isiraele, mu mamere keyi mu fota ku tenda kowa akwerume awa. 36Inene mu thsikati thso ku manyima shime kwaa keya munu o dithzina dyo Teudasi, oyu wa cithsire ci munu o mukuru mu thsivaka, oyu wa shupweriwire kwanu o ku fota ku kwana makumi o dikumi ane (400). Ou a paiwire, awa mu shupwerire a cishandukire no ku pwa po ya pwererire yenthzi apo. 37Munyima thzenthzi, mu thsikati thso diñorithsa kwa keyire Judasi o ku Galilea. Naye karo thsa mu shupwerire thsipani thsanu thsothsikuru, naye karo ou a paiwire anuenthzi wahe a cishandukire.

38“Mweyo, pano honi naa mi tongwera ci mwa wa tenda thsimweya awa anu awa. Mu wa thsie, inene ngeci po eanekera nekwama yo po yaa tunda kwanu, kenge ya ku pwa. 39Unone ngeci yaa tunda kwa Nyambi ka mwa ku twethsa ku i pwithsa, mwaa twethsa ku ciwana ci mwaa rwithsa Nyambi!” Nthzango thza shupwerire maywi a Gamaliele.

40Tunganda twethsiwerire mu Nthzango, a tu furire no ku tu nomenithsa ci katere twa ku ambe karo mu dithzina dya Yesu no ku tu thsia ci tu thze.

41Tunganda twa tundire mu Nthzango o ku tu na nyanyuka pa ku mona ci Nyambi o na tu vara ci twaa roera ku nyandera dithzina dya Yesu. 42Diyuwa no diyuwa mu Tembere no mu manthzio ka twa thsiire ku rongithsa no ku honga Muthzimbu Ouwa ci Yesu po yodiyo Mesiya.