Acts 3

Peturu aa porithsa thsikunga

1Diyuwa dimweya, Peturu na Johani kuma a kambamine ku thza ku Tembere ko thsikati thso ku rombera, ko thsikati thso muthsihatu runguro. 2Mwethso thsikati o ku ku retiwa ku Tembere mukwerume oyu wekarire thsikunga ku tunda ku kwerekiwa. Kuma mu pakangire diyuwa no diyuwa pa thsero thzo Tembere ethzi thzi nethsiwa ci Thsero Thzothziwa, ci a rombe madi kwanu awa engena mu Tembere. 3Ou a monine Peturu na Johani o kwa fota kwingena mu Tembere, wa wa rombire madi.

4Peturu na Johani a mu rupukerire, Peturu ngou a ambire ci: “O tu kenge!” 5Oya mukwerume wa wa kengererire ko thsithzui ko ku kurupera ci kenge a tambura thsimweya kukwo. 6Unone Peturu wa mu amberire ci: “Ka ni di no silivera nji gauda ci ni ku pe, unone kenge ni ku pa eyi ni di nayo. Mu dithzina dya Yesu Krisitu wa Nazareta, o katuke o ende!”

7Peturu ngou a mu kwatire ku dyoko dyo rudyo ku mu kwathsa ci a katuke. Popo edyato no mangongo enthzi ya tanarire. 8Wa reerire mu wiru no kwimana ko mauru enthzi, ayepo tateka ku enda. Ngou a thzireno mu Tembere o ku thza o enda no ku rearea o ku shangara Nyambi.

9Anu wahe a mu monine o ku enda noku shangara Nyambi, 10no ku mu dimuka ci yodiyo oya na ekaranga pa Thsero Thzothziwa thzo Tembere o ku romba ekwathsa. A njembukire no ku komoka eyi ya tendaharire ku kwenthzi.

Peturu aa rongithsa mu Tembere

11Oyu munu o ku na kakatera a Peturu na Johani, anu wahe a komokire no ku cirera ku Makeke a Solomoni oku ekarire a Peturu na Johani.

12Peturu ou a i monine wa wa amberire ci: “Amwe mwakwerume a Isiraele, ine eyi mu i njembukera eyi, karo ine eyi mu tu rupukera eci yatwe tu na twethsa ku endithsa oyu munu kokoro nokenu wetu? 13Nyambi wa Aburahama, Isaka na Jakovo, aye Nyambi wakwathsañuruetu naa paka mu kutethzima Mupikenthzi Yesu, oyu mwa pire no ku mu hamura pa meho a Pilatu shaanga ci aye kuma a fotire ku mu rukurura. 14Unone amwe mwa kanine aye o Mukenu nOwawa no ku romba ci a mi rukurwere thsipaanu. 15Mwepaire aye mukwa ku pa mwoyo, unone Nyambi naa mu pindura kwafu. Atwe po twa mambangi wayo eyo.

16“Ko thsitawo mu dithzina dya Yesu, oyu mukwerume mu mona no ku dimuka na tanarithsiwa. Ko thsitawo mu dithzina dya Yesu eyi i na mu porithserera o ku mu cimonena mwahe.

17“Pano honi andengenu, naa mona ci eyi mwa tendire amwe naendithsi enu, kuma mwa i tendire ko kukana ku dimuka. 18Unone Nyambi wa kwamine eyi ci i citombore neyi okethzire kakwakukethzenthzi wahe ku kare, yo kuninga ci Mesiya wenthzi kenge a ku nyanda. 19Mweyo, mu cere no ku thsiurukera kwa Nyambi ci evi yenu i teteriwe, 20ci ekati yo ku yooyera nga ya ku keye ku tunda kwa Fumu, karo ci nga a ku tume Mesiya oyu a mi hangwerire ku kare, aye Yesu, 21oyu na roera kwikara mu wiru shime apa thsa ku keyera thsikati thso ku huthsera enu yoihe, eci edi a kumbwethzire Nyambi ku kare kakwakukethzenthzi owakenu. 22Mushe wa ambire ci: ‘Fumu Nyambi kenge a ku mi tumithsera mukwakukethza eci ame ku tunderera mu kaci kanuenu. Mwa ku teerere yoihe eyi a ku mi tongwera. 23Munu yomuhe oyu mbo kana ku teerera eyi a ku amba oyo mukwakukethza, kenge mba a cinuniwa kwanua Nyambi no ku nongithsiwa.’

24“Akwakukethza wahe ku tatekera kwa Samuele, okethzire keyi i tendahara thsino thsikati. 25Eyi a kumbwethzire Nyambi kakwakukethza no thsiyuvano thsiya a cikwatire nakwathsañuruenu po yenu. Wa amberire Aburahama ci: ‘Kenge na ku fiyawera anu wahe o kaye kanahokoe.’ 26Mweyo, Nyambi ou a manine ku pindura mupikenthzi kwafu, wa mu tumine tango ku kwenu ci naa mi fiyawere ko ku thsiithsa munu no munu omango wenthzi ouhe.”