Acts 9

Saule aa piruka Mukrisitu

(Ete 22.6-16; 26.12-18)

1Mwethso thsikati Saule wa cikanyine kwipaa erongwa ya Fumu, wa thzire kwa mupurisita shokuru. 2Wa ka rombireko mañoro o ku thza nao ku masinagoge o mu Damaseka ci ngeci waa ka wane anu, akwerume nji ambuyama awa shupwera Dikuñwa dya Fumu Yesu, a ka wange no ku wa reta mu kamenga mu Yerusalema.

3O ku di mu dikuñwa kengeyo, o ku kokera ku Damaseka, popo mumunyi o kwethsa nene wa tundire ku wiru wa munekire ku mu paka mu kaci. 4Wa wererire pashi, karo wa yuvire diywi edi dya mu amberire ci: “Saule, Saule, ine eyi o ni nyandithsera?”

5Saule wepurire ci: “Yowe odye, Fumu?”

Aye wa tawire ci: “Yame no Yesu oyu o nyandithsa. 6O katuke honi o thze mu mbongi, kenge o ka tongweriwa eyi o na roera ku tenda.”

7Akwerume awa endire na Saule emanine pohuma kuruu, a yuvire diywi, unone kwithsa oyu a monine. 8Saule wa katukire pashi, unone ou a kengire ka a twethsire ku mona thsinu. Ngou a mu kwatererire ku dyoko no ku mu twara mu Damaseka. 9Wa shimbire mayuwa ahatu kwithsa ku mona, nji ku dya no ku nwa.

10Omo mu Damaseka mwekarire thsirongwa thso dithzina dyo Ananiasi. Fumu wa mu amberire mu thsimona ci: “Ananiasi!”

Aye wa tawire ci: “Yamono, Fumu.” 11Fumu wa mu amberire ci: “O katuke o thze mu Mukwakwa o Kuoroka ku nthzio thza Judasi, o kepureko munu oyu naa tundu ku Tarese o dithzina dyo Saule, yoyu rombera pano. 12O na mono mu thsimona mukwerume o dithzina dyo Ananiasi o ku keya no ku na mu kambeka moko ci a mone karo.”

13Ananiasi wa tawire ci: “Fumu, na ni yuvu kwanu owangi etenda yoyu munu neyi yoimango eyi naa tende kwanuoe owakenu mu Yerusalema. 14Naa keya kuno nokoro o ku tunda kwakuru o mapurisita ku nanga anuoe wahe a wethsa pa dithzina dyoe.”

15Unone Fumu wa tawire Ananiasi ci: “O thze, inene oyu munu ni na mu hangura ku twara dithzina dyange kwAnukenge, ku mafumu no ku Maisiraele. 16Karo kenge na ku mu monithsa ci a ku kuma kupi makando aa a na roera ku nyanda mukaci ko dithzina dyange.”

17Ananiasi ngou a thzire no ku kengena omo mu nthzio. Wa ka kambekire moko Saule, no ku amba ci: “Shadi Saule, Fumu Yesu oyu naa hokoka ku koe mu dikuñwa o ku keya kuno yo na ni tumu ci nga o twethse ku mona karo, no ku ninga ci o yare Mupepo Oukenu.” 18Popo enu yo ku pitura eci nyathzi ya tundire mu meho a Saule, ayepo mona karo. Ngou emanine no ku korovethziwa. 19Ou a manine ku dya wa tanarire.

Saule mu Damaseka no mu Yerusalema

Saule wekarire mayuwa oapu nerongwa mu Damaseka. 20Popo wa tatekire ku honga mu masinagoge ci Yesu po Mwana Nyambi.

21Wahe awa mu yuvire a komokire no ku cipura ci: “Oyu ne kadi yodiyo oya naa nyandithsanga dyodimango anu awa ethsa podi dithzina mu Yerusalema? Ene kadi yodiyo na a keyera kuno oyu, ku na wa twara kwakuru o mapurisita o kwa nangiwa?”

22Unone Saule wa twarire ku rupara ku koropa nene, mane shaanga Majuda o mu Damaseka a kwangire dyo ku kana erongithsa yenthzi yo kuninga ci Yesu po yodiyo Mesiya.

