Acts 7

Eyi a ambire Setefani mu Nthzango

1Mupurisita shokuru ngou epurire Setefani ci: “Ene eyi ne ya shemwa nji?”

2Setefani aye wa tawire ci: “Amwe mwaenthzange namwe mwatata, mu ni teerere nawa! Nyambi o kutethzima wa monaharire kwa mukwathsañuru wetu Aburahama, o ku di mu ditunga dya Mesopotamia, o ku shime ku thza ku mbongi thza Harani. 3Nyambi wa amberire Aburahama ci: ‘O thsie ditunga dyoe nanuoe, o thze ku ditunga edi ni ku monithsa.’

4“Ngou a tundire mu ditunga dyo Makaladea no ku thza ku Harani o ku a ka tungire. Munyima thzo kufa kwa tata wenthzi, Nyambi wa mu yarukithserire muno mu ditunga mu na tungu rerodino.

5“Unone Nyambi ka a mu pire ku tambura edi ditunga, shaanga ndau thzo ku kuma pa muro o diuru. Unone Nyambi wa kumbwethzire ku di mu pa aye nanahokenthzi munyima thzenthzi, shaanga ci mwethsiya thsikati Aburahama ka ekarire no mwana. 6Nyambi wa mu amberire kenge ci: ‘Anahokoe kenge a ku kekara matundakure mu ditunga dyadyo, karo kenge a ku ka pikuriwa, no ku nyandithsiwa mu myaka thzo dikumi dyo makumi ane.’ 7Nyambi wa ambire ci: ‘Uno honi kenge na ku ratura diya ditunga dya ku wa pikura, karo munyima thzeyo kenge a ku tunda muya mu ditunga no ku na ni rombera muno mu ndau.’

8“Nyambi wa cikwatire thsiyuvano thso mukanda na Aburahama. Aburahama ou erekire Isaka, wa mu twarire ku mukanda munyima thzo mayuwa o mutanu na ahatu ku tunda pa kwerekiwa kwenthzi. Isaka ou erekire Jakovo naye wa kwamine kengeyo, Jakovo naye wa kwamine kengeyo kwatata wetu o dikumi naidi.

9“Awa akwathsañuruetu a tenderire mbamba mino Josefa, ngou a mu urithsire kupika ku ditunga dya Egepita. Unone Nyambi wekarire nenthzi, 10no ku mu patura ku makando enthzi oahe. Nyambi wa mu pire onyanyami no ku hemiwa nene kwa fumu Faro o mu Egepita. Faro wa mu pire ku endithsa ditunga dya Egepita no thsikuña thsenthzi thsothsihe.

11“Uno honi kwekarire ndombo mu Egepita yomuhe no mu Kanana. Kwekarire kunyanda kokukuru, akwathsañuruetu a kwangire dyo ku wana edya. 12Unone Jakovo ou a yuvire ci ko i di edya ku Egepita, wa tumineko akwathsañuruetu ro kutanga ci a ka ureko. 13Ou a wa tumine ro muthsidi, Josefa wa ka citongorire kwakurwenthzi noku kwaminenthzi Benjamini, karo mukuta wa Josefa awopo u dimukiwa kwa Faro. 14Munyima thzeyo, Josefa wa raire ci tata wenthzi Jakovo a ka retiwe no rupathsi rwenthzi roruhe. Ku wa pakerera a kumine mu makumi o mutanu na edi nanu mutanu (75). 15Jakovo ngou a urumukire ku thza ku Egepita, oku a ka fererire aye nakwathsañuruetu. 16Ethzimbi yo ya huthsiwangire ku Shekemu no ku pakiwa mu mararo aa a urire Aburahama ko taro thzo madi o silivera kwana Hamori mu Shekemu.

