Act 10 | MhoSC | STEP | Mu mbongi thza Sesarea, kwekarire mukwerume o dithzina dyo Koneliasi, nedi muendithsi o mashwarare o Maroma, o ku ditunga dya Itali.

Acts 10

Koneliasi aethsa Peturu

1 Mu mbongi thza Sesarea, kwekarire mukwerume o dithzina dyo Koneliasi, nedi muendithsi ^{▼▼Diywi dyo Thsigerike dyaa amba muendithsi o mashwarare o makumi o dikumi.} o mashwarare o Maroma, o ku ditunga dya Itali. 2 Aye no mwanda wenthzi ouhe a cipakire kwa Nyambi no ku mu yapa. Wa pangire ekwathsa yoingi kwahepwe, no ku romberanga Nyambi thsikati thsothsihe. 3 Diyuwa dimweya runguro ko thsikati thso muthsihatu, wa monine thsimona, kangeru ka Nyambi ka keyire ku kwenthzi, no ku mwithsa ci: “Koneliasi!”

4 Ko ku yapa nene, Koneliasi wa rupukerire ako kangeru no ku tawa ci: “Fumu, ine?” Kangeru ka mu tawire ci: “Nyambi o na tambura erombero yoe nekwathsa yoe kwahepwe eci nupu. 5 O tume anu ku mbongi thza Jopa a kethse mukwerume o dithzina dyo Simoni Peturu, 6 o mwenda oyu di ku nthzio thza Simoni mukwakunyuka etumba, oyu na tungera ku kakuro ko diwate.”

7 Ou ka thzire ako kangeru ka ambire nenthzi, Koneliasi wethsire aidi kwangambenthzi, no dishwarare dimweya edi dya cipakire kwa Nyambi koa a mu nyungangire. 8 Wa wa tongwerire yoihe eyi ya tendaharire, no ku wa tuma ku Jopa.

Thsimona thsa Peturu

9 Diyuwa edi dya randireko awa tumiwire o kwa kokera ku Jopa, Peturu wa thzinine pa thsituwa thso kuyaramana thso nthzio ku ka rombera. Apo, nedi diyuwa o ku di di pa kaci ko mutwi. 10 Karo wa fire nthzara no ku fota ci nga na di. Uno honi o kwa mu kwamena edya kengeyo, wa monine thsimwithso. 11 Wa monine diwiru o ku di na yanthzuruka, no thsinu thso ku pitura eci dimbatu dyodikuru o ku thsi shurumuka pashi ko mikono thzathso thzine. 12 Mu kaci kadyo kwekarire mishovo thzothzihe thzeyama neharawi yo pa kaye nenyunyi yo mu wiru. 13 Diywi ngou dya mu amberire ci: “Peturu, o katuke! O wipae, o dye!”

14 Unone Peturu wa tawire ci: “Fumu, dyombo! Na diyerire ku dya yo kukana kukena, yo dithziro.”

15 Edyo diywi ngou dya mu amberire ro muthsidi ci: “Ethsi a na kenithsa Nyambi, wa thsi ninga ci kadi thsikenu.”

16 Eyi ya tendaharire miendo thzihatu, mbeci honi di huthseriwe ku wiru.

17 Peturu o ku cikupaura ci ethso thsimona ne thsaa amba ine, awaya anu a tumine Koneliasi a wanine nthzio thza Simoni ko kwipaura, a nemanine pa thsero. 18 Ethsire no kwipura ci: “Ene kuno ku nthzio thzenu ne kwaa di mwenda oyu nethsiwa Simoni Peturu?”

19 Peturu o ku cikupaura kengeyo thsiya thsimona, Mupepo Oukenu wa mu amberire ci: “Kwa di akwerume ahatu awa ku fotafota. 20 O katuke o shuruke o thzeno ko kukana ku tamangera, inene yame ni na wa tumu.”

21 Peturu wa shurukire ku thzako, wa wa amberire ci: “Yame oyu mu fotafota. Ine mu neyera?”

22 A tawire ci: “Koneliasi, muendithsi o mashwarare o Maroma na tu tumu. Munu o muwawa karo wa ku yapa Nyambi, aa remekiwa ku ditunga dyodihe dyo Majuda wahe. Kangeru kokakenu na ka mu ambera ci a kwithse o thze ku nthzio thzenthzi ci a ka yuve eyi o ka amba.” 23 Peturu ngou a wa tamburire no ku wa twara mu nthzio kwikara endenthzi.

Peturu mu nthzio thza Koneliasi

Ou dya vire diyuwa wa thzireno, akwakutawa amweya o mu Jopa a thzire nenthzi.

