Act 1 | MhoSC | STEP | Ku koe shokuru Teofile, mu vuka thzange thzo kutanga na ni ku ñorera enu yoihe eyi a tatekire ku kwama Yesu neyi a rongithsire,

Acts 1

Thsikumbwethzo thso Mupepo Oukenu

1 Ku koe shokuru Teofile, mu vuka thzange thzo kutanga na ni ku ñorera enu yoihe eyi a tatekire ku kwama Yesu neyi a rongithsire, 2 shime ku na kuma mu diyuwa edi a mu shimbire Nyambi ku mu twara ku wiru, o ku na mana ku pa eraerera ko Mupepo Oukenu ku tunganda twenthzi otu a hangurire. 3 Munyima thzo dikando dyenthzi pa mbinda, wa cimonithsire kukwo no ku wa rakwithsa shemwa momungi ci nedi muyumi. Mu mayuwa o makumi ane wa hokokangire kukwo no ku wa tongwera yo Kutumina kwa Nyambi.

4 Diyuwa dimweya o ku dino, wa wa raererire ci: “Mwa ku tunda muno mu Yerusalema, unone mwa ku taterere shime tango Tata ou a ku mi tumena thsipa ethsi a kumbwethzire, eci diya na mu yuvu o ku ni i amba. 5 Inene Johani kuma a korovethzire ko meyu, unone amwe munyima thzo mayuwa oapu kenge mwa ku korovethziwa ko Mupepo Oukenu.”

Yesu aa thzina mu wiru

6 Ou yekarire pofoci na Yesu ya hukahukerire ku mwipura ci: “Fumu, ene thso thsikati thsino honi wa ku huthsera kutumina ku Maisiraele nji?”

7 Wa wa tawire ci: “Tata yodiyo o di nokoro o ku dimuka ekati nji myaka, karo eyo po kadi yenu ci mu i dimuke. 8 Unone kenge mwa ku tambura okoro Mupepo Oukenu apa wa ku keya pa penu. Kenge mwa kwikara mambangi ange ku tongwera anu keyi yange mu Yerusalema, mu Judea yomuhe no mu Samaria, shime ku ka kuma ku hura o kaye.”

9 Ou a manine ku amba eyi, wa shimbiwire ku twariwa mu wiru o kwa na mu tanekera, karo divui dya mu thsikire. 10 O kwa na mu rupukera kengeyo o ku kengena mu wiru, popo akwerume aidi awa vatire evata yo ku vyakima a nemanine ku nyonga thzo. 11 A ambire ci: “Amwe mwakwerume o ku Galilea, ine eyi mu nemanena kuno o ku mu na rupukera ku wiru? Oyu Yesu na shimbiwa ku kwenu ku twariwa mu wiru kenge a ku ka huka dyodi mu na mu mono o ku thza mu wiru.”

Matiasi aa hanguriwa ku shwana Judasi

12 Tunganda ngou twa hukire ku Yerusalema ku tunda pa Mukinya wEtondo yo Miywera, muendo o ku kwana kanano kofoci. ^{▼▼Ruendo ro ku tawethza Majuda ku enda dyo Savata.} 13 Ou a ka kumine, a ka thzinine ku koroi omu ekarangire.

Mathzina owa ekariremo po aa: Peturu, Johani, Jakovo, Andereasi, Filipu, Tomasi, Batolomeu, Mateu, Jakovo mwana Alufea, Simoni oyu nethsiwa Zeloti no Judasi mwana Jakovo. 14 Awa wahe a cikwatire pofoci no ku tanarithsa erombero, mofoci kengeyo no waya ambuyama na Madiya mama wa Yesu namina Yesu.

15 Mwethso thsikati akwakutawa o kukwana makumi o dikumi no makumi edi (120) a ciwanine pofoci. Peturu wa katukire no ku amba ci: 16 “Andengenu, Mañoro naa citombora neyi wa ambire Mupepo Oukenu ka Fumu Davida ku kare keyi ya Judasi Isikariota, oyu naa tangerera waya na kwata Yesu. 17 Judasi kuma na ekara yumweya o mu thsipani thsetu no ku ciera mwikwama yetu.”

18 (Pa madi aa naa wana pekwama yenthzi yoimango, Judasi naa urupo dikanda omu naa ka fera. Naa u ku tangerithsa mutwi, erama yenthzi na i yatuka mu kaci no mihoe thzenthzi thzothzihe na thzi ruputukera pora. 19 Eyo ya yukire kwanu wahe o mu Yerusalema, ngou a tire edyo dikanda mu mushovo wo ci: “Akeludama, ku amba ci Dikanda dyOnyinga.” ^{▼▼Mu mushovo o Thsiaramaiki.}).

20 Peturu wa shumunine ci: “Inene ya ñoriwire mu Vuka thzo Membo ci:
“‘Mu thsie diumbo dyenthzi dikare diundu,
A ku tungamo munu.’

“Karo ci:
‘Mu ndau thzenthzi ku shwane wao.’

21 “Mweyo, tu hangurenu munu oyu shwana mu ndau thza Judasi, kwakwerume awa nekaranga netu thsikati thsothsihe uya naa endauranga netu Fumu Yesu, 22 ku tatekera apa a mu korovethzerire Johani shime ku na kuma mu diyuwa edi naa mu shimbi Nyambi ku kwetu ku mu twara mu wiru. Oyu hanguriwa aa roera kwikara netu mbangi o kupinduka kwa Yesu kwafu.”

23 Ngou emekire akwerume aidi, Josefa oyu nethsiwa Basabasi karo oyu wethsiwire ci Jusitasi, no Matiasi. 24 Ngou a romberire wahe ci: “Fumu, owe na dimuka micima thzanu wahe, o tu monithse oyu o na hangura powa akwerume aidi, 25 oyu nga o shwana ndau thza Judasi Isikariota muno mwikwama yonganda eyi naa thsii no ku thza ku ndau ethzi thzi na mu roera.” 26 Ngou okire ko ñera, Matiasi wa hanguriwire kwikara kanganda no ku mu vungithsa po tuya to dikumi na kofoci.