17“Thsikati ou thsa kokerire po pepi ci i citombore eyi a kumbwethzire Nyambi Aburahama, thsipani thsanuetu mu Egepita thsa vurire nene. 18Ngou kwa shwanine fumu yumweya mu Egepita oyu wa kanine ku dimuka thsimweya keyi ya Josefa. 19Wangerire no ku nyandithsa nene anuetu, no ku ootera akwathsañuruetu ku konthza tumbu two ci tu fe. 20Mwethsiya thsikati Mushe werekiwire, wekarire mwana o muwa nene pa meho a Nyambi. Kuma a reriwerire mu nthzio thza tata wenthzi maonda ahatu. 21Ou a punithsiwire pora, mwana Faro o mbuyama wa mu shimbire no ku mu rera kwikara mwane. 22Mushe wa rongithsiwire onyanyami ouhe o Maegepita, karo wekarire nokoro mu kuamba no mwitenda.

23“Mushe o ku di no myaka thzo makumi ane, wa anekerire ku hungerithsa aenthzenthzi Maisiraele. 24Wa monine Muegepita o kwipithsera Muisiraele, wa amwenine Muisiraele muenthzenthzi, naye sho ku huthsera ku fura Muegepita no ku mwipaa. 25Mushe kuma a anekerire ci Maisiraele aenthzenthzi nga nangurire ci Nyambi kuma a cikwathsithsire aye ku wa patura, unone awo ka i nangurire. 26Diyuwa edi dya randireko, Mushe wa wanine Maisiraele aidi o kwa rwa. Wa erekire ku wa ninga ci a ciyuve no ku wa ambera ci: ‘Amwe mwanu, amwe po mo mu mukuta wenu, ine eyi mu cikurwera?’

27“Unone oyu wepithserire muenthzenthzi wa thsindekire Mushe no ku amba ci: ‘Edye naa ku tende muendithsi no mukwakuratura peuru thzetu? 28Ene waa fota ku nipaa eci diya no wipaa oya Muegepita yana nji?’ 29Mushe ou a yuvire kengeyo, wa cirerire ku ditunga dya Midiani oku a kekarire mutundakure, kodiyo a kerekerire ana aidi wakwerume.

30“Ou kwa pitire myaka thzo makumi ane, kangeru ka hokokire kwa Mushe mu mirengi mu thsipukumuna ethsi thsa yuumine mu dikunguthsitu pepi no Mukinya wa Sinai. 31Mushe ou a monine eyi, wa komokire. Ou a henyenineko ci a mone nawa, wa yuvire diywi dya Fumu o ku di amba ci: 32‘Yame no Nyambi wakwathsañuru oe, Nyambi wa Aburahama, wa Isaka na Jakovo!’ Mushe wa cishutukire ko wowa, ka a keshukire shaanga ku kengako. 33Fumu Nyambi ngou a mu amberire ci: ‘O shupure mashangu kwidyato yoe, inene apo pa ndau o nemana po muve oukenu. 34Ni na mono shemwa dikando dyanuange mu Egepita, karo ni na yuvu thsishiro thso. Yodiyo ni na keyera ku na wa patura. Pano honi owe kenge ni ku tuma ci o huke ku Egepita.’

35“Oyu Mushe a kanine ko ku amba ci: ‘Edye oyu naa ku tende muendithsi no mukwakuratura mu kaci ketu?’ Yodiyo a tumine Nyambi kwikara muendithsi no muyoyithsi wo, ko kangeru aka ka hokokire ku kwenthzi mu thsipukumuna thso ku yuuma. 36Mushe wa tangererire Maisiraele ku tunda mu ditunga dya Egepita, wa tendire ekomokithsa nemonithso mu Egepita, mu Diwate Dyodikihu no mu dikunguthsitu, mu myaka thzo makumi ane.

37“Mushe yodiyo wa amberire Maisiraele ci: ‘Nyambi kenge a ku mi tumena mukwakukethza eci ame o mu mukuta wenu.’ 38Yodiyo oya wekarire mu mbunga thzanua Nyambi mu dikunguthsitu no kaya kangeru ka ambire nenthzi pa Mukinya wa Sinai, karo ka ambire nakwathsañuruetu. Wa tamburire maywi o mwoyo no ku na a tu pa.