24 Diyuwa edi dya randireko, a ka kumine mu Sesarea. Koneliasi kuma a wa tatererire, wa kongire apenthzi nambushenthzi. 25 Peturu ou engenine mu nthzio, Koneliasi wa mu shambawerire no ku tongama ku mauru enthzi, ku mu pa direma. 26 Unone Peturu wa mwimanithsire no ku mu ambera ci: “O wimane, name no munu o ku pitura eci owe.”

27 O ku ambaura nenthzi kengeyo, Peturu wengenine mu nthzio no ku wana anu owangi o kwa na kongana. 28 Peturu ngou a wa amberire ci: “Amwe mwathsinda mu na dimuka nawa ci murao wetu o Thsijuda ka u tu tawethzire ku cipakerera nji kwingena mu nthzio thzo Munukenge. Unone Nyambi naa ni monithsa kuninga ci ka ni roerire ku toya munu ci kadi mukenu nji ci wa dithziro. 29 Mweyo, uya na ni kethsiwa na ni keya ko kukana ku kana. Pano honi mu ni tongwere eyi mu na ka nithsera.”

30 Koneliasi wa tawire ci: “Na ku piti mayuwa ane pohuma ko thsino thsikati, ko thsikati thso muthsihatu runguro o ku ni rombera mu nthzio thzange. Popo mukwerume oyu wa vatire yo kutethzima wa nemanine pa rupara rwange. 31 Wa ni amberire ci: ‘Koneliasi, Nyambi na yuvu erombero yoe no ku vuruka ekwathsa yoe kwahepwe. 32 O tume anu ku mbongi thza Jopa ci a ka shimbe mukwerume o dithzina dyo Simoni Peturu. Kuma naa turera ku nthzio thza Simoni o mukwakunyuka etumba oyu na tungera ku kakuro ko diwate.’ 33 Yodiyo na ni tumena anu ko wanguwangu, i na roo uno o na keya. Mweyo honi, tu na kongana twahe pano pa rupara rwa Nyambi ci tu yuve yoihe eyi no raereriwa kwa Fumu.”

Erongithsa ya Peturu mu nthzio thza Koneliasi

34 Peturu ngou a tatekire ku amba ci: “Pano ni na dimuka honi shemwa ci Nyambi ka a wana mavwevwe, 35 unone aa tambura anu o matunga oahe awa a na mu yapa no ku tenda enu eyi i na roera. 36 Mu na dimuka muthzimbu ou a tumine Nyambi kwanua Isiraele, ao Muthzimbu Ouwa o thsiyaro ka Yesu Krisitu, aye Fumu wanu wahe. 37 Mu na dimuka eyi ya tendaharire mu ditunga dyodihe dya Judea, eyi ya tatekerire mu ditunga dya Galilea, munyima thzo korovethzo thziya a hongire Johani. 38 Karo mu na dimuka ci Nyambi wa wethsire Yesu wa Nazareta ko Mupepo Oukenu nokoro. Wa thzire o kwama yoiwa no ku porithsa wahe awa a nyandithsiwire kwa shamaonga, inene Nyambi wekarire nenthzi.

39 “Atwe po twa mambangi weyi enu yoihe a tendire mu ditunga dyo Majuda no mu Yerusalema. A mwipaire ko ku mwamba pa mbinda, 40 unone Nyambi wa mu pindurire kwafu mu diyuwa dyo muthsihatu no ku mu monaharithsa. 41 Ka a hokokire kwanu wahe unone shime ku kwetu atwe twa hanguriwire kwa Nyambi kwikara mambangi, atwe twa dire no ku nwa nenthzi munyima thzo kupinduka kwenthzi kwafu. 42 Wa tu raererire ci tu honge anu no ku pa ombangi ci yodiyo naa hanguriwa kwa Nyambi kwikara dihako wayumi nafu. 43 Yodiyo oyu a pire ombangi keyi yenthzi akwakukethza wahe ci yomuhe o ku tawa ku kwenthzi kenge a ku teteriwa evi yenthzi mu dithzina dyenthzi.”

Anukenge aa tambura Mupepo Oukenu

44 Peturu o ku amba eyi, Mupepo Oukenu wa shurumukerire panu wahe, awa teererire aa maywi. 45 Akwakutawa o Majuda ^{▼▼Majuda awa thza mukanda.} awa keyire na Peturu a komokire ou a monine thsipa thso Mupepo Oukenu o ku thsi piwa kongi noku kwAnukenge. 46 Inene kuma a wa yuvire o kwa amba madimi no ku shangara Nyambi.

Peturu ngou a ambire ci: 47 “Ene kwaa di oyu nga wa kanithsa ci a korovethziwa ko meyu nji? Inene nawo a na tambura Mupepo Oukenu, eci dyodi na tu mu tambura atwe.” 48 Ngou a raererire ci a korovethziwe mu dithzina dya Yesu Krisitu. Ou ya pwire eyo a rombire Peturu ci ekareno mu mayuwa oapu.