23Ou kwa pitire mayuwa oangi, Majuda a ciwanine no ku yongora kwipaa Saule. 24Uno honi wa dimukire eanekera yo. Awo kuma mundamenangire pa mathsero o mbongi othsiku no mutenya ci a mwipae. 25Unone diyuwa dimweya othsiku, erongwa yenthzi ya mu pakire mu diyongo no ku mu shurumwena mu diporwa dyo pa dimota dyo mbongi.

Saule mu Yerusalema

26Saule ou a kumine mu Yerusalema wa erekire ku cipakerera naenthzenthzi erongwa, unone wahe a mu yapire inene ka tawire ci naye nedi thsirongwa shemwa. 27Unone Banabasi wa mu shimbire no ku mu twara ku tunganda. Wa ka tongwerire tunganda ya Saule edi a monine Fumu o ku thza ku Damaseka nedi a ambaurire nenthzi Fumu. Karo wa wa tongwerire edi a ka hongire kondume mu dithzina dya Yesu mu Damaseka.

28Ku tunda ethso thsikati Saule wekarangireno. Wa endaurire mu Yerusalema momuhe o ku thza o rongithsa mu dithzina dya Fumu kondume. 29Wa ambaurangire no ku cikanyekanga no Majuda awa ambire Thsigerike, ambene awo kuma fotangire ku mwipaa. 30Akwakutawa ou a i yuvire eyo, a mu thsindekethzire ku Sesarea ci a ka thze ku diumbo dyenthzi ku Tarese.

31Mweyo kereke thzekarire mu thsiyaro mu ditunga dyodihe dya Judea no mu Galilea na Samaria. Thza tanarithsiwire, nakwakutawa a yoyire ko ku yapa Fumu. Ko ku tanarithsiwa ku Mupepo Oukenu, kereke thza vurerire anu.

Peturu aa porithsa Enea

32Peturu o ku thza o pitapitamo, wa thzire ku ka hungerithsa akwakutawa o mu Lida. 33Oko wa ka wanineko mukwerume o dithzina dyo Enea oyu wa kukuterire erama myaka thzo mutanu na thzihatu o ku di podidi. 34Peturu wa mu amberire ci: “Enea, Yesu Krisitu a ku porithse, o katuke o yarure odidi woe!” Popo wa katukire. 35Anu wahe o mu Lida no mu Saroni a i monine awopo a thsiurukera kwa Fumu.

Dokasi aa pinduriwa kwafu

36Mu mbongi thza Jopa kwekarire thsirongwa o mbuyama o dithzina dyo Tabita nji ci Dokasi mu Thsigerike. Mwikati yoihe kuma a tendangire enu yoiwa no ku kwathsa ahepwe. 37Mwao mayuwa kuma a korire no ku fa. Anu a yoire thsithzimbi no ku thsi paka mu koroi. 38Pakuninga ci mbongi thza Lida thza cihatire nethzi thza Jopa, erongwa ou ya yuvire ci Peturu po mu Lida a di, ya tumineko akwerume aidi ku ka mu romba ci: “O adikane o yokorore o thze netu ku Jopa.”

39Peturu wa katukire no ku thzano. Ou a ka kumine a ka mu twarire ku koroi. Mafakathzi oahe a mu konganenine o kwa dira, a mu monithsire ekoveyo no macanthzi eyi a wa rukerangire Dokasi o ku yoya. 40Peturu wa punithserire anu wahe pora, wa tongamine no ku rombera. Ngou a thsiurukerire ku thsithzimbi no ku amba ci: “Tabita, o pinduke!” Tabita wa kengire, ou a monine Peturu wa pindukire no kwikara. 41Peturu wa mu kwatire ku dyoko ku mu kwathsa ci emane. Ngou ethsire akwakutawa no mafakathzi no ku u wa pa o ku yoya.

42Eyi ya yukire mu mbongi thza Jopa thzothzihe, karo anu owangi a tawire kwa Fumu. 43Peturu wekarire mu Jopa mayuwa oangi ku nthzio thza mukwerume oyu nethsiwa Simoni mukwakunyuka etumba.