39“Unone akwathsañuruetu ka mu yuverire, a mu kanine karo mu micima thzo a hukire ku Egepita. 40A amberire Aroni ci: ‘O tu kwamene anyambi awa a tu tangerera, inene oyu Mushe naa ka tu tundithsa mu ditunga dya Egepita po ka tu dimuka eyi i na ka tendahara ku kwenthzi.’ 41Mo aya mayuwa ngou a cikwamenine thsikupuro thso pohoana karo a thsi kwamenine thsiyambero no thsidika ku nyanyukera ekwama yo moko o. 42Unone Nyambi wa wa pire muongo no ku wa thsia ci a rombere matungwethzi o ku wiru, eci edi i na ñoriwa mu vuka thzakwakukethza ci:
“‘Amwe mwana Isiraele,
ene kadi yame mwa kwamenine eyambero no nupu,
mu myaka thzo makumi ane mu dikunguthsitu?
43Kuma mwa shimbire diyambero dya Moloki,
no ditungwethzi dya nyambi wenu Refani,
ekupuro eyi mwa kwamine ku i rombera.
Mweyo, kenge na ku mi yarukithsera
ku thsambwadiya thzo ditunga dya Babilona.’

44“Akwathsañuruetu kuma ekarire no tende thzombangi mu dikunguthsitu. Kuma thza kwamiwire komu a i raererire Nyambi kwa Mushe ku thza ko thsikupuro ethsi a monine. 45Ethzo tende thza tamburiwire kwakwathsañuruetu awa a randireko, awa ekarire na Joshua uya a kuparire uya muve a wa pire Nyambi, omu a rundurire Anukenge awa a tungiremo. Ethzo tende thzekariremo shime ku na kuma mu thsikati thsa Fumu Davida, 46oyu wa wanine thsihemo kwa Nyambi, karo Davida wa rombire ci a umbere Nyambi wa Jakovo ditungo. 47Unone Solomoni yowa thzi mu umberire.

48“Uno honi Nyambi o Kuthzinama Nene ka a yoya mu manthzio o ku kwamiwa ko moko anu. Eci edi a amba mukwakukethza ci:
49“‘Diwiru po thzodiyo ngunja thzange,
kaye po thsipura thso mauru ange.
Nthzio thzo ngepi ethzi nga mu ni umbera?’
kwaa amba Fumu.
‘Nji ndau thzo ngepi thzo diturumwithsero dyange?
50Ene kadi moko ange ombire diwiru no kaye neyi i dimo yoihe?’

51“Amwe mwakwa mukanayuva, o micima no matwi o kukana ku yuva oshemwa! Mwaa cipitura eci akwathsañuruenu, mwaa kanenanga Mupepo Oukenu thsikati thsothsihe! 52Yupi mukwakukethza oyu a kanine ku nyandithsa akwathsañuruenu? Epaire shaanga awa okethzire yo kukeya koyu o Muwawa, aye Mesiya oyu na mu kwatithsa no ku mwipaa! 53Amwe mwa tamburire murao wa Nyambi ou twa retire tungeru twenthzi, unone mwaa kana ku u hengeka.”

Kufa kwa Setefani

54Aendithsi o Majuda ou a yuvire eyi a ambire Setefani, a anthzipire nene no ku cihuma nwaeo. 55Unone Setefani ko ku yara Mupepo Oukenu wa kengererire ku wiru. Wa monine kutethzima kwa Nyambi no Yesu o ku nemana ku dyoko dyo rudyo dya Nyambi. 56Setefani wa ambire ci: “Mu mone! Naa mona diwiru di na yanthzururiwa no Mwana Munu o ku nemana ku dyoko dya Nyambi dyo rudyo.”

57Unone ou a yuvire kengeyo, a civukire mu matwi no ku kumba ko diywi dyodikuru o kwa cirera ku kwenthzi. 58A mu purututire ku mu tundithsa mu mbongi no ku tateka ku mu povaura no mawe. Mambangi ngou a pakire ekoveyo yo yo peuru ku mauru o mushumba oyu nethsiwa Saule.

59O kwa mu povaura kengeyo, Setefani wa romberire ci: “Fumu Yesu, o tambure mupepo wange.” 60Wa tongamine ku manwi no ku kumba ko diywi dyodikuru ci: “Fumu, wa wa pakera ethsi thsivi.” Ou a manine ku amba kengeyo wa fire.